សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងគោលបំណងបញ្ចប់ភាពចម្រូងចម្រាស់នៅក្នុងសហគមន៍ និងការពារដីរបស់ពលរដ្ឋជនជាតិដើមភាគតិចនៅតាមបណ្ដាខេត្តភូមិភាគឦសាន រាជរដ្ឋាភិបាលតាមរយៈរៀបចំដែនដី នគរូបនីយកម្ម និងសំណង់ និងមន្ទីររៀបចំដែនដី នគរូបនីយកម្ម សំណង់ និងសុរិយោដី តាមខេត្ត បានវាស់វែង ចុះបញ្ជី និងប្រគល់បណ្ណជូនពលរដ្ឋជនជាតិដើមភាគតិចជាបន្តបន្ទាប់ ។
យោងតាមមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តរតនគិរី បានប្រកាសឱ្យដឹងថា រដ្ឋបាលខេត្តរតនគិរី តាមរយៈមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តរតនគិរី បានចុះបញ្ជីដីសហគមន៍ជនជាតិដើមភាគតិច គ្រឹង ក្បាលដីលេខ ០១២ មានទំហំជាង ២១,១ ហិកតា ស្ថិតនៅភូមិអ៊ីន ឃុំតាឡាវ ស្រុកអណ្ដូងមាស ខេត្តរតនគិរី ។
បើតាមមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តរតនគិរី បានឱ្យដឹងថា ដីសហគមន៍ជនជាតិដើមភាគតិច គ្រឹង ដែលត្រូវបានចុះបញ្ជីនេះ គឺជាការចុះបញ្ជីកម្មសិទ្ធិសមូហភាពតាមបច្ចេកទេសសុរិយោដី និងច្បាប់ភូមិបាល ដោយក្រសួងរៀបចំដែនដី នគរូបនីយកម្ម និងសំណង់ និងកាន់កាប់ដោយប្រធានសហគមន៍ជនជាតិដើមភាគតិចគ្រឹង ភូមិចាន់ ឃុំតាវែងលើ ស្រុកតាវែង ។
គួររម្លឹកថា កាលពីប៉ុន្មានសប្ដាហ៍មុននេះ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានអញ្ជើញចុះប្រគល់វិញ្ញាបនបត្រសម្គាល់កម្មសិទ្ធិសមូហភាពជូនពលរដ្ឋជនជាតិដើមភាគតិចនៅខេត្តក្រចេះ ខេត្តរតនគិរី និងខេត្តមណ្ឌលគិរី ។ ដោយឡែក នៅខេត្តរតនគិរី ឯកឧត្តម បានចុះប្រគល់ដោយផ្ទាល់ដល់ពលរដ្ឋក្នុងសហគមន៍នៃស្រុកអូរជុំ ខេត្តរតនគិរី ។
នៅក្នុងពិធីប្រគល់វិញ្ញាបនបត្រសម្គាល់ម្ចាស់កម្មសិទ្ធិសមូហភាព និងសំណេះសំណាល់ ឯកឧត្តម សាយ សំអាល់ បានថ្លែងថា ការប្រគល់វិញ្ញាបនបត្រនេះ គឺជាការបញ្ចប់ភាពចម្រូងចម្រាស់នៅក្នុងសហគមន៍ និងការពារទ្រព្យសម្បត្តិដីធ្លីរបស់បងប្អូនសហគមន៍សម្រាប់ទុកតកូនចៅជំនាន់ក្រោយៗទៀត ។
ក្នុងឱកាសនោះដែរ ឯកឧត្តមឧបនាយករដ្ឋមន្ត្រី ក៏បានថ្លែងបញ្ជាក់ដែរថា ការប្រគល់វិញ្ញាបនបត្រសម្គាល់ម្ចាស់កម្មសិទ្ធិសមូហភាពនេះ មិនមែនទុកបងប្អូនជនជាតិដើមចោលនោះទេ រាជរដ្ឋាភិបាលនឹងជំរុញឱ្យអាជ្ញាធរក្នុងមូលដ្ឋាន ដៃគូអភិវឌ្ឍន៍ ចូលរួមសហការ ដើម្បីអភិវឌ្ឍន៍មូលដ្ឋានសហគមន៍ជនជាតិដើមភាគតិច ដូចជា អភិវឌ្ឍន៍ហេដ្ឋារចនាសម្ព័ន្ធ រួមមាន ផ្លូវ ទឹក ភ្លើង ដើម្បីសម្រួលដល់ការរស់នៅរបស់ពលរដ្ឋកាន់តែប្រសើរ ជាពិសេស ការផ្សារភ្ជាប់ពីសហគមន៍មួយទៅសហគមន៍មួយ និងពីខេត្តមួយទៅខេត្តមួយទៀតនៅទូទាំងប្រទេស ។
គួរបញ្ជាក់ថា វិញ្ញាបនបត្រសម្គាល់ម្ចាស់កម្មសិទ្ធិសមូហភាពនេះ គឺជាប្រភេទប្លង់រឹងមួយប្រភេទដែលមិនអាចលក់ដូរបាន ប៉ុន្តែអាចដោះដូររវាងម្ចាស់ដីដែលរស់នៅក្នុងសហគមន៍ជាមួយគ្នា ។ ដោយឡែក សម្រាប់ប្រពៃណីទំនៀមទម្លាប់បងប្អូនជនជាតិដើមភាគតិច គឺមិនឱ្យតម្លៃដល់ការលក់ដូរដីធ្លីជាថ្នូរនឹងលុយកាក់ឡើយ ដីធ្លីដែលពួកគាត់មានសព្វថ្ងៃគឺសម្រាប់ទុកចែកកូនចៅជំនាន់ក្រោយៗរបស់ពួកគេរស់នៅតែប៉ុណ្ណោះ ៕
Account
Security
Favourite Content