បរទេស៖ យោងតាមប្រភពព័ត៌មានពី Vietnam Plus បានរាយការណ៍ថា វៀតណាម បានក្លាយទៅជាមជ្ឈមណ្ឌលដែលកំពុងរីកចម្រើនផ្នែកឧស្សាហកម្មគ្រឿងបង្គុំបន្ទះឈីប semiconductor ដែលទាក់ទាញគម្រោងវិនិយោគបរទេសបានចំនួន ១៧៤ ជាមួយនឹងដើមទុនចុះបញ្ជីសរុបជិត ១១,៦ ពាន់លានដុល្លារអាម៉េរិក។

​លោក Nguyen Chi Dung រដ្ឋមន្ត្រី​ក្រសួង​ផែនការ និង​វិនិយោគរបស់វៀតណាម បានគូសបញ្ជាក់ពីការប្តេជ្ញាចិត្តរបស់ប្រទេសក្នុងការជំរុញឧស្សាហកម្មតាមរយៈគោលនយោបាយចម្រាញ់ ការរៀបចំកម្មវិធីអភិវឌ្ឍន៍ធនធានមនុស្ស យុទ្ធសាស្ត្រអភិវឌ្ឍន៍ឧស្សាហកម្មគ្រឿងផ្គុំឈីប semiconductor និងប្រព័ន្ធអេកូឡូស៊ី។ បន្ថែមពីនេះ ក្រសួងផែនការ និងវិនិយោគវៀតណាមក៏បានសហការជាមួយក្រុមហ៊ុនបច្ចេកវិទ្យាយក្ស ដូចជា Qualcomm, Google, Meta, LAM Research, Qorvo និង AlChip ផងដែរ ជាមួយនឹងផែនការជាក់លាក់ដើម្បីផ្លាស់ប្តូរខ្សែសង្វាក់ផ្គត់ផ្គង់របស់ពួកគេទៅកាន់វៀតណាម បង្កើតមជ្ឈមណ្ឌលស្រាវជ្រាវ និងពង្រីកប្រតិបត្តិការផលិតកម្មនៅក្នុងប្រទេស។

កាលពីថ្ងៃទី ៥ ខែធ្នូ រដ្ឋាភិបាលវៀតណាម និងក្រុមហ៊ុនបច្ចេកវិទ្យាអាមេរិក NVIDIA បានចុះហត្ថលេខាលើកិច្ចព្រមព្រៀងសហប្រតិបត្តិការដ៏សំខាន់មួយ។ NVIDIA មានគោលបំណងបង្កើតមជ្ឈមណ្ឌលស្រាវជ្រាវ និងអភិវឌ្ឍន៍ និងមជ្ឈមណ្ឌលទិន្នន័យ AI នៅក្នុងប្រទេសវៀតណាម ដោយសន្យាថានឹងផ្តល់នូវការរីកចម្រើនផ្នែកបច្ចេកវិទ្យាដែលនឹងមានឥទ្ធិពលយ៉ាងសំខាន់លើឧស្សាហកម្មទាំងមូល។

លោក Dung យល់ឃើញថា ឱកាសដ៏កម្រនេះអាចជំរុញឲ្យវៀតណាមចូលទៅក្នុងខ្សែសង្វាក់ផ្គត់ផ្គង់គ្រឿងផ្គុំឈីប semiconductor សកលលោក ប៉ុន្តែអំពាវនាវឲ្យមានការចូលរួមពីក្រសួង អាជីវកម្ម សាកលវិទ្យាល័យស្រាវជ្រាវ និងអ្នកជំនាញទាំងក្នុងស្រុក និងបរទេស។

លោកបានលើកឡើងពីសារៈសំខាន់នៃការប្រមូលផ្តុំធនធាន ដើម្បីសម្រេចបាននូវគោលដៅដែលមានចែងក្នុងផែនការ និងយុទ្ធសាស្ត្រអភិវឌ្ឍន៍ធនធានមនុស្សដែលត្រូវបានអនុម័ត។ ការបង្កើនកិច្ចសហប្រតិបត្តិការអន្តរជាតិ និងការចូលរួមយ៉ាងសកម្មជាមួយសាជីវកម្ម semiconductor និង AI គឺជារឿងសំខាន់ ដោយផ្តោតជាពិសេសលើគម្រោងការវេចខ្ចប់កម្រិតខ្ពស់ ដែលជារបកគំហើញនៅក្នុងឧស្សាហកម្ម semiconductor របស់វៀតណាម។

លោក Dung បានគូសបញ្ជាក់ពីសសរស្តម្ភសំខាន់ៗចំនួន ៣ សម្រាប់ភាពជោគជ័យមរួមមាន៖ យន្តការ និងគោលនយោបាយ, ហេដ្ឋារចនាសម្ព័ន្ធ, និងកម្លាំងពលកម្មប្រកបដោយគុណភាព។ មិនត្រឹមតែប៉ុណ្ណោះ ការទាក់ទាញអ្នកមានទេពកោសល្យ ជាពិសេសអ្នកជំនាញមកពីជុំវិញពិភពលោក ក៏ជារឿងសំខាន់ក្នុងការជំរុញកំណើននៃឧស្សាហកម្មនេះផងដែរ។

