សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ស្រូវសាលី គឺជាគ្រាប់ធញ្ញជាតិដែលនាំចេញទៅកាន់ទីផ្សារសកលធំជាងគេបំផុតទីពីររបស់ពិភពលោកដោយគិតទៅលើទាំងផ្ទៃដីនៃការដាំដុះគ្រាប់ធញ្ញជាតិ ក៏ដូចជាបរិមាណនៃផលិតកម្មសរុបផងដែរ។ ទិន្នន័យចុងក្រោយមួយដែលបង្ហាញដោយ The Statista បានឱ្យដឹងថា បរិមាណផលិតកម្មស្រូវសាលីសកលបានឈានទៅដល់ទំហំជាង ៧៧៨ លានតោនក្នុងឆ្នាំ២០២១ ពោលគឺស្ថិតនៅក្នុងអត្រាកើនឡើងប្រមាណ៤លានតោនធៀបនឹងឆ្នាំចាស់។
ទោះបីជាយ៉ាងណាក្តី បញ្ហាស្បៀងអាហារពិភពលោកកំពុងជួបវិបត្តិដែលគេជឿជាក់ថាមានមនុស្សជាច្រើនលាននាក់រៀងរាល់ថ្ងៃកំពុងជួបបញ្ហាខ្វះខាតអាហារទទួលទាន ខណៈដែលស្រូវសាលីជាអ្នកផ្គត់ផ្គង់ធំបំផុតសម្រាប់ពិភពលោកអាចដាំដុះនៅតែប្រទេសមួយចំនួនប៉ុណ្ណោះ ជាពិសេសគឺជាប្រទេសដែលមិនមានអាកាសធាតុក្តៅ និងហួតហែងខ្លាំង។ ប៉ុន្តែថ្មីៗនេះ ជាដំណឹងគួរឲ្យត្រេកអរបំផុតមួយសម្រាប់បណ្តាប្រទេសដែលខ្វះខាតអាហារ និងពិភពលោកទាំងមូលផងដែរ ដោយសារតែនៅអារ៉ាប់រួមដែលជាប្រទេសគ្របដណ្តប់ទៅដោយវាលខ្សាច់យ៉ាងល្វឹងល្វើយនោះបែរជាអាចធ្វើការដាំដុះស្រូវសាលីបានដោយជោគជ័យ ហើយតាមផែនការគេគ្រោងនឹងធ្វើការច្រូតកាត់ដំណាំនេះជាលើកដំបូងនិងជាប្រវត្តិសាស្ត្រនាពាក់កណ្តាលខែមីនាខាងមុខនេះហើយ។
កសិដ្ឋានខ្នាតយក្សទំហំ៤០០ហិកតានៅលើទឹកដីវាលខ្សាច់ ឬស្មើទៅនឹងទំហំទីលានបាល់ទាត់ដល់ទៅ៥០០តារាង ស្ថិតនៅក្នុងទីក្រុង Sharjah នឹងក្លាយទៅជាកសិដ្ឋានគំរូលើកដំបូងបំផុតដែលអាចធ្វើការប្រមូលផលស្រូវសាលីបាននៅលើទឹកដីរបស់អារ៉ាប់ដោយប្រើប្រាស់បច្ចេកវិទ្យាទំនើបបំផុត ដោយក្នុងនោះគេជឿជាក់ថាមានក្រុមការងារវិស្វករតែ២នាក់ និងក្រុមកម្មករពី៦ទៅ៧នាក់ប៉ុណ្ណោះ ខណៈដែលការងារភាគច្រើនគឺប្រើប្រាស់បច្ចេកវិទ្យាឆ្លាតវ៉ៃស្ទើរតែទាំងស្រុង។
ទីតាំងស្រែស្រូវសាលីដែលជាតំបន់វាលខ្សាច់រហោស្ថានមួយនេះ កាលពីដើមឡើយគឺពោរពេញទៅដោយថ្មភ្នំ, ខ្សាច់ និងគ្មានមនុស្សរស់នៅឡើយ ប៉ុន្តែក្រោយកិច្ចខំប្រឹងប្រែងអភិវឌ្ឍ និងដំណើរការគម្រោងកាលពីខែវិច្ឆិកាកន្លងមកនេះប៉ុណ្ណោះស្រែស្រូវសាលីដ៏ខៀវស្រងាត់បានគ្របដណ្តប់លើទីតាំងនេះមកជំនួសវិញ ហើយក៏កំពុងត្រៀមខ្លួនដើម្បីអាចផ្តល់ទិន្នផលជាស្រូវសាលីរហូតទៅដល់ ១ ៧០០តោននៅក្នុងការច្រូតកាត់នារដូវកាលដំបូងផងដែរ។
បច្ចេកវិទ្យាគ្រប់បែបយ៉ាងត្រូវបានប្រើប្រាស់ជាមួយនឹងកិច្ចការងារស្វ័យប្រវត្តិភាគច្រើនចាប់រាប់តាំងតែពីការស្រោចស្រពទឹកដោយមានប្រសិទ្ធភាពការត្រួតពិនិត្យអាកាសធាតុ, ការត្រួតពិនិត្យភាពខ្ជះខ្ជាយនៃធនធានទឹក និងដោយមិនប្រើប្រាស់ជីគិមីសុទ្ធសាធ អាចធ្វើឲ្យអារ៉ាប់រួមនាំចេញស្រូវសាលីយ៉ាងហោចណាស់ ១,៧លានតោននៅក្នុងឆ្នាំដំបូង។ ជាមួយគ្នានេះ ស្ថិតក្នុងស្ថានភាពដែលពិភពលោកកំពុងខ្វះខាតស្បៀងអាហារយ៉ាងធ្ងន់ធ្ងរបែបនេះ ក៏ដូចជាបញ្ហាបម្រែបម្រួលអាកាសធាតុធ្ងន់ធ្ងរផង គេអាចជឿជាក់ថា បច្ចេកវិទ្យាគំរូរបស់ទីក្រុង Sharjah នេះនឹងអាចក្លាយទៅជាបដិវត្តស្បៀងអាហាររបស់ពិភពលោកជារៀងរហូតទៅ៕
Account
Security
Favourite Content