សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ទុរេន ជាប្រភេទផ្លែឈើដែលមានភាពល្បីល្បាញ រសជាតិផ្អែមឆ្ញាញ់ ក្លិនក្រអូបឈ្ងុយ ជាពិសេសទុរេនដែលមានប្រភពមកពីទឹកដីស្រុកស្ទឹងត្រង់ ខេត្តកំពង់ចាម ឬគេស្គាល់ថាជា «ទុរេនបែកអន្លង់» ដែលមានមនុស្សនិយមចូលចិត្តបរិភោគច្រើនក្នុងមួយឆ្នាំៗ។
លោក ស ស្រ៊ី ជាម្ចាស់ចំការទុរេនមួយស្ថិតនៅក្នុងតំបន់បែកអន្លង់ មានផ្ទៃដីដាំដុះប្រមាណ ៧ហិកតា ហើយជាមធ្យមអាចប្រមូលទិន្នផលបានរហូតដល់ ៥០តោន ក្នុងមួយឆ្នាំ និងមិនសូវមានបញ្ហាក្នុងការស្វែងរកទីផ្សារលក់នោះឡើយ ថ្វីបើលោកមានភ្ញៀវទៅទិញដល់ចំការផ្ទាល់តែម្ដង។
ដោយឡែកសម្រាប់ឆ្នាំនេះវិញ ការលក់របស់លោកកាន់តែកើនឡើងមួយកម្រិតទៀត ដែលការកើនឡើងនេះដោយសារតែទីផ្សារមានតម្រូវការច្រើន។
ម្ចាស់ចំការទុរេនដែលមានបទពិសោធន៍ដាំដុះជាង ២០ឆ្នាំរូបនេះ បានឱ្យដឹងទៀតថា ឆ្នាំនេះលក់បានក្នុងតម្លៃល្អបើប្រៀបធៀបទៅនឹងឆ្នាំមុន ដោយសារតែមានអ្នកស្គាល់ទុរេនបែកអន្លង់កាន់តែច្រើន។
លោក ស ស្រ៊ី បន្តថា ៖
“ឆ្នាំនេះអាចលក់បានមួយគីឡូ ១ម៉ឺន៧ពាន់ ទៅដល់១ម៉ឺន៩ពាន់ បើឆ្នាំមុនខែដែលមានទុរេនច្រើន តម្លៃធ្លាក់សល់តែ ១ម៉ឺន២ពាន់ទេ។ អ្វីដែលកាន់តែពិសេសគឺឆ្នាំនេះអតិថិជនដែលទៅទិញដល់ចំការមិនត្រឹមតែជាជនជាតិខ្មែរនោះទេ តែក៏មានជនជាតិថៃ និងចិនផងដែរ។”
បើតាមការរៀបរាប់របស់លោក ស ស្រ៊ី បានឱ្យដឹងថា ភ្ញៀវក្រៅស្រុកទាំងនោះបានចូលទៅសាកសួរពីទំហំនៃការដាំដុះរបស់លោក ក្នុងន័យវាស់ស្ទង់ចង់នាំចេញ ដែលលោកក្នុងនាមជាម្ចាស់ចំការផ្ទាល់ក៏កំពុងពិនិត្យមើលលទ្ធភាពសម្រាប់ការនាំចេញទៅក្រៅប្រទេសផងដែរ។
ជុំវិញទីផ្សារទុរេនឆ្នាំនេះ លោក ប៊ុន នាង ទីប្រឹក្សាឯកឧត្តមឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទបានឱ្យដឹងថា ទីផ្សារទុរេនឆ្នាំនេះមានភាពប្រសើរឡើងជាងឆ្នាំមុន ដោយតម្លៃដែលលក់ចេញពីចំការគឺក្នុងចន្លោះពី ១ម៉ឺន៥ពាន់ ទៅ ១ម៉ឺន៩ពាន់ ក្នុងមួយគីឡូក្រាម។
លោកបានគូសបញ្ជាក់ឱ្យដឹងថា ឆ្នាំនេះកម្ពុជាបាននាំចេញទុរេនទៅប្រទេសជិតខាងច្រើនជាងឆ្នាំមុនៗ និងទទួលបានចំណូលក្នុងរង្វង់ ២លានដុល្លារផងដែរ។ ដោយឡែក ការលក់នៅក្នុងស្រុករកចំណូលបានប្រមាណជាជាង ១០លានដុល្លារផងដែរ៕
Account
Security
Favourite Content