តាមការពិតទៅ វៀតណាម គឺជាប្រទេសផលិតគ្រឿងអេឡិចត្រូនិកដែលមានឥទ្ធិពលមួយរួចទៅហើយ ដោយសារខ្លួននៅជិតប្រទេសចិន និងតម្លៃពលកម្មទាប ខណៈដែលភាគច្រើននៃប្រជាជន​វៀតណាម​មាន​មហិច្ឆតា​ក្នុងការខំ​ប្រឹង​រក​លុយ។ លើសពីនេះ វៀតណាម សម្បូរប្រជាជនវ័យក្មេងអាយុក្រោម ៣៥ ឆ្នាំដែលមានអត្រា ៦៤ ភាគរយនៃចំនួនប្រជាជនសរុប ដែលធ្វើឱ្យខ្លួនងាយស្រួលក្នុងរៀបចំកម្លាំងពលកម្មទៅតាមប្រភេទនៃឧស្សហកម្ម។ បន្ថែមពីនេះ គុណសម្បត្តិនៃប្រជាសាស្ត្រវៀតណាមបានផ្តល់នូវអត្ថប្រយោជន៍តាមរយៈកម្លាំងពលកម្ម ទាំងបច្ចុប្បន្ន និងអនាគត ដែលផ្ទុយស្រឡះពីប្រទេសមួយចំនួនក្នុងតំបន់ ក៏ដូចជាពិភពលោកដែលភាគច្រើនប្រជាជនមានវ័យចំណាស់។ ទន្ទឹមនឹងនេះ រដ្ឋាភិបាល​វៀតណាម​បាន​ជំរុញ​បរិយាកាស​អាជីវកម្ម​តាមរយៈការ​ប្រើ​វិធីសាស្ត្រ​សកម្ម​ដើម្បី​ទាក់ទាញ​ការ​វិនិយោគ​បរទេស។ នៅក្នុងរបាយការណ៍របស់ធនាគារពិភពលោក វៀតណាម ជាប់ចំណាត់ថ្នាក់ទី ៧០ ក្នុងចំណោមប្រទេស ១៩០ ដែលមានភាពងាយស្រួលក្នុងការធ្វើធុរកិច្ច។

បច្ចុប្បន្ននេះ ឧស្សាហកម្ម semiconductor របស់ពិភពលោកត្រូវបានចែកចាយ និងអភិវឌ្ឍមិនស្មើគ្នាជាមួយនឹងកំណើនខ្លាំងបំផុតនៅក្នុងសេដ្ឋកិច្ចនៃប្រទេសធំៗមួយចំនួនដូចជា សហរដ្ឋអាមេរិក កូរ៉េខាងត្បូង ជប៉ុន ចិន អឺរ៉ុប និងកោះតៃវ៉ាន់។ ផ្អែកលើហេតុផលផ្សេងៗគ្នាជាច្រើន ឧស្សាហកម្ម semiconductor មាននិន្នាការធ្វើពិពិធកម្ម ដោយការផលិត R&D និងការផ្គត់ផ្គង់ត្រូវបានផ្លាស់ប្តូរទីតាំងទៅកាន់ប្រទេសផ្សេងៗទៀតដែលមានតម្លៃពលកម្ម និងផលិតកម្មថោក។ មិនត្រឹមតែប៉ុណ្ណោះ ភាពតានតឹងភូមិសាស្ត្រនយោបាយ បានជំរុញឱ្យក្រុមហ៊ុនធ្វើពិពិធកម្មផលិតកម្មរបស់ពួកគេនៅឆ្ងាយពីប្រទេសចិន ជាពិសេសនៅក្នុងវិស័យបច្ចេកវិទ្យាសំខាន់ៗដូចជា​ បន្ទះឈីបជាដើម។ សកម្មភាពទាំងនេះកំពុងបង្ហាញពីឱកាសថ្មីមួយសម្រាប់ប្រទេសផ្សេងទៀតក្នុងការអភិវឌ្ឍឧស្សាហកម្មបន្ទះឈីបផ្ទាល់ខ្លួនរបស់ពួកគេ និងបង្កើតការប្រកួតប្រជែងកាន់តែខ្លាំងឡើងសម្រាប់ការវិនិយោគ។ ជាមួយគ្នានេះ ដើម្បីទាក់ទាញការវិនិយោគពីបរទេស វៀតណាម ត្រូវអភិវឌ្ឍឧស្សាហកម្ម semiconductor រួមជាមួយនឹងឧស្សាហកម្មធំៗ និងឧស្សាហកម្មបំប្លែងឌីជីថលបន្ថែមទៀត៕