សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ឯកឧត្តម ឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានជំរុញគណៈកម្មាធិការជាតិគ្រប់គ្រងតំបន់ឆ្នេរសមុទ្រកម្ពុជា បែងចែក និងកំណត់សក្ដានុពលដីនៅតំបន់ឆ្នេរ ដើម្បីបង្កលក្ខណៈងាយស្រួលសម្រាប់វិនិយោគិនក្នុងការស្វែងរកការវិនិយោគនានា ។
ឯកឧត្តមបានមានប្រសាសន៍ថា ការរៀបចំ និងបែងចែកដី ដូចជាតំបន់លំនៅឋាន តំបន់លម្ហែ និងតំបន់ពាណិជ្ជកម្មជាដើម គឺបង្កលក្ខណៈងាយស្រួលដល់វិនិយោគិនដែលចូលទៅតំបន់នោះ តួយ៉ាងអ្នកវិនិយោគដែលចូលទៅកាន់តំបន់ឆ្នេរ ហើយចង់វិនិយោគសណ្ឋាគារ គឺមានតំបន់មួយសម្រាប់ឱ្យគាត់វិនិយោគ ឬអ្នកវិនិយោគចង់វិនិយោគលើបុរី គឺមានតំបន់លំនៅឋានសម្រាប់ឱ្យវិនិយោគិនពិចារណាក្នុងការបណ្ដាក់ទុនវិនិយោគ ។
ឯកឧត្តម គួច ចំរើន អភិបាលខេត្តព្រះសីហនុធ្លាប់បានលើកឡើងថា ការរៀបចំ និងបែងចែកដីទៅតាមសក្ដានុពលនីមួយៗ គឺពិតជាផ្តល់ភាពងាយស្រួលដល់អ្នកវិនិយោគមកពីក្រៅប្រទេស និងអ្នកវិនិយោគនៅក្នុងប្រទេសកម្ពុជាផងដែរ ។
បើតាមឯកឧត្តមអភិបាលខេត្តបានបង្ហាញថា បច្ចុប្បន្ន រដ្ឋបាលខេត្តព្រះសីហនុ បានចូលរួមយ៉ាងសកម្មក្រោមការចង្អុលបង្ហាញពីគណៈកម្មាធិការសម្របសម្រួលអន្តរក្រសួងរៀបចំផែនការមេ ដើម្បីអភិវឌ្ឍខេត្តព្រះសីហនុទៅជាតំបន់សេដ្ឋកិច្ចគំរូពហុបំណង ដោយបានសិក្សាបែងចែកជាតំបន់លំនៅឋាន ពាណិជ្ចកម្ម ឧស្សាហកម្ម រដ្ឋបាល ហិរញ្ញវត្ថុ ទេសចរណ៍ តំបន់សាសនា និងវប្បធម៌ជាដើម ។
ឯកឧត្តមបញ្ជាក់ថា ការគ្រប់គ្រងការប្រើប្រាស់ដីធ្លី ការបែងចែកដីធ្លី ការអភិវឌ្ឍដែនដី និងនគរូបនីយកម្ម ព្រមទាំងការរៀបចំគោលនយោបាយនានា ដើម្បីអភិវឌ្ឍន៍ខេត្តព្រះសីហនុ និងឧត្តមភាព នវានុវត្តន៍ខ្ពស់សំដៅរួមចំណែកប្រែក្លាយកម្ពុជាទៅជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានប្រាក់ចំណូលខ្ពស់នៅឆ្នាំ២០៥០ ។
យោងតាមគណៈកម្មាធិការគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា បានឱ្យដឹងថា ប្រទេសកម្ពុជាមានឆ្នេរសមុទ្រលាតសន្ធឹងប្រវែង ៤៤០ គីឡូម៉ែត្រ ដោយរាប់បញ្ចូលខេត្តចំនួន ៤ រួមមាន ខេត្តព្រះសីហនុ ខេត្តកោះកុង ខេត្តកំពត និងខេត្តកែប។ ឆ្នេរសមុទ្រ គឺជាស្នូលនៃតំបន់សមុទ្រកម្ពុជា ក្នុងចំណោមឆ្នេរខ្សាច់សរុប ៤៨ កន្លែង មានឆ្នេរខ្សាច់ចំនួន ១៦ កន្លែង បានចូលរួមប្រឡងប្រណាំងឆ្នេរខ្សាច់កម្សាន្តស្អាត ដោយក្នុងនោះមានឆ្នេរខ្សាច់ខេត្តកោះកុងចំនួន ២ និងខេត្តព្រះសីហនុចំនួន ៨ ខេត្តកែបចំនួន ៦ ហើយឆ្នេរខ្សាច់ទទួលជ័យលាភីមានចំនួន ១០ ឆ្នេរ ។ ធនធានសមុទ្រយ៉ាងច្រើនអនេក ដែលមាននៅតាមតំបន់មាត់សមុទ្រ និងកោះនានា ជាពិសេសនៅក្នុងខេត្តព្រះសីហនុ ដែលគេឃើញមានឆ្នេរសមុទ្រស្អាតៗ ទឹកសមុទ្រខៀវស្រងាត់ ទេសភាពស្រស់បំព្រង ត្រីសមុទ្រតូចធំ និងផ្កាថ្ម រួមជាមួយនឹងហេដ្ឋារចនាសម្ព័ន្ធទ្រទ្រង់ថ្មីៗជាច្រើន ៕
Account
Security
Favourite Content