សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលកម្ពុជាបានផ្ដោតការយកចិត្តទុកដាក់លើការអភិវឌ្ឍ និងវិនិយោគលើហេដ្ឋារចនាសម្ព័ន្ធ ហើយជាលទ្ធផលការវិនិយោគលើហេដ្ឋារចនាសម្ព័ន្ធក្នុងប្រទេសកម្ពុជា នាឆ្នាំ២០២៣កន្លងមកនេះ មានទឹកប្រាក់ច្រើនជាងគេ។ ជាក់ស្ដែងគម្រោងវិនិយោគលើហេដ្ឋារចនាសម្ព័ន្ធចំនួន៦ប៉ុណ្ណោះ មានទុនវិនិយោគដល់ទៅ ២,១ពាន់លានដុល្លារអាមេិរក។ នេះបើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាចេញផ្សាយនៅថ្ងៃទី០៣ ខែមករា ឆ្នាំ២០២៤ ។
តាមរបាយការណ៍បានបង្ហាញឱ្យឃើញថា គម្រោងវិនិយោគសាងសង់ផ្លូវល្បឿនលឿនភ្នំពេញ-បាវិត ជាគម្រោងដែលមានទុនវិនិយោគច្រើនជាងគេ រហូតដល់ ១,៤ ពាន់លានដុល្លារអាមេរិក ។ គម្រោងដែលមានទឹកប្រាក់ច្រើនបន្ទាប់ ជាគម្រោងសាងសង់វារីអគ្គិសនីស្ទឹង ឬស្សីជ្រុំកណ្ដាល នៅស្រុកមណ្ឌលសីមា និងគម្រោងសាងសង់វារីអគ្គិសនីវាលថ្មកំបុត ក្នុងស្រុកថ្មបាំង ខេត្តកោះកុង មានទឹកប្រាក់វិនិយោគប្រមាណ ៤៤៧លានដុល្លារអាមេរិក ។
ក្រៅពីនេះមានគម្រោងអភិវឌ្ឍន៍ស្ថានីយ៍ផលិតអគ្គិសនីដើរដោយថាមពលពន្លឺព្រះអាទិត្យ ក្នុងស្រុកក្រគរ ខេត្តពោធិ៍សាត់ មានទឹកប្រាក់វិនិយោគ ១៦៣,៨លានដុល្លារអាមេរិក គម្រោងអភិវឌ្ឍន៍អនុស្ថានីយ៍ និងខ្សែបញ្ជូនថាមពលអគ្គិសនីតង់ស្យុងខ្ពស់ពីខេត្តកំពង់ចាមទៅខេត្តក្រចេះ មានទុនវិនិយោគប្រមាណ៩១,២លានដុល្លារអាមេរិក ។ គម្រោងអភិវឌ្ឍន៍ស្ថានីយ៍ ផលិតអគ្គិសនីដើរដោយថាមពលពន្លឺព្រះអាទិត្យអានុភាព ៦០មេហ្គាវ៉ាត់ ស្ថិតនៅខេត្តស្វាយរៀងមានទុនវិនិយោគប្រមាណ ៦៥,៥លានដុល្លារអាមេរិក និងគម្រោងបង្កើត និងធ្វើអាជីវកម្មមជ្ឈ្មមណ្ឌលទិន្នន័យ ស្ថិតនៅក្នុងខណ្ឌចំការមន រាជធានីភ្នំពេញមានទុនវិនិយោគប្រមាណ២៧លានដុល្លារអាមេរិក ។
គម្រោងវិនិយោគលើហេដ្ឋារចនាសម្ព័ន្ធទាំងនេះ គឺជាការវិនិយោគពីវិស័យឯកជនដោយមិនទាន់បូកបញ្ចូលគម្រោងដែលចំណាយថវិការបស់រដ្ឋនៅឡើយ ដូចជាគម្រោងស្ពានឆ្លងទន្លេពីផ្លូវជាតិលេខ១ ទៅស្រុកល្វាឯមតភ្ជាប់ផ្លូវល្បឿនលឿនភ្នំពេញ-បាវិត ដែលត្រូវចំណាយថវិកាប្រមាណជាង២០០លានដុល្លារអាមេរិក និងគម្រោងវិនិយោគលើផ្លូវសំខាន់ៗផ្សេងទៀតក្នុងប្រទេសកម្ពុជា។
បើតាមគម្រោងរបស់រាជរដ្ឋាភិបាល ក្នុងឆ្នាំ២០២៤នេះ រដ្ឋាភិបាលគ្រោងនឹងវិនិយោគលើហេដ្ឋារចនាសម្ព័ន្ធ ទាំងនៅក្នុងរាជធានីភ្នំពេញ និងតាមបណ្ដាខេត្តនានាជាច្រើនទៀត ដោយគ្រោងនឹងចំណាយថវិការាប់រយលានដុល្លារអាមេរិកផងដែរ ៕
Account
Security
Favourite Content