សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងសាងសង់ព្រលានយន្តហោះអន្តរជាតិសៀមរាប-អង្គរ រហូតមកដល់ពេលនេះសម្រេចបានប្រមាណ៩០ភាគរយហើយ ហើយអ្នកវិនិយោគលើវិស័យអចលនទ្រព្យ និងសេវាកម្មទេសចរណ៍ក៏កំពុងតែសម្លឹងមើលពីឱកាសក្នុងការបណ្ដាក់ទុនវិនិយោគផងដែរ។
ឯកឧត្តម តឹករ៉េត សំរេច រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានគណៈកម្មការសាងសង់អាកាសយានដ្ឋានអន្តរជាតិសៀមរាបអង្គរ បានមានប្រសាសន៍ថា គិតត្រឹមដំណាច់ខែមីនានេះ គម្រោងអាកាសយានដ្ឋានអន្តរជាតិ សៀមរាប-អង្គរ សម្រេចបាន ៩០ភាគរយហើយ ហើយបើតាមផែនការដែលបានគ្រោងទុក គឺត្រៀមដាក់ឱ្យធ្វើដំណើរការសាកល្បងនៅខែឧសភាខាងមុខ សំដៅសម្រេចឱ្យបានការដាក់ដំណើរការជាផ្លូវការនៅថ្ងៃទី១៦ ខែតុលា ឆ្នាំ២០២៣ ខាងមុខ។ បន្ថែមពីនេះប្រជាពលរដ្ឋដែលរស់នៅក្បែរតំបន់នេះ នឹងមានអគ្គីសនីប្រើប្រាស់ព្រោងព្រាតចាប់ពីថ្ងៃនេះទៅ ដែលតភ្ជាប់ពីអនុស្ថានីយអាកាសយានដ្ឋានអន្តរជាតិ សៀមរាបអង្គរ។
ឯកឧត្តមបន្តថា ៖
“សមិទ្ធផលដែលសម្រេចបាននាពេលនេះកើតឡើងពីការប្តេជ្ញាចិត្ត និងកិច្ចខិតខំប្រឹងប្រែងរបស់ក្រុមហ៊ុនអនុវត្តគម្រោង ដោយមានការយកចិត្តទុកដាក់ និងជួយជ្រោមជ្រែងពីគ្រប់ក្រសួង ស្ថាប័នពាក់ព័ន្ធ ជាពិសេសការតម្រង់ទិស និងសម្របសម្រួលពីគណៈកម្មការដោយផ្ទាល់។ ទិសដៅបន្ត គឺជាដំណាក់កាលចាប់ផ្តើមអនុវត្តផែនការប្រតិបត្តិការ ដែលក្រុមហ៊ុនអនុវត្តគម្រោង និងក្រសួងស្ថាប័នពាក់ព័ន្ធត្រូវសហការរួមចំណែកធានាសម្រេចឱ្យបានតាមផែនការ។”
អាកាសយានដ្ឋានអន្តរជាតិសៀមរាបថ្មីដែលរាជរដ្ឋាភិបាលឯកភាពជាគោលការណ៍ដាក់ឈ្មោះថា អាកាសយានដ្ឋានអន្តរជាតិសៀមរាប-អង្គរ ត្រូវបានអភិវឌ្ឍន៍ដោយក្រុមហ៊ុន AIAI លើផ្ទៃដីប្រមាណ៧០០ ហិកតា ដោយគ្រោងចំណាយទុនវិនិយោគប្រមាណ ៨៨០ លានដុល្លារ ជាមួយរយៈពេលសាងសង់៣ឆ្នាំក្រោមលក្ខខណ្ឌវិនិយោគ BOT រយៈពេល៥៥ឆ្នាំ។
គម្រោងព្រលានយន្តហោះនេះបានបើកការដ្ឋានសាងសង់នៅថ្ងៃទី៣០ ខែមីនា ឆ្នាំ២០២០ ដោយគ្រោងបញ្ចប់នៅថ្ងៃទី៣០ ខែមីនា ឆ្នាំ២០២៣ និងគ្រោងដាក់ឲ្យដំណើរការសាកល្បងនៅអំឡុងខែតុលា ឆ្នាំ២០២៣ បើពុំមានការប្រែប្រួល និងផលប៉ះពាល់អ្វីកើតឡើងជាយថាហេតុ។
ទន្ទឹមនឹង គម្រោងអភិវឌ្ឍន៍ព្រលានយន្តហោះអន្តរជាតិមួយនេះកាន់តែជិតរួចរាល់កាលពីពាក់កណ្ដាលខែមីនា ឆ្នាំ២០២៣ នេះដែរ វិនិយោគិនកម្ពុជា ចិន និងជប៉ុន ក៏បានទៅសិក្សាពីសក្ដានុពល និងឱកាសវិនិយោគនៅក្នុងខេត្តសៀមរាប ដោយគ្រោងនឹងបណ្ដាក់ទុនវិនិយោគទៅតាមជំនាញរបស់ពួកគេផងដែរ ស្របពេលដែលរដ្ឋាភិបាលក៏កំពុងអនុញ្ញាតឱ្យក្រុមហ៊ុនឯកជនសិក្សាផ្លូវល្បឿនលឿនភ្នំពេញសៀមរាបដែរ ៕
Account
Security
Favourite Content