សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រុមហ៊ុនសាងសង់អាកាសយានដ្ឋានអន្ដរជាតិសៀមរាបអង្គរដែលស្ថិតនៅស្រុកសូទ្រនិគម ខេត្តសៀមរាបបានប្តេជ្ញាសាងសង់គម្រោងនេះឱ្យចប់តាមផែនការ ខណៈគិតមកត្រឹមថ្ងៃចុងសប្ដាហ៍ទី២ ខែកុម្ភៈ ឆ្នាំ២០២៣ សម្រេចបានជាង ៧៥% នៃការងារសរុប ខណៈការសាងសង់បានចំណាយអស់ប្រមាណ ៦២០លានដុល្លារ។
ថ្លែងក្នុងជំនួបនៃដំណើរទស្សនកិច្ចស្វែងយល់លក្ខណៈបច្ចេកទេសនៃដំណើរការសាងសង់អាកាសយានដ្ឋានអន្ដរជាតិសៀមរាបអង្គររបស់មន្ត្រីនៃរដ្ឋលេខាធិការអាកាសចរណ៍ស៊ីវិលកាលពីពេលថ្មីៗនេះ លោក ZOU Yuhui ប្រធានក្រុមហ៊ុនសាងសង់អាកាសយានដ្ឋានអន្ដរជាតិសៀមរាបអង្គរ (YACA) បញ្ជាក់ថា ការងារសាងសង់អាកាសយានដ្ឋានអន្តរជាតិសៀមរាបអង្គរ គិតមកដល់ត្រឹមថ្ងៃចុងសប្ដាហ៍ទី២ នៃខែកុម្ភៈ ឆ្នាំ២០២៣ សម្រេចបានជាង ៧៥ % នៃការងារសរុប ដោយបានចំណាយទឹកប្រាក់សរុបសម្រាប់ការសាងសង់អស់ចំនួន ៦២០លានដុល្លារ។
លោកបន្ថែមថា ជាមួយនឹងការប្ដេជ្ញាចិត្តមោះមុត និងច្បាស់លាស់ ក្រុមហ៊ុនបានដាក់ចេញនូវផែនការសម្រាប់ឆ្នាំ២០២៣ គឺត្រូវសម្រេចការងារសាងសង់នេះឱ្យបានរួចរាល់ និងចប់សព្វគ្រប់នៅត្រឹមដំណាច់ខែមីនា ឆ្នាំ២០២៣ ហើយប្រសិនបើមិនមានអ្វីប្រែប្រួលនោះទេ អាកាសយានដ្ឋានអន្តរជាតិសៀមរាបអង្គរ (SAI) គ្រោងនឹងបើកដំណើរការនៅខែតុលា ឆ្នាំ២០២៣។
គួរបញ្ជាក់ផងដែរថា អាកាសយានដ្ឋានអន្តជាតិសៀមរាបអង្គរនេះ ជាសមិទ្ធផលហេដ្ឋារចនាសម្ព័ន្ធដ៏ថ្មីស្រឡាងមួយ ដែលអាចនឹងជួយពន្លឿនចក្ខុវិស័យ និងទស្សនទានក្នុងការពង្រឹង និងពង្រីកសេវាកម្មដឹកជញ្ជូនអ្នកដំណើរ និងទំនិញតាមផ្លូវអាកាស ហើយនឹងបង្កផ្ដល់នូវលក្ខណៈងាយស្រួលដល់ភ្ញៀវជាតិ និងភ្ញៀវទេសចរអន្តរជាតិ តាមរយៈការព្យាយាមធ្វើឱ្យមានការតភ្ជាប់ការហោះហើរក្នុងតំបន់ និងធ្វើការហោះហើរត្រង់បន្ថែមទៀតទៅកាន់ទីផ្សារផ្សេងៗ ដូចជា ចិន និងគ្រប់តំបន់នៅលើសាកលលោកមកកាន់ប្រទេសកម្ពុជានាពេលខាងមុខ៕
Account
Security
Favourite Content