សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ បានដាក់បញ្ចូលសេវាសាធារណៈតាមប្រព័ន្ធអនឡាញយ៉ាងសម្បូរបែប ដើម្បីផ្តល់ភាពងាយស្រួលដល់សាធារណជន និងម្ចាស់កម្មសិទ្ធិអាចឆែកមើលសេវាផ្សេងៗដែលមាននៅក្នុងប្រព័ន្ធ។ នៅថ្ងៃនេះ ពី AMS Economy នឹងបង្ហាញពីរបៀបនៃការប្រើប្រាស់សេវាសាធារណៈតាមប្រព័ន្ធអនឡាញរបស់ក្រសួងរៀបចំដែនដី នគរូបនីយកម្ម និងសំណង់ ជូនសាធារណៈជនឱ្យបានដឹងដើម្បីងាយស្រួលក្នុងការចូលទៅប្រើប្រាស់ដោយផ្ទាល់។
ដើម្បីអាចចូលទៅប្រើប្រាស់សេវាសាធារណៈរបស់ក្រសួងរៀបចំដែនដី នគរូបនីយកម្ម និងសំណង់ តាមប្រព័ន្ធអនឡាញបាន លោកអ្នកត្រូវបង្កើតគណនីមួយជាមុនសិន ដោយបំពេញលេខអត្តសញ្ញាបណ្ណ លេខទូរសព្ទ ឈ្មោះអ្នកប្រើប្រាស់ និងថតរូបអត្តសញ្ញាបណ្ណ រួចបង្កើតលេខកូដសម្ងាត់ជាការស្រេច ។
នៅពេលបង្កើតគណនីប្រើប្រាស់បានរួចហើយ លោកអ្នកអាចចូលទៅប្រើប្រាស់សាធារណៈតាមអនឡាញរបស់ក្រសួងរៀបចំដែនដី នគរូបនីយកម្ម និងសំណង់បានហើយ ដោយនៅក្នុងនោះរួមមានសេវាជាច្រើន ដូចជា សេវាសុរិយោដីតាមប្រព័ន្ធអេឡិចត្រូនិក សេវាសំណង់តាមប្រព័ន្ធអេឡិចត្រូនិក សេវាហ៊ីប៉ូតែក និងបញ្ចាំ សេវាលក់ និងអំណោយផ្ដាច់ ជាដើម ។
សូមលើកឧទាហរណ៍មួយមកបញ្ជាក់ទាក់ទិននឹងការប្រើប្រាស់សេវាសុរិយោដីតាមប្រព័ន្ធអេឡិចត្រូនិក ។ សេវានេះ លោកអ្នកអាចមើលព័ត៌មានអំពីក្បាលដី ដូចជា ទីតាំង ទំហំ និងកម្មសិទ្ធិករជាដើម ដើម្បីផ្ទៀងផ្ទាត់ជាមួយព័ត៌មាននៅលើក្រដាស់ប្លង់រឹង ។ ការឆែកមើលព័ត៌មាននេះ គឺដើម្បីប្រាកដថាព័ត៌មាននៅលើប្លង់រឹង គឺដូចគ្នានឹងព័ត៌មានដែលមាននៅក្នុងទិន្នន័យរបស់ក្រសួងរៀបចំដែនដី នគរូបនីយកម្ម និងសំណង់ ហើយអាចជៀសវាងនូវហានិភ័យទិញដី ឬអចលនវត្ថុដែលមានឈ្មោះពីរផ្សេងគ្នា ។
ជាមួយគ្នានេះ ការចូលទៅមើលព័ត៌មានលម្អិតនេះគឺមានភាពងាយស្រួល ដោយគ្រាន់តែបំពេញលេខវិញ្ញាបនបត្រសម្គាល់ម្ចាស់អចលនវត្ថុ និងលេខកូដសុវត្ថិភាព ដែលមានផ្ដល់ជូននៅទីនោះស្រាប់ ។ វិធីងាយស្រួលមួយទៀត លោកអ្នកគ្រាន់តែស្កែន QR Code ដែលមានភ្ជាប់នៅលើក្រដាសប្លង់រឹងនោះនឹងឃើញព័ត៌មានលម្អិតអំពីក្បាលដីនោះដើម្បីផ្ទៀងផ្ទាត់លើក្រដាសប្លង់រឹង ។
ក្រៅពីសេវាចូលពិនិត្យមើលព័ត៌មានអំពីក្បាលដីនេះហើយ លោកអ្នកក៏អាចប្រើប្រាស់សេវាសាធារណៈជាច្រើនទៀតរបស់ក្រសួងរៀបចំដែនដី នគរូបនីយកម្ម និងសំណង់ ដែលបានដាក់បញ្ចូលក្នុងប្រព័ន្ធនោះយ៉ាងងាយស្រួល និងអាចកាត់បន្ថយភាពស្មុគស្មាញបានមួយកម្រិតផងដែរ ។
គួររម្លឹកថា ក្រសួងរៀបចំដែនដី នគរូបនីយកម្ម និងសំណង់ បាន និងកំពុងធ្វើឌីជីថលូបនីយកម្មលើរបៀបរស់នៅប្រចាំថ្ងៃ និងវិធីសាស្ត្រក្នុងការផ្ដល់សេវាកម្មសម្រាប់ប្រជាជនកម្ពុជាឱ្យកាន់តែឆាប់រហ័ស ងាយស្រួល កាត់បន្ថយពេលវេលា ប្រកបដោយសុវត្ថិភាព និងកក់ក្ដៅ ។ ជាមួយនឹងការធ្វើឌីជីថលូបនីយកម្មលើប្រតិបត្តិការការងារ និងអាចបង្កើនផលិតភាពថ្មី ដើម្បីជួយសម្រួលដល់ការធ្វើប្រតិបត្តិការ កាត់បន្ថយការចំណាយ បង្កើនប្រសិទ្ធភាព និងសុវត្ថិភាព របស់កក្រសួងរៀបចំដែនដី នគរូបនីយកម្ម និងសំណង់ គឺពិតជាអាចធានាបាននូវបរិយាសសុវត្ថិភាពទាំងផ្នែកនយោបាយ និងសន្តិសុខសេដ្ឋកិច្ចបានយ៉ាងប្រាកដ៕
Account
Security
Favourite Content