សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ការសាងសង់ផ្ទះរបស់ប្រជាពលរដ្ឋតាមបណ្ដាខេត្ត/ក្រុងនានាទូទាំងប្រទេសត្រូវបានអ្នកជំនាញមើលឃើញថា មានការធ្លាក់ចុះច្រើនបើធៀបនឹងឆ្នាំ២០២៣ ដែលធ្វើឱ្យប្រាក់ចំណូលរបស់កម្មករសំណង់ថមថយជាងឆ្នាំមុនដែរ ហើយទាំងអ្នកលក់គ្រឿងសំណង់ និងអ្នកម៉ៅការសំណង់ ក៏បាត់បង់ប្រាក់ចំណូលជាច្រើនផងដែរ ។
លោក ភាព សុភ័ណ្ឌ អ្នកម៉ៅការសំណង់នៅខេត្តបន្ទាយមានជ័យ បានមានប្រសាសន៍ប្រាប់ AMS Economy តាមទូរសព្ទនៅព្រឹកថ្ងៃទី១៤ ខែមិថុនា ឆ្នាំ២០២៤នេះឱ្យដឹងថា ឆ្នាំ ២០២៤នេះ សកម្មភាពនៃការសាងសង់ផ្ទះរបស់ប្រជាពលរដ្ឋមើលឃើញថាថមថយច្រើនបើធៀបនឹងឆ្នាំ២០២៣កន្លទៅនេះ ជាក់ស្ដែងឆ្នាំ២០២៣ក្នុងពេលតែមួយ លោកអាចទទួលបានគម្រោងសាងសង់ផ្ទះពីពលរដ្ឋរហូតដល់ ១៣គម្រោងឯណោះ ហើយលោកក៏បានផ្ដល់ឱកាសការងារដល់ជាងសំណង់ជាច្រើននាក់នៅតាមបណ្ដាខេត្ត ប៉ុន្តែឆ្នាំនេះវិញ ក្នុងពេលតែមួយដូចគ្នា មានតែ ១ផ្ទះ ឬ២ផ្ទះតែប៉ុណ្ណោះ ពេលខ្លះមិនមានគម្រោងសាងសង់ទៅទៀត ដែលធ្វើឱ្យជាងសំណង់ ឬកម្មករសំណង់ដែលធ្លាប់មានការងារធ្វើត្រូវបាត់បង់ការងារ និងខ្លះត្រូវទៅធ្វើការងារផ្សេងជំនួសវិញ ។
លោកបន្តថា ផ្ទះដែលប្រជាពលរដ្ឋនិយមសាងសង់តាមរយៈក្រុមការងាររបស់លោកគឺនៅចន្លោះតម្លៃពី១ម៉ឺន៤ពាន់ដុល្លារ ទៅ ៧ម៉ឺនដុល្លារ ទៅតាមធនធានរបស់ម្ចាស់ផ្ទះ ប៉ុន្តែភាគច្រើន គម្រោងផ្ទះដែលលោកទទួលបានពីពលរដ្ឋសម្រាប់សាងសង់ក្នុងតម្លៃជាង ៣ម៉ឺនដុល្លារអាមេរិក ។
លោកបន្ថែមថា ការដែលគម្រោងសាងសង់ផ្ទះរបស់ប្រជាពលរដ្ឋនៅតាមបណ្ដាខេត្តថមថយបែបនេះ វាអាចបណ្ដាលមកពីកត្តាមួយចំនួនដូចជា ពលរដ្ឋមិនទាន់មានលទ្ធភាពដោយសារចំណូលធ្លាក់ចុះ, អ្នករៀបការថ្មីថ្មោងក្នុងរយៈពេលប៉ុន្មានឆ្នាំនេះមានការថយចុះ ហើយមូលហេតុមួយទៀតអាចមកពីពលរដ្ឋបានសម្រុកសាងសង់ផ្ទះរួចរាល់នៅមុនពេលមានវិបត្តិកូវីដចូលមក ។
បើតាមលោក សឿ លីម អ្នកលក់គ្រឿងសំណង់មួយកន្លែងនៅខេត្តកំពត ក៏បានបញ្ជាក់ផងដែរថា ជាការកត់សម្គាល់ ក្នុងរយៈពេលប៉ុន្មានឆ្នាំមុននេះ ប្រជាពលរដ្ឋទិញសម្ភារៈសំណង់យកទៅសង់ផ្ទះមានច្រើន ធ្វើឱ្យការលក់គ្រឿងសំណង់របស់លោកក៏ដូចជាអាជីវករផ្សេងទៀតមានភាពមមាញឹក ប៉ុន្តែដល់ឆ្នាំ២០២៤នេះគឺមានការថមថយច្រើន ។
លោកបន្តថា ការលក់ចេញនូវគ្រឿងសំណង់នាពេលបច្ចុប្បនេះ ភាគច្រើនសម្រាប់ម្ចាស់ផ្ទះចាស់ៗយកទៅជួសជុល ឬកែកុន ដូច្នេះការលក់ចេញក៏មានចំនួនតិចតួចមិនបានច្រើនដូចដែលអតិថិជនទិញយកទៅសង់ផ្ទះថ្មីនោះទេ ។
យ៉ាងណាក៏ដោយ បើទោះបីជាសកម្មភាពនៃការសាងសង់ផ្ទះរបស់ប្រជាពលរដ្ឋតាមបណ្ដាខេត្តនានាមានការថមថយក្ដី តែសកម្មភាពនៃការសាងសង់សំណង់ធំៗដូចជាអគារខ្ពស់ សំណង់សាធារណរបស់រដ្ឋ នៅតែមានសកម្មភាពជាបន្តបន្ទាប់ ជាពិសេសនៅក្រោយស្ថានភាពកូវីដ១៩បានស្ងប់ស្ងាត់ និងស្ថានភាពសេដ្ឋកិច្ចបានប្រសើរឡើងបន្តិចម្ដងៗ ៕
Account
Security
Favourite Content