សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅក្នុងអំឡុងវិបត្តិកូវីដ១៩ ចុងឆ្នាំ២០២០ រាជរដ្ឋាភិបាលបានចំណាយថវិកាប្រមាណជាង១៥០លានដុល្លារអាម៉េរិក ដើម្បីសាងសង់ផ្លូវចំនួន៣៨ខ្សែនៅក្នុងក្រុងសៀមរាប ខេត្តសៀមរាប ដើម្បីទាក់ទាញទេសចរ និងការវិនិយោគ ហើយជាលទ្ធផលមកដល់ពេលនេះ ផ្លូវទាំង៣៨ខ្សែដែលរាជរដ្ឋាភិបាលបានចំណាយថវិកាសាងសង់នោះ បាន និងកំពុងប្រែក្លាយតំបន់ទេសចរណ៍វប្បធម៌មួយនេះ ទៅជាទីក្រុងទំនើប និងទាក់ទាញបំផុត ។
យោងតាមក្រសួងសាធារណការ និងដឹកជញ្ជូន បានឱ្យដឹងថា ហេដ្ឋារចនាសម្ព័ន្ធផ្លូវទាំង ៣៨ខ្សែ បាន និងកំពុងបង្ហាញរូបរាងដ៏ស្រស់ត្រកាលនៅលើទឹកដីអង្គរ ប្រែក្លាយក្រុងសៀមរាប ខេត្តសៀមរាប ឱ្យក្លាយជាទីក្រុងដ៏ទំនើបពោរពេញដោយសោភ័ណភាព បរិស្ថានល្អសម្រាប់ការរស់នៅ ស័ក្តិសមជាទីក្រុងទេសចរណ៍ វប្បធម៌ និងប្រវត្តិសាស្ត្រ អាចទាក់ទាញភ្ញៀវទេសចរបានកាន់តែច្រើន សំដៅលើកស្ទួយសេដ្ឋកិច្ចជាតិឱ្យកាន់តែមានការរីកចម្រើន ព្រមទាំងធ្វើឱ្យប្រសើរឡើងដល់ការតភ្ជាប់ពីទីប្រជុំជនក្រុងសៀមរាប ទៅកាន់តំបន់ដាច់ស្រយាលផងដែរ ។
ហេដ្ឋារចនាសម្ព័ន្ធផ្លូវចំនួន៣៨ខ្សែ មានប្រវែងសរុប ១០៨,៧៤ គីឡូម៉ែត្រ បានបើកការដ្ឋានសាងសង់កាលពីថ្ងៃទី៣០ ខែវិច្ឆិកា ឆ្នាំ២០២០ និងបានសម្ពោធបើកប្រើប្រាស់ជាផ្លូវការ កាលពីថ្ងៃទី០៤ ខែមេសា ឆ្នាំ២០២២ ក្រោមអធិបតីភាព សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភានៃព្រះរាជាណាចក្រកម្ពុជា ។
តាមរយៈផ្លូវ ៣៨ខ្សែដែលត្រូវបានសាងសង់នៅក្នុងក្រុងសៀមរាបនេះ បាន និងកំពុងទាក់ទាញភ្ញៀវទេសចរជាតិ និងអន្តរជាតិមកកាន់ទឹកដីនៃខេត្តសៀមរាបកាន់តែច្រើនឡើងៗ ជាពិសេសចាប់តាំងពីផ្លូវនេះបានបើកសម្ពោធឱ្យប្រើប្រាស់ជាផ្លូវការនៅអំឡុងខែមេសា ឆ្នាំ២០២២ ។ មិនត្រឹមតែប៉ុណ្ណោះ ផ្លូវទាំងនេះក៏បានសម្រួលដល់ការធ្វើដំណើររបស់ប្រជាពលរដ្ឋក្នុងតំបន់ក៏ដូចជាពលរដ្ឋដែលធ្វើដំណើរឆ្លងកាត់ខេត្តសៀមរាបទៅកាន់ខេត្តផ្សេងៗទៀតផងដែរ ។
ភ្នាក់ងារអចលនវត្ថុប្រចាំខេត្តសៀមរាបជាច្រើននាក់បានលើកឡើងពីសក្ដានុពលនៃខេត្តសៀមរាប ជាពិសេស ផ្លូវ៣៨ខ្សែ អាកាសយានដ្ឋានអន្តរជាតិសៀមរាប អង្គរ និងការបង្កើតក្រុងថ្មីមួយទៀត ក្រុងរុនតាឯកតេជោសែន បានធ្វើឱ្យវិនិយោគិនសម្លឹងរកឱកាសក្នុងការបណ្ដាក់ទុនវិនិយោគនៅក្នុងក្រុងសៀមរាប ក៏ដូចជាតំបន់ជាប់ក្រុងសៀមរាប ជាពិសេសការវិនិយោគទៅលើវិស័យទេសចរណ៍ ។
សូមជម្រាបដែរថា ក្រៅពីផ្លូវទាំង៣៨ខ្សែនៅក្រុងសៀមរាប រាជរដ្ឋាភិបាលក៏បានចំណាយថវិកាជាច្រើនទៀតសាងសង់ និងលើកកម្ពស់ផ្លូវជាតិសំខាន់ៗ តភ្ជាប់ពីរាជធានីភ្នំពេញទៅកាន់បណ្ដាខេត្តនានាដែលមានសក្ដានុពល ដើម្បីសម្រួលដល់ការធ្វើដំណើររបស់ពលរដ្ឋ ទេសចរ និងវិនិយោគិន ដែលក្នុងនោះរួមមានដូចជា ផ្លូវតភ្ជាប់ពីរាជធានីភ្នំពេញ ទៅខេត្តកំពត កែប ព្រះសីហនុ កំពង់ឆ្នាំង ពោធិ៍សាត់ បាត់ដំបង ប៉ោយប៉ែត កំពង់ចាម តាកែវ និងខេត្តកោះកុង ជាដើម៕
Account
Security
Favourite Content