សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតចាប់ពីខែមករាដល់ដំណាច់ខែវិច្ឆិកា ឆ្នាំ២០២៤ កម្ពុជាទទួលបានការវិនិយោគពីបណ្ដាប្រទេសជាច្រើនទាំងក្នុងតំបន់ និងនៅលើសកលលោក ប៉ុន្តែក្នុងចំណោមបណ្ដាប្រទេសទាំងនោះ មានវិនិយោគិនមកពីប្រទេសចំនួន៣ បានដាក់ទុនវិនិយោគនៅកម្ពុជាច្រើនជាងគេ។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានឱ្យដឹងថា ប្រទេសចំនួន៣ ដែលបានដាក់ទុនវិនិយោគនៅកម្ពុជាច្រើនជាងគេរួមមានប្រទេសចិន ជាប់ចំណាត់ថ្នាក់លេខ១ វិនិយោគិនក្នុងស្រុកដែលសំដៅដល់វិនិយោគិនកម្ពុជាខ្លួនឯងជាប់ចំណាត់ថ្នាក់លេខ២ និងវិនិយោគិនមកពីប្រទេសវៀតណាមជាប់ចំណាត់ថ្នាក់លេខ៣ ។
បើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានបង្ហាញថា រំហូរវិនិយោគផ្ទាល់ពីប្រទេសចិនមកបណ្តាក់ទុនលើទឹកដីកម្ពុជាតែងតែឈរនៅលំដាប់កំពូលជានិច្ចក្នុងរយៈពេល១ទសវត្សរ៍កន្លងមកនេះ។ ជាក់ស្តែង ក្នុងរយៈពេល១១ខែ នៃឆ្នាំ២០២៤ គម្រោងវិនិយោគចិននៅកម្ពុជាបានឈរនៅលំដាប់លេខរៀងទី១ ក្រោមទុនវិនិយោគសរុបប្រមាណ ៣,២១ពាន់លានដុល្លារអាម៉េរិក ។ ចំណែកវៀតណាមបានឈរនៅលំដាប់ទី៣ ដោយក្នុងរយៈពេល១១ខែឆ្នាំ ២០២៤កន្លងទៅនេះ បានបណ្ដាក់ទុនវិនិយោគនៅក្នុងប្រទេសកម្ពុជាក្នុងទំហំទឹកប្រាក់ចំនួន ៥៥៧លានដុល្លារអាមេរិក ។
ដោយឡែកវិនិយោគិនក្នុងស្រុកពោលគឺសំដៅលើវិនិយោគិនកម្ពុជា បានបណ្ដាក់ទុនវិនិយោគក្នុងទំហំទឹកប្រាក់ប្រមាណ ១ ៧៧៣លានដុល្លារអាមេរិកលើវិស័យសក្ដានុពល ដូចជា ហិរញ្ញវត្ថុ អចលនទ្រព្យ ឧស្សាហកម្ម កសិកម្ម និងទេសចរណ៍ ជាដើម ។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានធ្វើដំណើរទស្សនកិច្ចទៅកាន់ប្រទេសជាដៃគូរបស់កម្ពុជាដើម្បីទាក់ទាញវិនិយោគិនពីប្រទេសទាំងនោះចូលមកក្នុងប្រទេសកម្ពុជាបន្ថែម ។ ជាលទ្ធផលបានសង្កេតឃើញថា វិនិយោគិនក្នុងស្រុកដែលធ្វើដំណើរអម ឯកឧត្តមឧបនាយករដ្ឋមន្ត្រីទៅកាន់បណ្ដាប្រទេសទាំងនោះ បានទាក់ទាញការវិនិយោគពីប្រទេសទាំងនោះចូលមកកម្ពុជា និងបានចាប់ដៃគ្នាបង្កើតធុរកិច្ចមួយថ្មី បង្កើតការងារ និងប្រាក់ចំណូល ដ៏ដូចជាសេដ្ឋកិច្ចរបស់កម្ពុជាទាំងមូលផងដែរ ។
នៅក្នុងកិច្ចប្រជុំផ្លូវការលើកទី១ របស់ក្រុមប្រឹក្សាអភិវឌ្ឍន៍កម្ពុជាកាលពីចុងសប្ដាហ៍មុននេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានកោតសរសើរចំពោះថ្នាក់ដឹកនាំមន្ត្រីរាជការ មន្ត្រីកិច្ចសន្យា និងបុគ្គលិកស្ម័គ្រចិត្តទាំងអស់នៃក្រុមប្រឹក្សាអភិវឌ្ឍន៍កម្ពុជា ដែលបានខិតខំប្រឹងប្រែងយកអស់កម្លាំងកាយចិត្ត ឈានទៅសម្រេចបាននូវលទ្ធផលយ៉ាងល្អប្រសើរ ក្នុងការងារសម្របសម្រួលកិច្ចវិនិយោគឯកជន និងកិច្ចសហប្រតិបត្តិការនានាជាមួយដៃគូអភិវឌ្ឍន៍ក្នុងនីតិកាលទី៧នៃរដ្ឋសភា ។
សម្ដេចបានលើកឡើងអំពីការកែទម្រង់គួរឱ្យកត់សម្គាល់របស់រាជរដ្ឋាភិបាល និងបានបន្តយកចិត្តទុកដាក់លើវិស័យឯកជន ដែលជាតួអង្គសំខាន់ក្នុងការជំរុញកំណើនសេដ្ឋកិច្ចនៅកម្ពុជា ។ សម្ដេចក៏បានលើកឡើងផងដែរពីតួនាទីរបស់ក្រុមប្រឹក្សាអភិវឌ្ឍន៍កម្ពុជា ជាតួអង្គជួរមុខ ជួបផ្ទាល់ជាមួយវិនិយោគិន និងដៃគូអភិវឌ្ឍន៍ ដើម្បីផ្សព្វផ្សាយអំពីកាលានុវត្តភាពនិងភាពរីកចម្រើនរបស់កម្ពុជាលើគ្រប់វិស័យ ទៅកាន់ឆាកអន្តរជាតិ ។
សម្ដេចមានប្រសាសន៍ថា ការប្រែប្រួលយ៉ាងឆាប់រហ័សនៃស្ថានភាពភូមិសាស្ត្រនយោបាយពិភពលោក និងការប្រកួតប្រជែងនៅក្នុងតំបន់ ទាមទារឱ្យកម្ពុជាត្រូវត្រៀមលក្ខណៈឱ្យបានកាន់តែប្រសើរ ដែលមានភាពឆ្លើយតប និងភាពធន់ខ្ពស់ ទៅនឹងការផ្លាស់ប្តូរនិម្មាបនកម្មសេដ្ឋកិច្ច និងពាណិជ្ជកម្មសេដ្ឋកិច្ចនាពេលអនាគត ៕
Account
Security
Favourite Content