សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ធ្យូងអនាម័យ ជាប្រភេទធ្យូងដែលផលិតចេញពីកម្ទេចកម្ទីឈើយកមកកិនលាយបញ្ចូលគ្នាទៅជាធ្យូងដែលមានចំហេះល្អ គ្មានជាតិពុល និងអាចកាត់បន្ថយការកាប់ទន្ទ្រានព្រៃ។ ក្នុងនោះ អាជីវកម្មធ្យូ អេកូ ជាសិប្បកម្មមួយដែលបានផលិត និងប្រមូលទិញធ្យូងអនាម័យជាច្រើនកន្លែងដើម្បីលក់បន្តទៅឱ្យអ្នកប្រើប្រាស់ក្នុងគោលបំណងជួយទាំងផ្នែកបរិស្ថាន និងជីវភាពប្រជាជនក្នុងសហគមន៍។
លោក គង់ ចាន់ឌី ជានាយកក្រុមហ៊ុន ធ្យូង អេកូ ឬ Eco Charcoal បានប្រាប់ឱុ្យដឹងថា ៖ មូលហេតុដែលបង្កើតអាជីវកម្មមួយនេះឡើងគឺដោយសារតែមើលឃើញពីតម្រូវការទីផ្សារជាក់ស្ដែងទៅលើការប្រើប្រាស់ធ្យូងព្រៃមានការកើនឡើងច្រើនដែលអាចធ្វើឱ្យបាត់បង់ធនធានព្រៃឈើ និងប៉ះពាល់ដល់បរិសកថាន ទើបលោកមានគំនិតបង្កើតធ្យូង អេកូ ដើម្បីជំនួសការប្រើប្រាស់ធ្យូងព្រៃ ដោយធ្យូង អេកូ នេះ ច្នៃចេញពីការកាកសំណ់លរុក្ខជាតិមួយចំនួន ក៏ដូចជា សំណល់ត្រឡោកដូង កាកអំពៅ និងកម្ទេចឈើជាដើម។
លោកបានរៀបរាប់ទៀតថា ៖
«បច្ចុប្បន្ន សិប្បកម្មរបស់យើងផលិតធ្យូងបានប្រមាណ ៣០-៦០តោនក្នុងមួយខែ និងមានការទិញចូលពីសិប្បកម្មដទៃទៀតសរុបប្រមាណជាង ៨០តោនក្នុងមួយខែ។ ក្នុងនោះ ទីផ្សាររបស់ធ្យូង អេកូ យើងមានអ្នកតំណាងតាមខេត្ត ក្រុង តាមផ្សារទំនើបនានា ដោយមានទាំងដេប៉ូបោះដុំ អាហារដ្ឋាន និងការចុះលក់ដោយផ្ទាល់ ហើយក៏មានលក់តាមបណ្ដាញសង្គមផងដែរ»។
លោក គង់ ចាន់ឌី បានអះអាងថា ការប្រើប្រាស់ធ្យូងអេកូ មានប្រយោជន៍ច្រើន ដូចជា ឆេះងំបានល្អ ហុយផ្សែងតិច មិនផ្ទុះផ្កាភ្លើង កាត់បន្ថយជាតិពុលក្នុងបរិយាកាស ចូលរួមកាត់បន្ថយកាកសំណល់ដែលគ្មានប្រយោជន៍ ជាជាងការកាប់ព្រៃដើម្បីធ្វើធ្យូង។ ដោយឡែកចំណុចខុសប្លែករបស់ធ្យូង អេកូ រួមមានផ្នែកបច្ចេកទេសកែច្នៃដោយម៉ាស៊ីន មានការវេចខ្ចប់បានត្រឹមត្រូវដោយដាក់កេស ឬការ៉ុង មានឈ្មោះ និងឡូហ្គូសម្គាល់បានត្រឹមត្រូវ បញ្ជាក់ទីតាំងផលិតច្បាស់លាស់ និងងាយស្រួលទុកដាក់។
គួររំឭកដែរថា អាជីវកម្ម ធ្យូង អេកូ ឬ Eco Charcoal បានបង្កើតឡើងកាលពីខែតុលា ឆ្នាំ២០១៩ ដោយផ្ដើមពីការទិញយកទៅលក់បន្ត បន្ទាប់មកទៀតទើបមានទីតាំងផលិតខ្លួនឯង ស្ថិតនៅភូមិក្បាលស្នួល ឃុំស្នួល ស្រុកស្នួល ខេត្តក្រចេះ រហូតដល់ដើមឆ្នាំ២០២២ បានពង្រីកដល់ ២០កន្លែងផ្សេងគ្នា ដោយមានទាំងសាខាចែកចាយគ្រប់ខេត្តក្រុងផងដែរ។
គោលដៅនៃអាជីវកម្មនេះគឺជួយថែរក្សាព្រៃឈើ បរិស្ថាន កាត់បន្ថយការកាប់ទន្ទ្រានព្រៃឈើ ផ្ដល់ការងារដល់ប្រជាជនក្នុងសហគមន៍ កាត់បន្ថយភាពក្រីក្រ និងចំណាកស្រុក ក៏ដូចជាចង់ឱ្យធ្យូងអនាម័យមានការប្រើប្រាស់កាន់តែទូលាយ និងអាចឈានដល់នាំចេញក្រៅប្រទេស។ យ៉ាងណាមិញ អាជីវកម្មនេះក៏ជួបផលលំបាកផងដែរ ជាពិសេសបញ្ហាតម្លៃ ព្រោះធ្យូងព្រៃហាក់មានតម្លៃទាបជាង ដែលធ្វើឱ្យទីផ្សារធ្យូងអនាម័យនៅមានកម្រិតនៅឡើយ ។ យ៉ាងណាក៏ដោយ លោក ចាន់ឌី បានអំពាវនាវឱ្យប្រជាជនទូទៅងាកមកគាំទ្រ និងប្រើប្រាស់ធ្យូងអនាម័យ ឬធ្យូង អេកូ ឱ្យបានកាន់តែច្រើន ដើម្បីចូលរួមលើកកម្ពស់ការថែរក្សាបរិស្ថាន និងការពារព្រៃឈើទាំងអស់គ្នា៕
Account
Security
Favourite Content