សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្រព័ន្ធធនាគារនៅកម្ពុជាបន្តរក្សាបានភាពធន់ ភាពរឹងមាំ និងជំនឿទុកចិត្តរបស់សាធារណជន ទាំងជាតិនិងអន្តរជាតិ តាមរយៈកិច្ចខិតខំប្រឹងប្រែងរបស់ធនាគារជាតិនៃកម្ពុជា ក្នុងការចូលរួមចំណែកជាមួយ រាជរដ្ឋាភិបាល ដើម្បីដាក់ចេញនូវវិធានការចាំបាច់ជាបន្តបន្ទាប់ ធានាទប់ស្កាត់ និងកាត់បន្ថយឱ្យបានជាអតិបរមានូវផលប៉ះពាល់នានា។
យោងតាមរបាយការណ៍ត្រួតពិនិត្យប្រចាំឆ្នាំ២០២២ របស់ធនាគារជាតិនៃកម្ពុជា ប្រព័ន្ធធនាគារនៅកម្ពុជា រួមមាន ធនាគារពាណិជ្ជ ៥៨ ធនាគារឯកទេស ៩ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ ៥ គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើ ៨២ គ្រឹះស្ថានភតិសន្យាហិរញ្ញវត្ថុ ១៦ គ្រឹះស្ថានឥណទានជនបទ ២២៣ អ្នកដំណើរការតតិយភាគី ៦ គ្រឹះស្ថានផ្តល់សេវាទូទាត់សងប្រាក់ ៣៥ ក្រុមហ៊ុនចែករំលែកព័ត៌មានឥណទាន ១ ការិយាល័យតំណាងធនាគារបរទេស ៦ និងអាជីវកម្មប្តូរប្រាក់ ២ ៨៦៦។
ប្រព័ន្ធធនាគារនៅកម្ពុជា នៅតែបន្តមានវឌ្ឍនភាព ទទួលបានជំនឿទុកចិត្តពីសាធារណជន និងចូលរួមយ៉ាងសកម្មក្នុងការជំរុញសកម្មភាពសេដ្ឋកិច្ចនានា។ ទ្រព្យសកម្មរបស់ប្រព័ន្ធធនាគារមានកំណើន ១២,៦% ដល់ ៣១៩,២ ទីលានរៀល (៧៧,៥ ពាន់លានដុល្លារអាមេរិក) ក្នុងនោះឥណទានអតិថិជនបានកើនឡើង ១៨,៩% ដល់ ២២៦,៧ ទ្រីលានរៀល (៥៥,១ ពាន់លានដុល្លារអាមេរិក)។ ជាមួយគ្នានេះ ប្រាក់បញ្ញើអតិថិជនមានកំណើន ៩,២% ដល់ ១៧៤,៤ ទ្រីលានរៀល (៤២,៤ ពាន់លានដុល្លារអាមេរិក) និងដើមទុនមានកំណើន ១៣,៩% ដល់ ៦៣,៣ ទ្រីលានរៀល (១៥,៤ ពាន់លានដុល្លារអាមេរិក)។
ប្រតិបត្តិការរបស់គ្រឹះស្ថានធនាគារ និងហិរញ្ញវត្ថុបានកើនឡើងជាបន្តបន្ទាប់ ដែលឆ្លុះបញ្ចាំងតាមរយៈកំណើននៃឥណទាននិងប្រាក់បញ្ញើ ដោយក្នុងនោះ ចំនួនគណនីប្រាក់បញ្ញើអតិថិជន និងគណនីឥណទានអតិថិជនកើនឡើងដល់ ១៥,៥ លានគណនី និង ៣,៨ លានគណនី រៀងគ្នា។ បណ្តាញប្រតិបត្តិការធនាគារ និងហិរញ្ញវត្ថុ ត្រូវបានពង្រីកដល់ ២ ៧០២ ទីតាំង ហើយចំនួនម៉ាស៊ីនដកនិង ដាក់ប្រាក់ស្វ័យប្រវត្តិ (ATM) បានកើនដល់ ៤ ៥២៤ និងម៉ាស៊ីន POS កើនដល់ ៣០ ០៣១ ដែលធ្វើឱ្យការប្រើប្រាស់សេវាហិរញ្ញវត្ថុកាន់តែមានភាពងាយស្រួល និងទូលំទូលាយជាងមុន។
