សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅទីបំផុត ស្ពានឆ្លងព្រែកកំពង់បាយ និងផ្លូវក្រវាត់ក្រុង ត្រូវបានបើកការដ្ឋានសាងសង់ជាផ្លូវការកាលពីព្រឹកថ្ងៃទី១១ ខែវិច្ឆិកា ឆ្នាំ២០២៥ ដែលជាចំណងដៃថ្មីមួយទៀតសម្រាប់ប្រជាពលរដ្ឋក្នុងខេត្តកំពត ក៏ដូចជាភ្ញៀវទេសចរទៅលេងតាមរមណីយដ្ឋាននានាក្នុងខេត្តកំពត ដែលជាអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។
នៅក្នុងពិធីសម្ពោធបើកការដ្ឋានសាងសង់ស្ពាន និងផ្លូវក្រវាត់ក្រុង ឯកឧត្តម ម៉ៅ ធនិន អភិបាលខេត្តកំពត បានមានប្រសាសន៍ថា គម្រោងស្ពានឆ្លងព្រែកកំពង់បាយ មានប្រវែង ៣៦៧ម៉ែត្រ ទទឹង១៨ម៉ែត្រ នឹងត្រូវសាងសង់ឡើងដើម្បីរំដោះចរាចរណ៍មិនឱ្យកកស្ទះនៅក្នុងក្រុងកំពត ជាពិសេស នៅរដូវកាលបុណ្យទានម្ដងៗ ជាក់ស្ដែង ដូចដែលបានឃើញស្រាប់ នៅរាល់ពេលពិធីបុណ្យទាន និងថ្ងៃសម្រាកនានា កងកម្លាំងបានឈរតម្រៀបគ្នានៅស្ពានថ្មី ដើម្បីរង់ចាំសម្រួលចរាចរណ៍ជូនពលរដ្ឋ និងភ្ញៀវទេសចរដែលមកកម្សាន្តនៅក្នុងខេត្តកំពត ។
ឯកឧត្តម ម៉ៅ ធនិន បានបន្ថែមថា ៖
«ការសាងសង់ស្ពាន និងផ្លូវក្រវាត់ក្រុងក្នុងខេត្តកំពតនេះ នឹងអាចទាក់ទាញភ្ញៀវទេសចរជាតិ និងអន្តរជាតិមកទស្សនានៅក្នុងខេត្តកំពតបន្ថែម ។ តាមរយៈវិស័យទេសចរណ៍នេះដែរ ក៏បានជួយលើកកម្ពស់ជីវភាពពលរដ្ឋក្នុងខេត្ត ជាពិសេសអាជីវករ លក់ដូរ និងការផ្ដល់សេវាជូនភ្ញៀវទេសចរក្នុងខេត្តកំពត អាចរកចំណូលបានបន្ថែមផងដែរ» ។
ទន្ទឹមនឹងការសាងសង់ស្ពាន និងផ្លូវក្រវាត់ក្រុងក្នុងខេត្តនេះដែរ ឯកឧត្តម ម៉ៅ ធនិន ក៏បានបង្ហើបពីគម្រោងសង់ស្ថានីយ៍អគ្គិសនីដើរដោយថាមពលខ្យល់ (កង្ហារ) ដើម្បីទាញយកអគ្គិសនីមកបំពាក់តាមបណ្ដោយផ្លូវ និងស្ពានដែលមានប្រវែងសរុបជាង១០គីឡូម៉ែត្រ ។ ម្យ៉ាងវិញទៀត ទីតាំងបំពាក់កង្ហារ ឬស្ថានីយ៍អគ្គិសនីនេះ នឹងត្រូវរៀបចំឱ្យស្អាត ដើម្បីទាក់ទាញភ្ញៀវទេសចរមកលេងមកថតរូប ដែលអាចនឹងផ្ដល់មុខរបរដល់ពលរដ្ឋក្នុងខេត្តកំពតអាចដាក់លក់ទំនិញ ចំណីអាហារ ឬវត្ថុអនុស្សាវរីយ សម្រាប់ភ្ញៀវទេសចរផងដែរ ។ ក្រៅពីនេះ រដ្ឋបាលខេត្តកំពតក៏បានបង្ហាញពីគម្រោងបង្កើតឆ្នេរមួយទៀតនៅតាមបណ្ដោយព្រែក សម្រាប់ភ្ញៀវទេសចរមកលេងកម្សាន្ត ដូច្នេះ នាពេលអនាគត ខេត្តកំពតនឹងកាន់តែមានសក្ដានុពលទាក់ទាញកាន់តែខ្លាំង។
លោក លឹម រដ្ឋា ភ្នាក់ងារអចលនទ្រព្យមួយរូបប្រចាំខេត្តកំពត និងកែប បានលើកឡើងថា សមិទ្ធផលថ្មីៗ ជាពិសេសក្នុងវិស័យទេសចរណ៍ បានធ្វើឱ្យអ្នកស្វែងរកដីធ្លីនៅក្នុងខេត្តនេះមានកាន់តែច្រើន ដោយខ្លះទិញសម្រាប់ទុកលក់ចំណេញ ហើយខ្លះទៀតទិញដីសម្រាប់អភិវឌ្ឍន៍គម្រោងរបស់ខ្លួននៅពេលអនាគត ។
គួររម្លឹកថា តាមផែនការចក្ខុវិស័យរបស់រាជរដ្ឋាភិបាល ដែលមានក្រសួងរៀបចំដែនដី នគរូបនីយកម្ម និងសំណង់ ជាសេនាធិការ គ្រោងនឹងសាងសង់ផ្លូវជិះកង់តាមបណ្ដោយឆ្នេរសមុទ្រកម្ពុជាចាប់ពីខេត្តកែប ដល់ខេត្តកោះកុង ដោយឆ្លងកាត់ខេត្តកំពត និងខេត្តព្រះសីហនុ ។ ការសាងសង់ផ្លូវជិះកង់នេះ នឹងទាក់ទាញភ្ញៀវទេសចរទៅកាន់តំបន់ឆ្នេរកាន់តែច្រើន ហើយអាចបង្កើតព្រឹត្តិការណ៍ទេសចរណ៍នានាបានផងដែរ ៕
Account
Security
Favourite Content