សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប ៖ អតីតពលករខ្មែរដែលធ្លាប់បម្រើការងារ និងវិលត្រឡប់មកពីប្រទេសថៃវិញនោះ បានយកជំនាញ និងបទពិសោធការងាររបស់ខ្លួនមកបង្កើតជាសិប្បកម្មខ្នាតតូចមួយដោយយកស្បែកគោមកកែច្នៃ និងផលិតចេញជាស្បែកជើងបុរស កាបូកនារី ក៏ដូចជាវត្ថុអនុស្សាវរីយ៍ជាច្រើនប្រភេទ និងស្រស់ស្អាត ដាក់លក់នៅក្នុងតំបន់ ក៏ដូចជាក្នុងស្រុក ដែលកំពុងទទួលបានការគាំទ្រគួរសមពីសំណាក់អ្នកប្រើប្រាស់ដែលជាជនជាតិខ្មែរ និងបរទេសមួយចំនួនផងដែរ។
លោក កែន នី ជាអតីតពលករខ្មែរ ធ្លាបបម្រើការងារនៅស្រុកថៃម្នាក់ក្នុងចំណោម៤នាក់ ដែលជាស្ថាបនិកបង្កើតសិប្បកម្មផលិតកាបូប និងស្បែកជើងស្បែក ដែលមានយីហោរថា ពេជ្រ សុវណ្ណ បានឱ្យដឹងថា មុននឹងចាប់ផ្តើមអាជីវកម្មសម្រេចយកស្បែកគោមកកែច្នៃ និងផលិតជាស្បែកជើង និងកាបូបស្ពាយនេះ គឺពួកគេទាំង៤នាក់សុទ្ធតែមានបទពិសោធន៍ក្រោយធ្វើការនៅប្រទេសថៃអស់រយៈពេល០៥ឆ្នាំ។ លុះក្រោយពេលវិលត្រឡប់មកស្រុកកំណើតវិញ ហើយមិនចង់ធ្វើការងារចំណាកស្រុកជាថ្មីទៀតនោះ ក៏សហការចូលរួមថវិកាគ្នារៀបចំបង្កើតជាសិប្បកម្មច្នៃស្បែកគោធ្វើជាកាបូប និងស្បែកជើងស្បែក ដាក់លក់នៅក្នុងទឹកដីនៃស្រុកកំណើត នាខេត្តបាត់ដំបង ក្នុងអំឡុងឆ្នាំ២០១០។
ម្ចាស់សិប្បកម្មកែច្នៃរូបនេះបានបន្តឱ្យដឹងថា ៖ ក្រោយចាប់ផ្តើមសាកល្បងធ្វើបានមួយរយៈ ក៏មានបងប្អូនក្នុងភូមិផងរបងជាមួយ ជួយទិញយកទៅប្រើប្រាស់ជាហូរហែរ ជាពិសេស ក្រោយមានការផ្សព្វផ្សាយតាមបណ្តាញសង្គម facebook ក៏សង្កេតឃើញថា ពីមួយថ្ងៃទៅមួយកំណើននៃការលក់មានការកើនឡើងជាប្រចាំ ជាពិសេសការបញ្ជាទិញពីតាមបណ្តាខេត្តមួយចំនួនដែលនៅជាប់ខេត្តបាត់ដំបង ហើយភាគច្រើន គ្រាន់តែប្រាប់ពីទំហំជើង និងម៉ូតដែលចង់បានប៉ុណ្ណោះ គឺក្រុមការងារអាចកាត់ និងដេរជូនបានយ៉ាងស្រស់ស្អាត។ ដោយឡែកក្នុងករណីកាត់ខុសទំហុំជើងមិនត្រូវតាមចង់បានរបស់អតិថិជន គឺត្រូវកាត់ថ្មីជូនអតិថិជនភ្លាម។
លោក កែន នី បានបញ្ជាក់យ៉ាងដូច្នេះថា ៖
