សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ការ៉េម ត្រូវបានរាប់ថាជាបង្អែមកកម្យ៉ាងដែលគេស្គាល់យ៉ាងទូលំទូលាយ និងធ្លាប់ទទួលទាន ជាពិសេសក្មេងៗដែលនិយមចូលចិត្តញ៉ាំ ដោយសារតែវាមានរសជាតិផ្អែមឆ្ងាញ់ ត្រជាក់ ឈ្ងុយ ជាមួយនឹងការរៀបចំតុបតែងលម្អយ៉ាងទាក់ទាញ។ ដោយឡែកនៅពេលបច្ចុប្បន្ននេះ មានអាជីវកម្មខ្នាតតូចប្រភេទបានបង្កើតការ៉េមរសជាតិដូងយ៉ាងឈ្ងុយឆ្ងាញ់ និងមានប្រជាប្រិយភាពបំផុត ដែលអាចទទួលបានចំណូលពីការលក់ប្រចាំថ្ងៃគួរឱ្យកត់សម្គាល់។
លោក ប៉ាន់ គីមឆាយ ជាអាជីវករមានជំនាញផ្នែកកែច្នៃ និងបង្កើតជាអាជីវកម្មការ៉េមដូងតពីគ្រួសារម្នាក់ដែលកំពុងទទួលបានការគាំទ្រពីអតិថិជនបានប្រាប់ AMS ឱ្យដឹងថា ៖
“ខ្ញុំជ្រើសរើសចាប់យកមុខរបរលក់ការ៉េមនេះដោយសារតែខ្ញុំធ្លាប់បានដឹង និងចេះជំនាញស្រាប់ពីគ្រួសារ គួបផ្សំនឹងក្ដីស្រឡាញ់ផងនោះ ក៏ដក់អារម្មណ៍នៅជាមួយនឹងអាជីវកម្មផលិតការ៉េមនេះតែម្ដង ម្យ៉ាងទៀតក្នុងអាជីពនេះខ្ញុំចង់ឃើញស្នាមញញឹមរបស់អតិថិជនដែលទទួលបាននូវអារម្មណ៍រីករាយ ញ៉ាំការ៉េមផ្អែមឆ្ងាញ់ដោយមានទំនុកចិត្ត និងគ្មានក្ដីព្រួយបារម្ភអ្វីឡើយ”
ពាក់ព័ន្ធទៅនឹងអាជីវកម្មលក់ការ៉េមដូងនេះ លោក ប៉ាន់ គីមឆាយ បានចែករំលែកបទពិសោធផ្ទាល់ខ្លួនថា មុខរបរលក់ការ៉េម ស្ដាប់ទៅដូចជាមុខរបរតូចតាច ងាយៗ តែវាទាមទារឱ្យមានភាពអំណត់ ព្យាយាម តស៊ូ និងភាពឈ្លាសវៃក្នុងការលក់ជូនអតិថិជន ជាពិសេស ការផលិតទៀតសោតត្រូវតែប្រកបដោយអនាម័យ មានរសជាតិឆ្ងាញ់ និងមានសោភ័ណភាពគួរជាទីទាក់ទាញ។
លោកបន្ថែមថា ៖
“ការ៉េមមានច្រើនប្រភេទ និងច្រើនរសជាតិ ដូចជា រសជាតិដូង ត្រាវ សូកូឡា តើយ ខ្នុរ ជាដើម តែសម្រាប់ខ្ញុំផ្ទាល់គឺជ្រើសរើសយករសជាតិដូង ដែលជារសជាតិដើម និងជាដំណាំសម្បូរក្នុងស្រុកងាយរកបាន។ សម្រាប់ការផលិតក៏អាស្រ័យលើធនធាន ចំណង់ចំណូលចិត្ត និងតម្រូវការទីផ្សារយើងសព្វថ្ងៃដែរ ប៉ុន្តែខ្ញុំបានផ្ដោតទៅលើរសជាតិដូងដែលជារសជាតិដើមស្រាប់ រួមបញ្ចូលទាំងខ្ទិះដូង និងស្ករស ហើយគ្រឿងផ្សំគោល ដែលជាផ្លែដូង និងខ្ទិះដូង គឺងាយរកទិញ ទាំងប្រភេទដូងក្រអូប និងដូងធម្មតា ដែលមានតម្លៃសមរម្យ”
បច្ចុប្បន្ននេះ សម្រាប់អាជីវកម្មលក់ការ៉េមដូងតាមរទេះរបស់អាជីវករខាងលើកំពុងដំណើរការបានយ៉ាងរលូន និងមានសាខាចំនួន២ទីតាំង ដោយមួយកន្លែងស្ថិតនៅម្ដុំចោមចៅ ហើយមួយកន្លែងផ្សេងទៀតស្ថិតនៅក្នុងខណ្ឌសែនសុខ ដែលជាធម្មតា លោកអាចលក់បានការ៉េមចាប់ពី ១៥-២០គីឡូក្រាមក្នុងមួយថ្ងៃ ហើយការលក់នេះទៀតសោតក៏អាស្រ័យតាមរដូវការបុណ្យទាន ថ្ងៃឈប់សម្រាក និងកត្តាអាកាសធាតុផងដែរ ខណៈដែលអតិថិជនដែលគាំទ្រទទួលទានមានទាំងក្មេងៗ និងមនុស្សធំ ហើយក៏មានមនុស្សវ័យកណ្ដាល រួមទាំងមនុស្សចាស់ដែរ ដោយអ្នកខ្លះដាក់ជាមួយនំស្រួយៗ ខ្លះដាក់កូនកែវតូចៗ ហើយអ្នកខ្លះដាក់ក្នុងត្រឡោកដូង ដែលវាក៏ជាវិធីមួយប្រើដូងឱ្យអស់លទ្ធភាព និងមានភាពទាក់ទាញផងដែរ។
