សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គណៈប្រតិភូសហព័ន្ធឧស្សាហកម្ម និងពាណិជ្ជកម្ម ខេត្តសានតុង នៃសាធារណៈរដ្ឋប្រជាមានិតចិន ដែលកំពុងធ្វើទស្សនកិច្ចនៅកម្ពុជា បានបង្ហាញពីការចាប់អារម្មណ៍ក្នុងការស្វែងរកឱកាសវិនិយោគលើវិស័យអាទិភាពមួយចំនួនដូចជា ថាមពលកកើតឡើងវិញ (Renewable Energy), ឧស្សាហកម្មកែច្នៃកសិផល, ការផលិតគ្រឿងបន្លាស់រថយន្ត, និងការអភិវឌ្ឍហេដ្ឋារចនាសម្ព័ន្ធ បច្ចេក វិទ្យាឌីជីថល ស្របតាមចក្ខុវិស័យរបស់រាជរដ្ឋាភិបាលកម្ពុជាអាណត្តិទី៧នៃរដ្ឋសភា។
នេះជាការការលើកឡើងរបស់លោក Yang Hongyu អនុប្រធានសហព័ន្ធឧស្សាហកម្ម និងពាណិជ្ជកម្ម ខេត្តសានតុង ក្នុងឱកាសដែលគណៈប្រតិភូរបស់លោកចូលជួបសម្តែងការគួរសម និងពិភាក្សាការងារជាមួយឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នារសៀលថ្ងៃ ទី១១ ខែធ្នូ ឆ្នាំ២០២៥ ដើម្បីស្វែងយល់កាន់តែច្បាស់អំពីសក្តានុពល និងឱកាសវិនិយោគនៅក្នុងព្រះរាជាណាចក្រកម្ពុជា។
លោក Yang បានឱ្យដឹងថា៖ សានតុង ជាខេត្តមួយដែលមានសេដ្ឋកិច្ចរឹងមាំ និងមានសក្ដានុពលខ្ពស់ផ្នែកឧស្សាហកម្មធុនធ្ងន់ ជាពិសេស បច្ចេកវិទ្យាជឿនលឿន និងកសិកម្មទំនើប។
ឯកឧត្តមឧបនាយករដ្ឋមន្ត្រី ស៊ុន ចាន់ថុល បានលើកឡើងអំពីភាពរឹងមាំនៃទំនាក់ទំនងមិត្តភាព និងកិច្ចសហប្រតិបត្តិការយុទ្ធសាស្ត្រនានារវាងកម្ពុជា-ចិន ដែលជាមូលដ្ឋានគ្រឹះដ៏សំខាន់សម្រាប់ការពង្រីកវិនិយោគ។
ជាមួយគ្នានេះ ឯកឧត្តមឧបនាយករដ្ឋមន្ត្រី បានធ្វើបទបង្ហាញលម្អិត និងស៊ីជម្រៅជូនគណៈប្រតិភូអំពីបរិយាកាសវិនិយោគដ៏ទាក់ទាញរបស់កម្ពុជា ក្រោមចំណុចគន្លឹះមួយចំនួន រួមមាន៖ (១)កិច្ចខិតខំប្រឹងប្រែងរបស់ប្រមុខរាជរដ្ឋាភិបាល ក្នុងការរក្សាសន្តិភាព និងស្ថិរភាពនយោបាយ, (២)ច្បាប់ស្តីពីវិនិយោគដែលផ្តល់នូវការលើកទឹកចិត្តជាអតិបរមា មានតម្លាភាព និងយន្តការសម្របសម្រួលវិនិយោគនានា, (៣)សក្តានុពលភូមិសាស្ត្រនយោបាយ ដែលកម្ពុជាជាសមាជិកអាស៊ាន និងជាច្រកតភ្ជាប់ដ៏សំខាន់ក្នុងតំបន់, (៤)មូលធនមនុស្សមានវ័យក្មេង ដែលងាយក្នុងការបណ្តុះបណ្តាល, (៥)លំនឹងម៉ាក្រូសេដ្ឋកិច្ច, (៦) កិច្ចព្រមព្រៀងពាណិជ្ជកម្មសេរីរួមមានកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA)ជាដើម, និង (៧)ការអភិវឌ្ឍហេដ្ឋារចនាសម្ព័ន្ធជាមួយនឹងគម្រោងធំៗដូចជា ផ្លូវល្បឿនលឿន កំពង់ផែទឹកជ្រៅ និងអាកាសយានដ្ឋានអន្តរជាតិថ្មី ដែលជួយសម្រួលដល់ការដឹកជញ្ជូន និងកាត់បន្ថយថ្លៃដើមប្រតិបត្តិការ។
បន្ថែមពីនោះ ឯកឧត្តមអនុប្រធានទី១ ក្រុមប្រឹក្សាអភិវឌ្ឍន៍កម្ពុជា ក៏បានរំលេចអំពីការណ៍ដែលកម្ពុជា គឺជាប្រទេសទី១ ក្នុងពិភពលោក ដែលបានចុះកិច្ចព្រមព្រៀងពាណិជ្ជកម្មបដិការជាផ្លូវការ ជាមួយសហរដ្ឋអាម៉េរិក ។នេះបង្ហាញពីភាពប្រាកដប្រជា និងបង្កើនទំនុកចិត្តសម្រាប់ការវិនិយោគ និងការនាំចេញទៅកាន់ទីផ្សារដ៏ធំរបស់អាម៉េរិកផងដែរ។
ឯកឧត្តមឧបនាយករដ្ឋមន្ត្រី បានបញ្ជាក់សារជាថ្មីពីការគាំទ្រ និងការសម្របសម្រួលយ៉ាងពេញទំហឹងដល់អ្នកវិនិយោគបរទេសពីសំណាក់ក្រុមប្រឹក្សាអភិវឌ្ឍន៍កម្ពុជា ដើម្បីឱ្យការបណ្តាក់ទុនរបស់ពួកគេនៅកម្ពុជាទទួលបានជោគជ័យ និងចូលរួមចំណែកក្នុងការជំរុញកំណើនសេដ្ឋកិច្ចជាតិប្រកបដោយចីរភាព និងបរិយាប័ន្ន៕
Account
Security
Favourite Content