«ក្រោយពីបើកដំណើរការអាជីវកម្មខាងលើបានមួយរយៈ ក៏ចាប់ផ្តើមមានការកុម្ម៉ង់ស្បែកជើងធ្វើពីស្បែកក្រពើ ក៏ដូចជាកាបូប ខ្សែរក្រវ៉ាត់ និងបន្តោងសោរធ្វើពីស្បែកក្រពើផងដែរ។ ពួកខ្ញុំក៏បានទិញវត្ថុធាតុដើមដែលជាស្បែកក្រពើយកមកកែច្នៃ និងផលិតចេញជាសម្ភារៈប្រើប្រាស់តាមការចង់បានរបស់អតិថិជនបន្ថែមទៀត ដោយក្នុងមួយខែមានអតិថិនកុម្ម៉ង់ស្បែកជើងរហូតដល់ចន្លោះពី ១០០ ទៅ ២០០គូរ ក្នុងតម្លៃចន្លោះពី ១០ដុល្លារ រហូតដល់ ៦០ដុល្លារ ក្នុងមួយគូរ អាស្រ័យទៅលើម៉ូតនីមួយៗ ចំណែកកាបូបស្ពាយនារីវិញអាចលក់បានប្រមាណជា ៣០ ទៅ ៥០កាបូប ដោយតម្លៃមានខ្ពស់រហូតដល់៣៦០ដុល្លារក៏មានដែរ»។
ជាមួយនឹងកិច្ចដំណើរការ និងទទួលបានការកុម្ម៉ង់ទិញពីអតិថិជនមានការកើនឡើងជាប្រចាំនោះ នៅត្រឹមឆ្នាំ២០២៤កន្លងទៅនេះ ក្រុមការងារដែលជាសហស្ថាបនិកសិប្បកម្មផលិតស្បែកជើង និងកាបូស្បែកក្នុងស្រុកខាងលើនេះ បានសម្រេចបើកសាខាថ្មីមួយទៀតបន្ថែម មានទីតាំងនៅទីរួមខេត្តសៀមរាប ផ្លូវចូលទៅរមណីយដ្ឋានអង្ករ ដែលនៅទីនោះមានទាំងអតិថិជនខ្មែរ និងអតិថិជនជាជនបរទេសចូលទិញជាហូរហែរ រហូតមានអតិថិជនខ្មែរខ្លះកុម្ម៉ង់ទិញយកទៅលក់បន្តនៅក្រៅប្រទេសថែមទៀត ដូចជា នៅប្រទេសកូរ៉េខាងត្បូង និងប្រទេសជប៉ុន អាម៉េរិកជាដើម ព្រោះអ្នកទាំងនោះចូលចិត្តផលិតផលស្នាដៃកូនខ្មែរ។
គួរបញ្ជាក់ថា រហូតមកដល់ពេលបច្ចុប្បន្ននេះ សិប្បកម្មផលិតកាបូប និងស្បែកជើងស្បែក ដែលមានយីហោរថា ពេជ្រ សុវណ្ណ បានរួមចំណែកផ្តល់ការងារដល់ពលរដ្ឋខ្មែរជាង២០នាក់រួចមកហើយ ខណៈដែលនៅដើមឆ្នាំ២០២៦ ឬយ៉ាងយូរត្រឹមពាក់កណ្តាលឆ្នាំ២០២៦ ខាងមុខនេះ សិប្បកម្មដែលកើតចេញពីអតីតពលករខ្មែរបម្រើការងារនៅស្រុកថៃមួយនេះនឹងបន្តបើកដំណើរការសាខាថ្មីមួយបន្ថែមទៀតនៅក្នុងរាជធានីភ្នំពេញផ្ទាល់តែម្ដង ដើម្បីពង្រីកវិសាលភាពផលិតផលក្នុងស្រុកដែលជាស្នាដៃកូនខ្មែរផង ជួយផ្តល់ឱកាសការងារផង ជាពិសេស អាចសាកល្បងប្រកួតប្រជែងជាមួយផលិតផល និងសម្ភារៈប្រើប្រាស់ធ្វើឡើងពីស្បែកសត្វដែលនាំចូលពីក្រៅប្រទេសផងដែរ៕
Account
Security
Favourite Content