ជាការពិត ផលិតផលខ្មែរមានច្រើនប្រភេទណាស់ ប៉ុន្តែការគាំទ្រហាក់នៅតិចតួចនៅឡើយ ដោយភាគ ច្រើនប្រជាជននៅតែនិយម​ប្រើប្រាស់​ផលិតផលក្រៅស្រុក។ ទំនោររបស់ប្រជាជនកម្ពុជាបែបនេះអាចមានមូលហេតុចូលរួមជាច្រើនដូចជា តម្លៃផលិតផលថ្លៃពេក គុណភាព​ផលិតផលមិនទាន់អាចប្រកួតប្រជែងលើទីផ្សារបាន និងមិនទាន់មានទំនុកចិត្តលើអ្នកផលិតក្នុងស្រុកជាដើម។

សម្រាប់សហគ្រិនខ្មែរដែលជាម្ចាស់ផលិតផលក្នុងស្រុកមួយប្រភេទយល់ឃើញថា ​បញ្ហាទាំងអស់នេះនឹងអាចដោះស្រាយបាន គ្រាន់តែត្រូវការ​ពេលវេលាបន្តិចក្នុងការកសាងទំនុកចិត្តដល់អតិថិជន ហើយក្នុងការកសាងទំនុកចិត្តនេះទៀតសោត រឿងដែលសំខាន់ជាងគេគឺគុណភាពនៃ​ផលិតផល។

លោកស្រី ចេន សុភាព នាយិកាសហ​គ្រាស​កី​តម្បាញខ្មែរ  Keiy Tambanh Khmer-KTK បានរៀបរាប់យ៉ាងដូច្នេះថា៖

“គុណភាព​ជាកត្តា​ចម្បង​បំផុត ព្រោះបើអត់គុណភាពទេយើងមិនអាច​ឈរលើទីផ្សារទេ…គុណភាពនេះទៀតសោតរាប់ចូលទទាំងគុណភាពផលិតផល និងគុណ​ភាព​សេវាកម្ម ដែលម្ចាស់អាជីវកម្មគ្រប់រូបគួរតែមាន។”

ដោយឡែក សម្រាប់ស្ថានការណ៍បច្ចុប្បន្នដែលការទិញទំនិញនានាកំពុងវិវត្តន៍ខ្លួនទៅរកផ្សារអនឡាញ នោះ ការកសាងទំនុកចិត្តដល់ភ្ញៀវ​គឺកាន់​តែមានភាពលំបាកទៅទៀត។

លោកស្រី ចេន សុភាព បានបញ្ជាក់ថា ៖

“បើភ្ញៀវអាចមើលឃើញ អាចប៉ះបាន អាចស្ទាបបាន ទំនុកចិត្តអាចនឹងមាន ប៉ុន្តែការទិញតាម​អនឡាញ ភ្ញៀវបានត្រឹមមើលឃើញរូបភាពប៉ុណ្ណោះ ដូច្នេះអ្វីដែលយើងគួរធ្វើ គឺពង្រឹងសោភ័ណភាព ពង្រឹងការវេចខ្ចប់ និងរៀបចំ (product display) ឱ្យមើលទៅគួរឱ្យចាប់​អារម្មណ៍។”

ក្នុងន័យនេះ លោកស្រីចង់សំដៅថា គុណភាពផលិតផលគឺសំខាន់រួចស្រេចទៅហើយ ប៉ុន្តែការកសាង សោភ័ណភាពផលិតផល​ក៏ជាផ្នែកមួយ​នៃការទាក់ទាញភ្ញៀវផងដែរ ប្រសិនបើភ្ញៀវមិនបានប៉ះពាល់ ឬសាកល្បងផលិតផលដោយផ្ទាល់។

ឆ្លើយតបទៅនឹងប្រជាជនមួយចំនួនដែលតែងត្អូញត្អែរថា ផលិតផលក្នុងស្រុកមានតម្លៃថ្លៃ ឬថាចង់ជួយគាំទ្រដែរ ប៉ុន្តែមិនមានលទ្ធភាពជាដើម លោកស្រីមិនគាំទ្រឱ្យអ្នកផលិតទៅឆ្លើយឆ្លងក្នុងន័យផ្លែផ្កាឌឺដងចំពោះអតិថិជនឡើយ ដែលការធ្វើបែបនេះនាំឱ្យកាន់តែបាត់ទំនុកចិត្តពី​អ្នក​ទិញ។

សម្រាប់អ្នកស្រីគឺគួរតែងាកមកពង្រឹងគុណភាពរបស់ខ្លួនឱ្យត្រូវតាមស្តង់ដារ ចុះម៉ាក់ផលិតផលត្រឹមត្រូវ ពង្រឹងការវេចខ្ជប់ឱ្យបានស្អាត នោះ​អ្នក​ទិញគេនឹងមករកដោយឯកឯង។ ម្យ៉ាងទៀត លោកស្រីលើកទឹកចិត្តឱ្យសហគ្រិន ម្ចាស់សិប្បកម្ម ម្ចាស់ផលិតផលក្នុងស្រុកនានា សូមឱ្យ​បើកចិត្តក្នុងការរៀនសូត្របន្ថែមពី សហគ្រិនគ្នាឯង ពីអ្នកជំនាញ ក៏ដូចជាពីអតិថិជនដែលបាន ប្រើប្រាស់ហើយ ព្រោះទាំងនេះសុទ្ធតែជាចំណុចកែលម្អ ដែលធ្វើឱ្យផលិតផល​មួយកាន់តែមានភាព​ប្រសើរ៕