សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រះសីហនុ ៖ កោះរ៉ុង ពីមុនគ្រាន់តែជាភូមិរបស់អ្នកនេសាទមួយប៉ុណ្ណោះដែលស្ថិតនៅក្នុងដែនគ្រប់គ្រងរបស់រដ្ឋបាលខេត្តព្រះសីហនុ និងជាទីសំចតរបស់អ្នកនេសាទដោយគ្មានហេដ្ឋារចនាសម្ព័ន្ធ និងគ្មានការចាប់អារម្មណ៍ពីសំណាក់ភ្ញៀវទេសចរជាតិ និងអន្តរជាតិប៉ុន្មាននោះទេ ប៉ុន្តែបច្ចុប្បន្ននេះ កោះរ៉ុង បានប្រែខ្លួនជាទីក្រុងទេសចរណ៍ដ៏ទាក់ទាញ និងមានសោភ័ណភាពស្រស់ស្អាតមិននឹកស្មានដល់ ដោយមានទាំងទេសចរជាតិ និងអន្តរជាតិ ធ្វើដំណើរទៅសម្រាកលេងកម្សាន្តយ៉ាងមមាញឹក រហូតធ្វើឱ្យកោះមួយនេះក្លាយជាគោលដៅទេសចរណ៍ធម្មជាតិនាតំបន់ឆ្នេរ និងកោះដ៏អស្ចារ្យ។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា មែនទែនទៅកោះរ៉ុងមានមនុស្សមករស់នៅយូរហើយ ប៉ុន្តែមិនមានហេដ្ឋារចនាសម្ព័ន្ធច្រើននោះទេ ព្រោះវាជាភូមិនេសាទ ។ ពលរដ្ឋភាគច្រើនដែលមករស់នៅលើកោះរ៉ុង គឺជាអ្នកស្ម័គ្រចិត្ត ហើយអ្នកដែលមករស់នៅមុនគេ គឺជាទាហានជើងទឹក និងក្រុមគ្រួសារ ។
ឯកឧត្តមបន្តថា ៖
«កាលនោះ រចនាសម្ព័ន្ធនានាមិនមានឡើយនៅលើកោះនេះ ទាំងរចនាសម្ព័ន្ធរដ្ឋបាល ផ្លូវថ្នល់ ទឹក ភ្លើង គឺមិនមានទេ ប៉ុន្តែក្រោយមានមនុស្សរស់នៅកាន់តែច្រើន រាជរដ្ឋាភិបាលក៏បានអនុញ្ញាតឱ្យមានការវិនិយោគនៅលើកោះរ៉ុង និងបានធ្វើឱ្យកោះរ៉ុងមានការអភិវឌ្ឍហេដ្ឋារចនាសម្ព័ន្ធ ហើយបានកែប្រែកោះរ៉ុងទៅជាកោះដែលទាក់ទាញ និងក្លាយទៅដង្ហើមសេដ្ឋកិច្ចមួយរបស់កម្ពុជា»។
ក្រោយអភិវឌ្ឍន៍ពីមួយដំណាក់កាលទៅមួយដំណាក់ កោះរ៉ុង កាន់តែប្រសើរឡើង ធ្វើឱ្យទេសចរមកពីបណ្ដាប្រទេសនានាលើពិភពលោកចាប់អារម្មណ៍ និងបានមកលេង សម្រាកកម្សាន្តនៅលើកោះរ៉ុងកាន់តែច្រើន ព្រមទាំងបានផ្សព្វផ្សាយតៗគ្នាពីទេសភាពលើកោះ ក៏ដូចជាសក្ដានុពលទេសចរណ៍របស់កោះរ៉ុង ធ្វើឱ្យភ្ញៀវទេសចរមកសម្រាកលំហែលើកោះរ៉ុងកាន់តែច្រើន ហើយក៏មានក្រុមហ៊ុនដឹកជញ្ជូនផ្លូវទឹកបង្កើនការដឹកជញ្ជូនភ្ញៀវពីដីគោកទៅកាន់កោះរ៉ុង ធ្វើឱ្យការធ្វើដំណើរកាន់តែងាយស្រួល និងសុវត្ថិភាព ។
ឯកឧត្តម ឧបនាយករដ្ឋមន្ត្រី បានបន្ថែមទៀតថា ដើម្បីឱ្យកោះរ៉ុងកាន់តែរស់រវើក និងដើម្បីឱ្យពលរដ្ឋលើកោះរ៉ុងកាន់តែមានជីវភាពធូរធា រស់នៅប្រកបដោយសុខសុវត្ថិភាព ក៏ដូចជាការពារដល់សុវត្ថិភាពរបស់ភ្ញៀវទេសចរមកលេងកម្សាន្តនៅលើកោះនេះ អាជ្ញាធរពាក់ព័ន្ធទាំងអស់ត្រូវចូលរួមសហការគ្នាអនុវត្តយន្តការភូមិឃុំមានសុវត្ថិភាពរបស់រាជរដ្ឋាភិបាលឱ្យបានខ្ជាប់ខ្ជួន ។
ម្ចាស់អាជីវកម្មភោជនីយដ្ឋានមួយកន្លែងនៅលើកោះរ៉ុង លោក បូរ៉ា បានថ្លែងប្រាប់ AMS Economy ឱ្យដឹងថា កាលពីដំបូង កោះនេះ មិនទាន់មានទេសចរស្គាល់ច្រើនប៉ុន្មានទេ គឺមានតែអ្នកនេសាទ ។ ក្រោយមកលោកក៏បានចាប់ផ្ដើមបង្កើតអាជីវកម្មមួយដោយនាំភ្ញៀវទេសចរបរទេស និងភ្ញៀវក្នុងស្រុកមកលេងកម្សាន្តនៅលើកោះរ៉ុង ហើយក្រោយៗមកទៀតក៏មានទេសចរកាន់តែច្រើនមកលេងកោះរ៉ុងជាពិសេសជនបរទេស ធ្វើឱ្យពលរដ្ឋនៅលើកោះនេះកែប្រែពីការប្រកបរបរនេសាទទាំងស្រុង មកប្រកបរបរផ្ដល់សេវាកម្មទេសចរណ៍ជូនភ្ញៀវទេសចរវិញ ដែលរហូតមកដល់ពេលនេះមានកាន់តែច្រើន។
គួររម្លឹកថា បន្ទាប់ពីមានភ្ញៀវទេសចរបរទេសកាន់តែច្រើនចូលទៅកាន់កោះរ៉ុង បានជំរុញឱ្យមានគម្រោងវិនិយោគ និងអភិវឌ្ឍន៍ចូលទៅបណ្ដាក់ទុនជាបន្តបន្ទាប់ ដោយអភិវឌ្ឍន៍កោះរ៉ុងកាន់តែរីកចម្រើន ហើយរាជរដ្ឋាភិបាលក៏បានសម្រេចបង្កើតតំបន់នោះទៅជាទីក្រុង (ក្រុងកោះរ៉ុង ) ដើម្បីទាក់ទាញទេសចរ និងវិនិយោគិនបន្ថែមទៀត ៕
Account
Security
Favourite Content