ធនាគារជាតិនៃកម្ពុជាបន្តលើកទឹកចិត្តដល់គ្រឹះស្ថានធនាគារនិងហិរញ្ញវត្ថុ ក្នុងការជួយសម្រាលបន្ទុកដល់ប្រជាពលរដ្ឋ ដែលរងផលប៉ះពាល់ពីជំងឺកូវីដ-១៩ និងគ្រោះទឹកជំនន់។ គ្រឹះស្ថានធនាគារ និងហិរញ្ញវត្ថុបានផ្តល់ការអនុគ្រោះដល់អ្នកខ្ចីប្រាក់ តាមរយៈការរៀបចំឥណទានឡើងវិញចំនួន ១៦៣ ៤៦៤ គណនី ស្មើនឹងប្រមាណ ៣ ពាន់លានដុល្លារអាមេរិក (ប្រមាណ ៥,៥% នៃឥណទានអតិថិជន សរុប)។ ប្រព័ន្ធទូទាត់សងប្រាក់នៅកម្ពុជា បាននិងកំពុងបន្តរីកចម្រើននិងធ្វើទំនើបកម្មឱ្យកាន់តែមានប្រសិទ្ធភាព សុវត្ថិភាព និងតម្លៃសមរម្យ ដែលបានជំរុញឱ្យមាននិន្នាការកើនឡើងនៃការទូទាត់តាម ប្រព័ន្ធឌីជីថល ដូចជា បណ្ណឥណពន្ធនិងបណ្ណឥណទាន សេវាផ្ទេរប្រាក់ និងសេវាទូទាត់សងប្រាក់តាមអេឡិចត្រូនិក ជាដើម។
ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា បានថ្លែងថា សេដ្ឋកិច្ចពិភពលោកនៅតែបន្តប្រឈមនឹងឥទ្ធិពលនៃសង្គ្រាមរុស្ស៊ី- អ៊ុយក្រែន ការរឹតត្បិតនៃស្ថានភាពហិរញ្ញវត្ថុអន្តរជាតិ ការបន្តអនុវត្តវិធានការ គ្មានកូវីដក្នុងប្រទេសចិន (Zero Covid Policy) ក៏ដូចជាភាពមិនប្រាកដប្រជា នៃជំងឺកូវីដ-១៩។
ឯកឧត្តមបានបន្តថា មូលនិធិរូបិយវត្ថុអន្តរជាតិ (IMF) បានព្យាករថា សេដ្ឋកិច្ចពិភពលោកនឹងមានកំណើនទាបក្នុងអត្រា ៣,២% នៅឆ្នាំ ២០២២ ដោយ ក្នុងនោះ សេដ្ឋកិច្ចប្រទេសអភិវឌ្ឍន៍មានកំណើន ២,៤% សេដ្ឋកិច្ចប្រទេស កំពុងលូតលាស់និងកំពុងអភិវឌ្ឍន៍មានកំណើន ៣,៧% និងសេដ្ឋកិច្ចអាស៊ាន មានកំណើន ៥,២% ក្នុងឆ្នាំ២០២២។
ឯកឧត្តម ជា ចាន់តូ បានលើកឡើងដូច្នេះថា ៖
“ចំណែកនៅកម្ពុជា កំណើនសេដ្ឋកិច្ចត្រូវបានប៉ាន់ស្មានថាមានកម្រិត ៥,១% ក្នុងឆ្នាំ២០២២ និងបន្តកើនឡើងក្នុងរង្វង់ ៦% សម្រាប់ឆ្នាំ ២០២៣។ ការសម្រេចបាននូវកំណើននេះគឺដោយសារកត្តាសុខសន្តិភាព ស្ថិរភាពនយោបាយ និងស្ថិរភាពម៉ាក្រូសេដ្ឋកិច្ច ក្រោមការដឹកនាំប្រកប ដោយភាពឈ្លាសវៃ បត់បែន និងចក្ខុវិស័យវែងឆ្ងាយរបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលជាមូលដ្ឋានគ្រឹះដ៏សំខាន់ក្នុងការជំរុញ ឱ្យមានការអភិវឌ្ឍលើគ្រប់វិស័យ”
ឯកឧត្តម បានបន្តថា ក្នុងនាមជាអាជ្ញាធរត្រួតពិនិត្យគ្រឹះស្ថានធនាគារនិងហិរញ្ញវត្ថុ ធនាគារជាតិនៃកម្ពុជា បន្តចូលរួមយ៉ាងសកម្មក្នុងការគាំទ្រគោលនយោបាយ ដែលបានដាក់ចេញដោយ រាជរដ្ឋាភិបាល សំដៅរក្សាបាននូវស្ថិរភាពហិរញ្ញវត្ថុ និងកំណើនសេដ្ឋកិច្ចប្រកបដោយចីរភាព និងបរិយាបន្ន៕
Account
Security
Favourite Content