សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងរយៈពេលប៉ុន្មានឆ្នាំចុងក្រោយនេះ ខេត្តព្រះសីហនុហាក់ទទួលបានការវិនិយោគច្រើនឡើងវិញ ទាំងគម្រោងវិនិយោគដែលមានប្រភពទុនក្នុងស្រុក និងគម្រោងវិនិយោគមានប្រភពទុនពីបរទេស ជាក់ស្ដែងគ្រាន់តែគម្រោងវិនិយោគចំនួនពីរប៉ុណ្ណោះ មានទុនរហូតដល់ ២១ពាន់លានដុល្លារអាមេរិក និងអាចជួយឱ្យខេត្តព្រះសីហនុកាន់តែលេចធ្លោរ និងទាក់ទាញវិនិយោគិនបរទេសជាច្រើនទៀតមកបណ្ដាក់ទុន ។
គម្រោងចំនួនពីរដែលមានទុនវិនិយោគរហូតដល់ ២១ពាន់លានដុល្លារ និងកំពុងមានភាពមមាញឹកអភិវឌ្ឍន៍ហេដ្ឋារចនាសម្ព័ន្ធក្នុងខេត្តព្រះសីហនុ រួមមានគម្រោងអភិវឌ្ឍន៍ឆ្នេរមាស ឆ្នេរប្រាក់ និងគម្រោង Bay Of Light ស្ថិតនៅក្នុងទីក្រុងថ្មីនៃខេត្តព្រះសីហនុ ដែលរាជរដ្ឋាភិបាលទើបតែបង្កើតគឺក្រុងកំពង់សោម ។
លោក Fu Hang អគ្គនាយកក្រុមហ៊ុន យិះចៀ ដែលជាក្រុមហ៊ុនអភិវឌ្ឍន៍ ឆ្នេរមាស ឆ្នេរប្រាក់ នៅក្នុងខេត្តព្រះសីហនុ បានមានប្រសាសន៍ គម្រោងអភិវឌ្ឍន៍ឆ្នេរមាស ឆ្នេរប្រាក់ គ្រោងចំណាយទុនវិនិយោគប្រមាណ ៥ពាន់លានដុល្លារអាមេរិក ដោយផ្ដោតលើវិស័យទេសចរណ៍ ហើយរហូតមដល់ពេលនេះ ក្រុមហ៊ុនបានចំណាយទុនអស់ប្រមាណ៦០០លានដុល្លារអាមេរិកហើយលើការសាងសង់ រួមទាំងហេដ្ឋារចនាសម្ព័ន្ធក្នុងតំបន់ផងដែរ ។
លោកបន្តថា គម្រោងវិនិយោគនេះ ជាគម្រោងវិនិយោគដែលត្រូវការពេលវេលាយូរក្នុងការអភិវឌ្ឍ និងត្រូវសាងសង់ជាដំណាក់កាល ។ បច្ចុប្បន្ននេះ ក្រុមហ៊ុនបានសាងសង់នូវរីសត កោះសំពោច ឬគេនិយមហៅថា កោះរាជបុត្រ និងមានសមិទ្ធផលទេសចរណ៍មួយចំនួនទៀត ដែលកំពុងទាក់ទាញភ្ញៀវទេសចរជាតិ និងអន្តរជាតិមកទស្សនា និងកម្សាន្ត ។
លោកបន្ថែមថា បច្ចុប្បន្ននេះ ភ្ញៀវទេសចរទាំងជាតិ និងអន្តរជាតិ មកទស្សនា និងកម្សាន្តនៅក្នុងតំបន់អភិវឌ្ឍន៍ឆ្នេរមាសឆ្នេរប្រាក់ប្រមាណ ៣០០០នាក់ក្នុងមួយថ្ងៃ ជាពិសេសនៅក្នុងថ្ងៃសៅរ៍ និងថ្ងៃអាទិត្យ ហើយភាគច្រើនភ្ញៀវទេសចរមកកម្សាន្តនៅតំបន់រមណីយដ្ឋានឆ្នេរមាសឆ្នេរប្រាក់មានចំនួនច្រើនជាងគេ ។
លោក Donald Yeo នាយកផ្នែកលក់នៃក្រុមហ៊ុន Canopysands ដែលជាក្រុមហ៊ុនអភិវឌ្ឍន៍លើគម្រោង Bay Of Light ក្នុងតំបន់រាម បានមានប្រសាសន៍ថា គម្រោង Bay Of Light ជាគម្រោងធំមួយប្រចាំខេត្តព្រះសីហនុ ក៏ដូចជាក្នុងប្រទេសកម្ពុជាទាំងមូលផងដែរ ។ គម្រោងនេះ មានទុនវិនិយោគសរុបប្រមាន១៦ពាន់លានដុល្លារអាមេរិក និងជាគម្រោងអភិវឌ្ឍន៍យូរអង្វែង ។
លោកបន្តថា រហូតមកដល់ពេលនេះ គម្រោង Bay Of Light បានចំណាយទុនអស់ប្រមាណ១២០០លានដុល្លារអាមេរិកហើយ ក្នុងការសាងសង់ហេដ្ឋារចនាសម្ព័ន្ធនិង ការរៀបចំទីតាំង ។ គម្រោងនេះ ត្រូវការពេលវេលាប្រមាណជាង៣០ឆ្នាំ ដើម្បីបញ្ចប់ទាំងស្រុង ពីព្រោះដៃគូវិនិយោគនៅក្នុងគម្រោងនេះ សុទ្ធតែជាក្រុមហ៊ុនធំៗល្បីៗមកពីបរទេស និងត្រូវការពេលវេលាសិក្សា និងរៀបចំដំណើរការវិនិយោគយូរ ។
ឯកឧត្តម ម៉ាង ស៊ីណែត អភិបាលខេត្តព្រះសីហនុ បានមានប្រសាសន៍ថា រាជរដ្ឋាភិបាលបានកំណត់យកខេត្តព្រះសីហនុជាទិសដៅនៃការអភិវឌ្ឍ និងកំណត់យកខេត្តនេះគឺជាតំបន់សេដ្ឋកិច្ចគំរូពហុបំណង ។ សក្ដានុពលនៅក្នុងខេត្តព្រះសីហនុនាពេលនេះ មានស្ទើរតែគ្រប់វិស័យ ជាពិសេសវិស័យទេសចរណ៍ និងអចលនទ្រព្យអគារខ្ពស់ៗ ។
ឯកឧត្តមបន្តថា ខេត្តព្រះសីហនុស្វាគមន៍រាល់វិនិយោគិនមកពីគ្រប់ទិសទី មិនថាមកពីប្រទេសចិន ប្រទេសថៃ អង់គ្លេស អាមេរិក រុស្ស៊ី នោះទេ សំខាន់ឱ្យតែគេចង់វិនិយោគពិតប្រាកដដែលអាចបង្កើតការងារ និងប្រាក់ចំណូលដល់ពលរដ្ឋ ក៏ដូចជាជំរុញកំណើនសេដ្ឋកិច្ចក្នុងខេត្តផងដែរ ៕
Account
Security
Favourite Content