ភ្នំពេញ ៖ គិតត្រឹមខែកុម្ភៈ ឆ្នាំ២០២៦ ក្រសួង​រៀបចំដែនដី នគរូបនីយកម្ម និងសំណង់​ បានបន្តសម្រេច​បានការ​វាស់វែង​ដីធ្លីនៅទូទាំង​ប្រទេស​កម្ពុជាសរុបចំនួន ១៣ ៧៩៥ ៨៣៧ ក្បាលដី និងបានចេញបណ្ណសម្គាល់ម្ចាស់កម្មសិទ្ធិជូនបងប្អូនប្រជាពលរដ្ឋ​ជា​បន្ត​បន្ទាប់ ជាមួយនឹងការជំរុញការងារនេះបន្ថែម ដើម្បីឱ្យ​បញ្ចប់​ទាំង​ស្រុង​ក្នុងពេល​ឆាប់ៗខាងមុខ ។

បើតាមរបាយការណ៍​ក្រសួង​រៀបចំដែនដី នគរូបនីយកម្ម និងសំណង់ នៅក្នុងសប្ដាហ៍នេះបាន​បង្ហាញថា ក្នុង​ចំណោមក្បាល​ដីដែលបានវាស់វែង​រួចទាំង​ជិត​ ១៤លានក្បាលដីខាងលើនោះ ក្រសួង​បានចេញ​បណ្ណ​ចំនួន​ ៨ ៩៨០ ៩៧២​ក្បាលដី និង​ចែក​បណ្ណជូន​ម្ចាស់​កម្មសិទ្ធិ​បានចំនួន ៨ ២១៤ ៣៣៥ ក្បាល​ដី ហើយបាន និងកំពុង​ជំរុញឱ្យ​មន្ទីរសុរិយោដីតាមបណ្ដាខេត្ត​ឱ្យឆាប់បញ្ចប់ការ​វាស់វែងជាស្ថាពរ ហើយចេញ​បណ្ណ និងចែក​បណ្ណកម្មសិទ្ធិជូនប្រជាពលរដ្ឋឱ្យបានចប់សព្វ​គ្រប់។​

យោងតាមសកម្មភាពដ៏មមាញឹករបស់រដ្ឋមន្ត្រីក្រសួង​រៀបចំដែនដី នគរូបនីយកម្ម​ និងសំណង់​ ក៏ដូចជាសកម្មភាព​មន្ត្រីជំនាញ ​និងរដ្ឋបាលខេត្ត​នៅទូទាំងប្រទេស​បានបង្ហាញថា សម្រាប់ក្បាលដីដែល​បានវាស់វែង​ ចុះបញ្ជី​ និ​ងចេញបណ្ណ ត្រូវ​បានប្រគល់ជូនពលរដ្ឋ​ដែលជា​ម្ចាស់កម្មសិទ្ធិ​​ទាំង​ដីកម្មសិទ្ធិឯកជន និង​ដីជាកម្មសិទ្ធិ​សមូហភាព។ ជាក់ស្ដែង ​ពលរដ្ឋជនជាតិ​ដើមភាគតិច​នៅខេត្ត​ក្រចេះ​ រតនគិរី និ​ងមណ្ឌលគីរី ត្រូវ​បានប្រគល់វិញ្ញា​បន​បត្រ​សម្គាល់អចលនវត្ថុ​សមូហភាពពីក្រសួង​រៀបចំដែនដី​ នគរូបនីយកម្ម និងសំណង់ ដើម្បីទុក​ប្រើប្រាស់ជា​ប្រយោជន៍រួម។​ ក្រៅពីនេះ រដ្ឋបាល​តាម​បណ្ដា​ខេត្តនានានៅទូទាំងប្រទេស ក៏បានបន្តចុះចែក​បណ្ណកម្មសិទ្ធិជូនពលរដ្ឋ​ក្នុងមូលដ្ឋាន​របស់ខ្លួន ជា​បន្ត​បន្ទាប់​ផងដែរ សម្រាប់ឱ្យពលរដ្ឋ​ប្រើប្រាស់​ជា​ប្រយោជន៍​តាមតម្រូវការ ដើម្បីលើកស្ទួយ​ជីវភាព​គ្រួសារ​ ។

គួររម្លឹកថា ជាញឹកញាប់ ឯកឧត្តម ​សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ តែងតែជំរុញឱ្យបញ្ចប់ការវាស់វែង ចុះបញ្ជីដីធ្លី និងចេញបណ្ណសម្គាល់ម្ចាស់កម្មសិទ្ធិជូន​ប្រជាពលរដ្ឋ​ឱ្យបានចប់សព្វ​គ្រប់​ ដើម្បីបញ្ចប់​បញ្ហា​វិវាទដីធ្លីនៅក្នុ​ងប្រទេស​កម្ពុជា។

ឯកឧត្តម​បានលើកឡើងថា ចក្ខុវិស័យ​របស់ក្រសួងរៀបចំដែនដី នគរូបនីយកម្ម និងសំណង់ ក៏ដូចជា​រាជរដ្ឋាភិបាល​ គឺការ​បញ្ចប់​ជម្លោះរឿងព្រំដី​នៅជាប់គ្នា បញ្ចប់វិវាទ​របស់ពលរដ្ឋ​ក្នុងសង្គម​ដោយសារតែបញ្ហាព្រំដីមិនច្បាស់លាស់ ។​ នៅពេលបញ្ចប់​ការ​វាស់វែង​ ចុះបញ្ជីដីធ្លី និងចេញបណ្ណសម្គាល់ម្ចាស់កម្មសិទ្ធិជូន​គ្រប់គ្នា​ បញ្ហា​ជម្លោះព្រំដីនេះ នឹង​លែង​កើត​មាន​ ហើយ​ត្រូវយកពេលវេលា​មក​អភិវឌ្ឍ​ប្រទេស​ឱ្យកាន់តែរឹង​មាំ និងលែង​ខាតពេល​ក្នុងការ​ដោះស្រាយ​វិវាទ​ដីធ្លីតទៅទៀត ។​

បើតាម​ឯកឧត្តម​ឧបនាយករដ្ឋមន្ត្រី សាយ សំអាល់ បានបញ្ជាក់​ថា ដីធ្លីនៅទូទាំង​ប្រទេសកម្ពុជា​នឹង​ចុះ​បញ្ជី​មាន​បណ្ណកម្មសិទ្ធិទាំងអស់ មិនថា​ដីរបស់រដ្ឋ និងជាដីរបស់​ឯកជននោះ​ឡើយ ហើយ​សម្រាប់ដីរបស់រដ្ឋ​នឹ​ងប្រគល់បណ្ណទៅឱ្យក្រសួង​ ស្ថាប័ន ​ជា​អ្នកកាន់​កាប់​ ដូចជា ​ដីរបស់ក្រសួង​បរិស្ថាន ដីរបស់​ក្រសួងវប្បធម៌ ដីរបស់ក្រសួងធនធានទឹក ឬដីរបស់ក្រសួងកសិកម្ម​ រុក្ខា​ប្រមាញ់ និងនេសាទ​ជាដើម ៕

​