សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កាលពីចុងឆ្នាំ២០២៣កន្លងទៅនេះ រាជរដ្ឋាភិបាលកម្ពុជាបានដាក់ចេញនូវកម្មវិធីពិសេស ជំរុញការវិនិយោគនៅក្នុងខេត្តព្រះសីហនុ ដោយបានលើកលែងពន្ធមួយចំនួនដល់វិនិយោគិនដែលចូលមកបណ្ដាក់ទុនវិនិយោគនៅក្នុងខេត្តព្រះសីហនុ និងវិនិយោគិនដែលមកបន្តការវិនិយោគលើគម្រោងអគារដែលជាប់គាំងនៅក្នុងខេត្តព្រះសីហនុ ។ ជាលទ្ធផលមកដល់ពេលនេះ កម្មវិធីពិសេសជំរុញការវិនិយោគខេត្តព្រះសីហនុចាប់ផ្ដើមទទួលផលជាបណ្ដើរៗហើយ ដោយមានវិនិយោគិនក្នុង និងក្រៅប្រទេសជាច្រើនដាក់ទុនវិនិយោគលើគម្រោងនានាក្នុងខេត្តព្រះសីហនុ ជាពិសេសគម្រោងដែលជាប់គាំងកន្លងមក ។
លោក សៅ ហុក ប្រធានក្រុមហ៊ុន KW Cambodia សាខាខេត្តព្រះសីហនុ បានមានប្រសាសន៍ថា ចាប់តាំងពីរាជរដ្ឋាភិបាលបានដាក់ចេញនូវកម្មវិធីពិសេសជំរុញការវិនិយោគនៅខេត្តព្រះសីហនុ លោកសង្កេតឃើញថាមានវិនិយោគិនក្នុង និងប្រទេសជាច្រើនបានចូលមកបណ្ដាក់ទុនវិនិយោគជាបន្តបន្ទាប់។
លោកបន្តថា មួយរយៈចុងក្រោយនេះ អគារដែលជាប់គាំងសាងសង់មិនទាន់រួច ត្រូវបានម្ចាស់អគារដែលជាជនជាតិខ្មែរ ឬក៏បរទេសបានចាប់ផ្ដើមដំណើរការសាងសង់ឡើងវិញ ខ្លះមានលទ្ធភាពត្រឹមជាន់ទី២ ឬទី៣ គឺធ្វើទៅតាមលទ្ធភាព ខ្លះទៀតក៏បានបញ្ចប់ទាំងស្រុង និងកំពុងស្វែងរកដៃគូអាជីវកម្មដើម្បីដំណើរការអគារទាំងនោះ ។
ប្រធានក្រុមហ៊ុនអចលនទ្រព្យរូបនេះបានបន្ថែមថា ស្របនឹងការវិនិយោគលើអគារទាំងនោះ ក៏មានគម្រោងថ្មីៗមួយចំនួនបានចាប់ផ្ដើមដំណើរការនៅក្នុងខេត្តមួយនេះផងដែរ ដូចជាគម្រោងសណ្ឋាគារផ្កាយ៥ និងគម្រោងមួយចំនួនទៀត ។ តាមរយៈសកម្មភាពនេះ ធ្វើឱ្យតម្រូវការ និងការទិញលក់ដីធ្លីនៅក្នុងខេត្តព្រះសីហនុក៏ចាប់ផ្ដើមកម្រើកឡើងវិញ ប៉ុន្តែតម្លៃនៅមិនទាន់មានការប្រែប្រួលនោះទេ ពោលគឺនៅរក្សាដដែល ។
បើតាមឯកឧត្តម ម៉ាង ស៊ីណេត អភិបាលខេត្តព្រះសីហនុ បានលើកឡើងថា គិតមកដល់បច្ចុប្បន្ននេះ មានគម្រោងជាច្រើនបានស្នើសុំបន្តដំណើរការជាច្រើនគម្រោងក្នុងពេលរាជរដ្ឋាភិបាលបានផ្ដល់ការលើកទឹកចិត្ត ។ ក្រៅពីនេះក៏មានគម្រោងថ្មីៗ បានដាក់ស្នើសុំការវិនិយោគនៅក្នុងខេត្តមួយនេះដែរ ។
នៅក្នុងជំនួបជាមួយវិនិយោគិនហុងកុងចំនួន ១៣ក្រុមហ៊ុនដែលមកទស្សនកិច្ច និងស្វែងរការវិនិយោគនៅក្នុងប្រទេសកម្ពុជានៅចុងខែកក្កដា ឆ្នាំ២០២៤កន្លងទៅថ្មីៗនេះ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ក្រុមប្រឹក្សាអភិវឌ្ឍន៍កម្ពុជា បានបង្ហាញពីសក្ដានុពលនៃវិនិយោគនៅក្នុងខេត្តព្រះសីហនុ ដើម្បីបង្ហាញដល់វិនិយោគិនហុងកុងទាំងនោះ ។
ឯកឧត្តមបានមានប្រសាសន៍ថា ខេត្តព្រះសីហនុ មានផ្លូវល្បឿនលឿន តភ្ជាប់់ពីភ្នំពេញ មានកំពង់ផែទឹកជ្រៅ ហើយនៅពេលអនាតឆាប់ៗនេះ ចំណតផែទឹកជ្រៅមួយទៀតដែលបានបើកការដ្ឋានកាលពីពេលកន្លងទៅនេះ ក៏នឹងត្រូវសាងសង់រួចរាល់ ដូច្នេះវានឹងអនុញ្ញាតឱ្យនាវាធំៗអាចចូលចតនៅក្នុងកំពង់ផែទឹកក្រុងព្រះសីហនុបាន។ ក្រៅពីនេះ នៅក្នុងខេត្តព្រះសីហនុ ក៏មានផ្លូវជាច្រើនខ្សែត្រូវបានវិនិយោគអស់ទឹកប្រាក់រាប់រយលានដុល្លារ ដើម្បីសម្រួលដល់ការធ្វើដំណើររបស់ទេសចរ និងវិនិយោគិនទៅលេងខេត្តព្រះសីហនុ៕
Account
Security
Favourite Content