សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងរយៈពេលប៉ុន្មានឆ្នាំចុងក្រោយនេះ ជាពិសេសនៅក្នុងឆ្នាំ២០២៣កន្លងទៅ ដីទំនេរៗជាច្រើនកន្លែង ទាំងនៅកណ្ដាលក្រុង និងជាយក្រុង ត្រូវបានម្ចាស់ដីរៀបចំ និងបង្កើតជាផ្សាររាត្រី ដើម្បីរកចំណូលពីអាជីវកម្មជួលតូបទៅដល់អាជីករក្នុងពេលដែលដីទាំងនោះមិនទាន់មានតម្រូវការអភិវឌ្ឍជាអគារ ឬសំណង់ផ្សេងៗ។
បើតាមការសង្កេតជាក់ស្ដែង ដីទំនេរដែលមានទំហំធំៗចាប់ពី១ហិកតាឡើងទៅត្រូវបានគេរៀបចំបង្កើតជាផ្សាររាត្រីសម្រាប់ជាទីកម្សាន្តរបស់ប្រជាពលរដ្ឋរស់នៅរាជធានីភ្នំពេញ ជាកន្លែងលក់អាហារ សម្លៀកបំពាក់ និងសម្ភារៈផ្សេងៗនៅពេលរាត្រី ដោយក្នុងនោះនៅរយៈពេលប៉ុន្មានឆ្នាំកន្លងមកនេះ កំណើនផ្សាររាត្រីនៅក្នុងរាជធានីភ្នំពេញ និងជាយរាជធានីភ្នំពេញកកើតឡើងកាន់តែច្រើន និងមានសកម្មភាពមមាញឹកគួរឱ្យកត់សម្គាល់ផងដែរ ។
អ្នកនាង គឹម គិនកេសា អគ្គនាយិការរងនៃក្រុមហ៊ុន CBRE Cambodia បានលើកឡើងថា ក្នុងពេលដែលស្ថានភាពនៃការអភិវឌ្ឍនៅក្នុងប្រទេសមិនទាន់មានភាពល្អប្រសើរដូចកាលពីមុនកូវីដ ១៩ អ្នកមានដីទំនេរមិនគួរទុកដីចោលនោះទេ ពួកគាត់អាចកែច្នៃដីទំនេរៗទាំងនោះរកចំណូលបានត្រលប់មកវិញខ្លះ ។
អ្នកនាងបានជំរុញឱ្យម្ចាស់ដីទាំងនោះ កែច្នៃដីដូចជាជួលកក្នុងរយៈពេលខ្លីណាមួយ ឬបើសិនជាដីអាចធ្វើកសិកម្ម គួរតែធ្វើកសិកម្មដើម្បីបង្កបង្កើនផល រកផលកម្រៃមួយរយៈសិន ប្រសើរជាងទុកចោលមុននឹងមានការអភិវឌ្ឍសាងសង់អ្វីមួយ ។
លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance Real Estate បានឱ្យដឹងផងដែរថា កាលពីប៉ុន្មានមុននោះ ផ្សាររាត្រីនៅរាជធានីភ្នំពេញបានកកើតមានច្រើន ហើយក្រោយមកនៅពេលដីទីតាំងផ្សាររាត្រីនោះឡើងថ្លៃ គេឃើញថាម្ចាស់ទីតាំងក៏បានបញ្ចប់កុងត្រា ហើយយកដីនោះទៅសាងសង់ជាអគារ ឬក៏សំណង់អ្វីផ្សេងដែលអាចរកប្រាក់ចំណេញបានខ្ពស់ជាង ។ ដោយឡែកសម្រាប់និន្នាការនៃផ្សាររាត្រីនៅពេលបច្ចុប្បន្ននេះ ក៏អាចនឹងដូចពេលមុនដែរ នៅពេលដែលទីតាំងដីនោះមិនទាន់មានតម្រូវការ ម្ចាស់ទីតាំងក៏បានកែច្នៃដីនោះសម្រាប់ជួលឱ្យអាជីវករលក់ដូរនៅពេលយប់ធ្វើជាផ្សាររាត្រី ។
លោកបន្តថា ការធ្វើដូចនេះ ក៏បានជួយអាជីវកររកស៊ីក្រៅប្រព័ន្ធមួយកម្រិតផងដែរ ដោយសារតែអ្នកខ្លះអត់មានលទ្ធភាពជួលផ្ទះ ឬជួលទីតាំងធំៗ ដូច្នេះពួកគាត់អាចមកជួលតួបនៅផ្សាររាត្រីតម្លៃត្រឹមជុំវិញ១០០ដុល្លារអាមេរិកក្នុងមួយខែ និងមានសកម្មភាពមនុស្សម្នាដើរកម្សាន្តច្រើនផងដែរ ។
លោក ប៉ូ អ៊ាវគង់បានបញ្ជាក់ផងដែរថា ទីតាំងផ្សារដែលមានអាយុកាលយូរជាងគេនៅភ្នំពេញមានតែផ្សាររាត្រីមាត់ទន្លេ ឬហៅផ្សាររាត្រីរាជធានីភ្នំពេញ នៅជាប់នឹងផ្សារចាស់នោះទេ ក្រៅពីនោះមានអាយុកាលចន្លោះពី២ ទៅ ៥ឆ្នាំ នឹងត្រូវរុះរើយកដីសម្រាប់អភិវឌ្ឍន៍ ហើយអាជីវករនៅក្នុងផ្សាររាត្រីនោះក៏ត្រូវរុះរើទៅកាន់ទីតាំងថ្មីជាបន្តបន្ទាប់ ៕
Account
Security
Favourite Content