សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រុមហ៊ុនវិនិយោគអាកាសយានដ្ឋានអន្តរជាតិសៀមរាប-អង្គរ បានស្នើឱ្យរាជរដ្ឋាភិបាលកម្ពុជាជួយជំរុញលើកទឹកចិត្តវិនិយោគិនឯកជនក្នុងការវិនិយោគលើហេដ្ឋារចនាសម្ព័ន្ធពាក់ព័ន្ធជុំវិញអាកាសយានដ្ឋានអន្តរជាតិសៀមរាបអង្គរ ដើម្បីទាក់ទាញដល់ការវិនិយោគបន្ថែមនៅតំបន់ជុំវិញនោះ ។
នៅក្នុងជំនួបជាមួយឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនកាលពីពេលថ្មីៗនេះ លោក លូ វៃ ប្រធានក្រុមប្រឹក្សាភិបាលក្រុមហ៊ុនវិនិយោគអាកាសយានដ្ឋានអន្តរជាតិសៀមរាប-អង្គរ បានស្នើសុំការគាំទ្រីពីរដ្ឋមន្ត្រីក្រសួងសាធារណការ និងដឹកជញ្ជូន សំដៅជំរុញលើកទឹកចិត្តវិនិយោគឯកជនក្នុងការវិនិយោគលើហេដ្ឋារចនាសម្ព័ន្ធពាក់ព័ន្ធជុំវិញអាកាសយានដ្ឋាន ដោយក្រុមហ៊ុនក៏គ្រោងនឹងរៀបចំវេទិកាទាក់ទាញអ្នកវិនិយោគងាកមកបណ្ដាក់ទុននៅក្នុងខេត្តសៀមរាបឱ្យបានកាន់តែច្រើនឡើង ។
យោងតាមប្រសាសន៍សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជានាពេលកន្លងមកនេះ ក៏បានជំរុញឱ្យមន្ត្រីពាក់ព័ន្ធទាំងអស់ទាក់ទាញអ្នកវិនិយោគឱ្យចូលទៅតំបន់ជុំវិញព្រលានយន្តហោះអន្តរជាតិសៀមរាបអង្គរ ដើម្បីសិក្សាពីឱកាសវិនិយោគហេដ្ឋារចនាសម្ព័ន្ធបន្ថែម តភ្ជាប់តំបន់អាកាសយានដ្ឋានអន្តរជាតិនេះទៅនឹងក្រុងសៀមរាប ក្រុងរុនតាឯកតេជោសែន នៃខេត្តសៀមរាប ។
សម្ដេចធិបតីក៏បានជំរុញឱ្យបង្កើតជាតំបន់ឧស្សាហកម្ម ពាណិជ្ជកម្ម និងសេវាកម្មនៅជុំវិញអាកាសយានដ្ឋានអន្តរជាតិសៀមរាប-អង្គរ ដើម្បីបង្កើតឱកាសការងារដល់ប្រជាពលរដ្ឋនៅទីនោះ និងប្រាក់ចំណូលសម្រាប់ប្រជាពលរដ្ឋនៅទីនោះដើម្បីផ្គត់ផ្គង់ដល់គ្រួសារដោយមិនចាំបាច់ធ្វើដំណើរចំណាកស្រុកទៅរកការងារធ្វើនៅខាងក្រៅ ។
គួររំលឹកថា ថ្មីៗកន្លងទៅនេះដែរ រាជរដ្ឋាភិបាលក៏បានសម្រេចបង្កើតក្រុងថ្មីមួយទៀតនៅខេត្តសៀមរាបដែលស្ថិតនៅជិតនឹងតំបន់អាកាសយានដ្ឋានអន្តរជាតិសៀមរាបអង្គរដែលការបង្កើតក្រុងថ្មីនេះ គឺជាចំណងដៃថ្មីក្រោយពីបានបង្កើតរាជរដ្ឋាភិបាលអាណត្តិថ្មី ។
ការបង្កើតក្រុងថ្មីនេះដែរក៏នឹងជំរុញឱ្យមានការវិនិយោគថ្មីៗបន្ថែមទៀតនៅតំបន់រុនតាឯកតេជោសែន និងពាក់ស្នែងដែលនៅជិតនឹងតំបន់ព្រលានយន្តហោះអន្តរជាតិសៀមរាបអង្គរ ហើយរំពឹងថាសៀមរាបនឹងទទួលបានកំណើនវិនិយោគនិងទេសចរបន្ថែមទៀតផងដែរ ៕
Account
Security
Favourite Content