ខេត្តព្រះសីហនុ បិទបញ្ចប់យុទ្ធនាការវាស់វែងដីធ្លីមានលក្ខណៈជាប្រព័ន្ធជាស្ថាពរ និងប្រគល់វិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋចំនួន ៥២៥០ បណ្ណ

(ព្រះសីហនុ)៖ ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ បានថ្លែងអំណរគុណដល់ប្រជាពលរដ្ឋទាំងអស់ដែលបានចូលរួមសហការគ្រប់ដំណាក់កាលនីមួយៗជាមួយមន្ត្រីជំនាញ និងអាជ្ញាធរមូលដ្ឋានដើម្បីផលិតបាននូវវិញ្ញាបនបត្រសម្គាល់ម្ចាស់អចលនវត្ថុដែលត្រូវប្រគល់ជូននាពេលនេះ។ នេះជាការលើកឡើងរបស់ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ នៅក្នុងពិធីផ្ដល់វិញ្ញាបនបត្រសម្គាល់ម្ចាស់អចលនវត្ថុចំនួន ៥២៥០បណ្ណ ជូនប្រជាពលរដ្ឋក្នុងភូមិសាស្ត្រខេត្តព្រះសីហនុ នារសៀលថ្ងៃទី១ ខែឧសភា ឆ្នាំ២០២៥។

ឯកឧត្តមឧបនាយករដ្ឋមន្ត្រី សាយ សំអាល់ បានលើកឡើងថា ៖

«នាព្រឹកថ្ងៃទី១ ខែឧសភា ឆ្នាំ២០២៥ សម្ដេចមហាបវរធិបតី ហ៊ុន ម៉ាណែត បានប្រកាសខេត្តព្រះសីហនុជាខេត្តដែលបានបញ្ចប់ការវាស់វែងដីធ្លីចប់សព្វគ្រប់នៅទូទាំងខេត្ត។ ជាមួយនេះក៏មានខេត្តតាកែវ កែប និងប៉ៃលិន ដែលបានបញ្ចប់ការវាស់វែងដីធ្លីជាស្ថាពរផងដែរ ដូច្នេះបណ្ណកម្មសិទ្ធិដីធ្លីដែលបានសំអាតរួចរាល់ និងមានសុវត្ថិភាពហើយនោះក៏បានចាប់ផ្ដើមចែកជូនដល់ប្រជាពលរដ្ឋជាបណ្ដើរៗនៅទូទាំងខេត្ត»។

ឯកឧត្តមឧបនាយករដ្ឋមន្ត្រី បានថ្លែងអំណរគុណដល់រដ្ឋបាលខេត្តព្រះសីហនុ មន្ត្រីរាជការ កងកម្លាំងជុំវិញខេត្ត អាជ្ញាធរមូលដ្ឋាន និងប្រជាពលរដ្ឋទាំងអស់ដែលបានចូលរួមសម្រេចយុទ្ធនាការចុះបញ្ជីដីធ្លីបង្ហើយ រហូតទទួលបានវិញ្ញាបនប័ត្រសម្គាល់ម្ចាស់អចលនវត្ថុនាពេលនេះ។ ការចុះបញ្ជីដីបង្ហើយ គឺដើម្បីធានាបាននូវសុវត្ថិភាពផ្លូវច្បាប់ក្នុងការកាន់កាប់អចលនទ្រព្យ បង្កើត និងបង្កើនបរិយាកាសគ្មានវិវាទ ផ្តល់សេវាគាប់ចិត្តជូនប្រជាពលរដ្ឋ និងរួមចំណែកបង្កើនចំណូលថវិកាជាតិ។

ឯកឧត្តម បានបញ្ជាក់ថា ៖

«ថ្វីត្បិតតែយើងបានបិទបញ្ចប់នូវការវាស់វែងដីធ្លីនៅខេត្តព្រះសីហនុជាស្ថាពរក៏ពិតមែន ប៉ុន្តែមិនមែនមានន័យថា ក្រសួង និងមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ឈប់ទទួលនូវសំណូមពររបស់ប្រជាពលរដ្ឋដែលបានរំលង ឬខកខានមិនបានចូលរួមក្នុងការផ្ដល់ព័ត៌មានសម្រាប់ការវាស់វែងដីធ្លីនោះទេ ហេតុនេះប្រជាពលរដ្ឋក៏អាចចូលមកស្នើសុំវាស់វែងដីធ្លីបន្តទៀតបាន ដោយមន្ត្រីជំនាញនឹងរីករាយទទួលស្វាគមន៍ក្នុងការងារនេះជានិច្ច»។

ឯកឧត្តម បានបន្ថែមថា ការបញ្ចប់នូវការវាស់វែងដីធ្លីទូទាំងខេត្តព្រះសីហនុនាពេលនេះ មានន័យថាជាការបញ្ចប់នូវយុទ្ធនាការ ប៉ុន្តែអ្វីដែលនៅសេសសល់ និងបានរំលងឬខកខានដោយសារហេតុផលណាមួយនោះ គឺមន្ត្រីជំនាញនៅតែបន្តទទួលសំណើរឬសំណូមពរនោះដដែល។ឯកឧត្តមបានស្នើដល់អាជ្ញាធរមូលដ្ឋានភូមិឃុំ បន្ទាប់ពីបានចេញបណ្ណកម្មសិទ្ធិនេះរួចហើយ សូមកំណត់ព្រំប្រទល់ភូមិឱ្យបានច្បាស់លាស់ និងសរសេរឈ្មោះភូមិឲ្យបានត្រឹមត្រូវដើម្បីដាក់បញ្ចូលទៅក្នុងប្រព័ន្ធដោយមានលេខកូដត្រឹមត្រូវ សំរាប់កំណត់អាសយដ្ឋាន ងាយស្រួលប្រើប្រាស់តាមប្រព័ន្ធអនឡាញនាពេលខាងមុខ។

ឯកឧត្តម សាយ សំអាល់ បញ្ជាក់ថា អ្វីដែលរាជរដ្ឋាភិបាលបានប្រគល់ជូនប្រជាពលរដ្ឋនាពេលនេះគឺជាការផ្ដល់នូវសុវត្ថិភាពក្នុងការកាន់កាប់អចលនទ្រព្យស្របច្បាប់ ប៉ុន្តែប្រជាពលរដ្ឋត្រូវមានការប្រុងប្រយ័ត្នក្នុងការប្រើប្រាស់បណ្ណកម្មសិទ្ធិនេះឱ្យបានចំគោលដៅត្រឹមត្រូវ ចៀសវៀងបាត់បង់ទ្រព្យដ៏មានតម្លៃនេះ ពីព្រោះនេះជាទ្រព្យសម្បត្តិដែលធ្វើឱ្យរីកចម្រើនក្នុងជីវិត ដូច្នេះត្រូវចេះថែរក្សាទ្រព្យសម្បត្តិនេះទុកឱ្យបានគង់វង្សនិងបន្សល់ជាមរតកបន្តជំនាន់៕