សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ចាប់តាំងពីកើតវិបត្តិកូវីដ១៩ មានគម្រោងអភិវឌ្ឍន៍អចលនទ្រព្យជាច្រើនបានជួបបញ្ហាហិរញ្ញវត្ថុរហូតដល់ដំណាក់កាលជាប់គាំង ដោយក្នុងនោះ ក្រសួងរៀបចំដែនដី នគរូបនីយកម្ម និងសំណង់ បានព្យាយាមចូលរួមដោះស្រាយគម្រោងដែលមានបញ្ហាទាំងនោះជាបន្តបន្ទាប់ ជាក់ស្ដែងក្នុងឆ្នាំ២០២៥កន្លងទៅនេះ ក្រសួងរៀបចំដែនដី បានដោះស្រាយគម្រោងដែលមានបញ្ហាទាំងនោះបានចំនួន១១៥ ដោយជោគជ័យ ជាមួយយន្តការមួយចំនួនសម្រាប់ដោះស្រាយ ។
យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានបង្ហាញថា ក្នុងឆ្នាំ២០២៥ គម្រោងអភិវឌ្ឍន៍អចលនទ្រព្យចំនួន ១៧៧គម្រោងបានដាក់ស្នើសុំឱ្យក្រសួងជួយដោះស្រាយ ហើយជាលទ្ធផល ក្រសួងបានដោះស្រាយដោយជោគជ័យចំនួន ១១៥ និងកំពុងដោះស្រាយចំនួន៥៨ គម្រោង ដោយឡែក ៤គម្រោងទៀត កំពុងស្ថិតនៅក្នុងនីតិវិធីរបស់តុលាការ។
តាមរយៈរបាយការណ៍ដដែលបានបង្ហាញផងដែរថា គម្រោងដែលមានបញ្ហាច្រើនជាងគេ គឺគម្រោងអភិវឌ្ឍន៍ជាបណ្តុំលំនៅដ្ឋាន និងមានលក្ខណៈជាបុរី មានរហូតដល់ទៅ ១២០គម្រោង ប៉ុន្តែក្រសួងបានដោះស្រាយរួចរាល់ចំនួន ១០៣គម្រោង ។ ក្រៅពីនេះ មានគម្រោងអភិវឌ្ឍន៍ដីឡូត៍៍ចំនួន ៤៤គម្រោង ដោយក្រសួងដោះស្រាយបាន ១១គម្រោង ហើយក្រៅពីនេះនៅមានគម្រោងខុនដូ និងផ្សារសរុបមានចំនួន ១៣គម្រោង ដោយក្រសួងបានដោះស្រាយរួចរាល់ចំនួន ៥គម្រោងផងដែរ ។
នៅក្នុងការដោះស្រាយវិបត្តិគម្រោងអភិវឌ្ឍន៍ដែលជាប់គាំង ក្រសួងរៀបចំដែនដី បានប្រើប្រាស់យន្តការចំនួន ៥ សំខាន់ៗ រួមមាន ទី១. ស្រាវជ្រាវ និងផ្អាកការផ្ទេរកម្មសិទ្ធិអចលនវត្ថុ របស់ភាគីពាក់ព័ន្ធ, ទី២. ផ្អាកការលក់ទិញ និងទប់ស្កាត់ការចុះបញ្ជី, ទី៣. ប្រមូលទិន្នន័យ កំណត់បញ្ហា និងសម្របសម្រួលដោះស្រាយ, ទី៤. សុំគោលការណ៍ពីថ្នាក់ដឹកនាំ និងដាក់ចេញវិធានការដោះស្រាយ និងទី៥. លើកលែងពន្ធ-អាករ និងកម្រៃសេវាសុរិយោដី ។
សម្រាប់វិធានការបន្តរបស់ក្រសួងរៀបចំដែនដី នគរូបនីយកម្ម និងសំណង់ គឺការកសាងទ្រនំសុភមង្គល និងភូមិឋានក្សេមក្សាន្ត ដោយការរៀបចំឯកសារច្បាប់ ការរៀបចំហេដ្ឋារចនាសម្ព័ន្ធ ការជំរុញបញ្ចុះអត្រាការប្រាក់កម្ចីទិញផ្ទះ និងការបង្ការកុំឱ្យមានបញ្ហាកើតឡើងជាថ្មី ។
គួរបញ្ជាក់ថា នៅមុនវិបត្តិកូវីដ១៩ ស្ថានភាពវិស័យអចលនទ្រព្យនៅកម្ពុជាមានការកើនឡើងខ្ពស់ ហើយមានអ្នកចូលរួមវិនិយោគយ៉ាងទូលំទូលាយ ដើម្បីស្វែងរកប្រាក់ចំណេញ ។ ក្នុងអំឡុងពេលនោះ ក៏មានពលរដ្ឋដែលមានតម្រូវការលំនៅឋានជាច្រើនបាននាំគ្នាទិញគម្រោងលំនៅឋាន ឬដីឡូត៍ ដើម្បីសង់លំនៅឋាននាពេលបន្ទាប់ ។ ប៉ុន្តែក្រោយពេលវិបត្តិកូវីដ១៩ ក៏ចូលមកដល់ និងធ្វើឱ្យសេដ្ឋកិច្ចពិភពលោកមានភាពមិនច្បាស់លាស់ ដែលជំរុញឱ្យសេដ្ឋកិច្ចកម្ពុជាបានចាប់ផ្ដើមធ្លាក់ចុះ ធ្វើឱ្យក្រុមហ៊ុនអភិវឌ្ឍន៍ភាគច្រើនត្រូវរាំងស្ទះផ្នែកហិរញ្ញវត្ថុមិនអាចបន្តដំណើរការគម្រោងទៅមុខបាន ផ្គួបផ្សំនឹងអតិថិជនដែលទិញគម្រោងជាច្រើនបានបោះបង់ ទើបធ្វើឱ្យគម្រោងអភិវឌ្ឍន៍ជាប់គាំងចាប់តាំងពីពេលនោះមក។ យ៉ាងណាក៏ដោយ បច្ចុប្បន្ននេះ រាជរដ្ឋាភិបាលកម្ពុជា ដែលមានក្រសួងរៀបចំដែនដី នគរូបនីយកម្ម និងសំណង់ ជាសេនាធិការ បានព្យាយាមជួយដោះស្រាយបានជបន្តបន្ទាប់ និងកំពុងឈានទៅដល់ការបញ្ចប់វិវាទ ក៏ដូចជាបញ្ហាទាំងស្រុងនាពេលឆាប់ៗខាងមុខនេះ៕
Account
Security
Favourite Content