គួរបញ្ជាក់ដែរថា ការ៉េមដូងរបស់គ្រួសារលោក គីមឆាយ បានចាប់ផ្ដើមលក់តាំងពីឆ្នាំ១៩៩៧ ស្ថិតនៅសង្កាត់លេខ៤ ក្រុងព្រះសីហនុ ខេត្តព្រះសីហនុ ដោយគ្រានោះមានអ្នកប្រកបអាជីវកម្ម និងលក់ការ៉េមប្រភេទនេះប្រមាណជាង ១០គ្រួសារប៉ុណ្ណោះ និងដាកលក់ចល័តនៅតាមកង់ តាមម៉ូតូ ឬនៅតាមមាត់ឆ្នេរសមុទ្រជាដើម។ បន្ទាប់មកទៀត លោក និងគ្រួសារក៏បានផ្អាកមុខរបរនេះប្រមាណ ៦ឆ្នាំដោយសារតែត្រូវផ្លាស់ប្ដូរទីលំនៅដ្ឋានមករាជធានីភ្នំពេញវិញ លុះដល់ឆ្នាំ២០១៤ លោកក៏ចាប់ដំណើរការអាជីវកម្មគ្រួសារឡើងវិញក្រោមយីហោ «ការ៉េមដូងខ្មែរ១៩៩៧» រក្សានូវរសជាតិដើម និងរូបមន្តដដែល ក៏ប៉ុន្តែមានបន្ថែមនូវប្រភេទការ៉េមប្រភេទថ្មីៗ។
ដោយឡែក ចំពោះដើមទុនដំបូងក្នុងការចាប់ផ្តើមអាជីវកម្មលើកទី២នេះ លោកពុំមានចំណាយអ្វីច្រើននោះទេ ដោយសារតែជាមុខរបរចាស់បន្តវេនពីគ្រួសារ ប៉ុន្តែអ្វីដែលសំខាន់គឺក្ដីស្រឡាញ់ ទឹកចិត្ត និងការប្រឹងប្រែងក្នុងការចាប់យកអាជីពមួយនេះ ដោយគ្រាន់តែបន្ថែមនូវគំនិតច្នៃប្រឌិតធ្វើយ៉ាងណាមានសោភ័ណភាព និងអាចបំពេញតម្រូវការរបស់អតិថិជនបាន។
សម្រាប់ថ្ងៃអនាគត ម្ចាស់អាជីវកម្មការ៉េមដូង លោក គីមឆាយ បានតាំងចិត្តបន្តការខិតខំរៀនសូត្របន្ថែមទៀត ក៏ដូចជាទទួលយកនូវរាល់មតិយោបល់ពីសំណាក់អតិថិជន ដើម្បីកែលម្អចំណុចខ្វះខាតនានា ដើម្បីធ្វើយ៉ាងណាថែរក្សា និងលើកស្ទួយអាជីវកម្មការ៉េមដែលជាផលិតផលក្នុងស្រុកមួយនេះ។ ជាចុងក្រោយ លោក និងក្រុមគ្រួសារ ក៏សូមថ្លែងអំណរគុណចំពោះបងប្អូនដែលតែងតែគាំទ្រការ៉េមដូងប្រចាំគ្រួសាររបស់លោក ហើយលោកនឹងប្រឹងប្រែង ការពារ លើកស្ទួយមុខរបរនេះ ក៏ដូចជាវិស័យម្ហូបអាហារក្នុងស្រុកឱ្យកាន់តែរីកចម្រើនទៅមុខបន្ថែមទៀត៕
ជីវប្រវត្តិ: ជានិស្សិតនៃសាលកវិទ្យាល័យភូមិន្ទភ្នំពេញ ដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍។ បច្ចុប្បន្ន ជាអ្នករាយការណ៍ព័ត៌មាននៅ AMS Economy ។
របាយការណ៍ថ្មីៗ
មើលទាំងអស់ ➧
អ្នកជំនាញ ៖ ចង់មានសុវត្ថិភាពគណនីហិរញ្ញវត្ថុគប្បីបង្កើនប្រសិទ្ធភាពលេខសម្ងាត់ឱ្យបានរឹងមាំ
• 09/04/2026
ព័ត៌មានទូទៅ
មើលទាំងអស់ ➧
កម្មវិធី «នវានុវត្តន៍បញ្ច្រាស» ជួយធុរកិច្ចថ្មីដោះស្រាយបញ្ហាទីផ្សារ តាមរយៈការបង្កើតជាដំណោះស្រាយប្រកបដោយភាពច្នៃប្រឌិត និង នវានុវត្តន៍
ព្រឹត្តិការណ៍, អាជីវកម្មថ្មី និងនវានុវត្ត
• 14/08/2026
កម្មវិធី «នវានុវត្តន៍បញ្ច្រាស» ជាទុនជួយធុរកិច្ចថ្មីដោះស្រាយបញ្ហាប្រឈមក្នុងទីផ្សារតាមរយៈការបង្កើតដំណោះស្រាយប្រកបដោយភាពច្នៃប្រឌិត នវានុវត្តន៍
ក្រសួងរៀបចំដែនដីទទួលបានគំនិតថ្មីៗបន្ថែម ក្នុងគោលដៅធ្វើឱ្យប្រជាពលរដ្ឋមានលំនៅឋានរស់នៅសមរម្យ
Top News, ព្រឹត្តិការណ៍, អចលនទ្រព្យ
• 14/08/2026
កិច្ចការស្រាវជ្រាវអំពីអចលនទ្រព្យ និងស្ថានភាពលំនៅឋាននេះមានសារៈសំខាន់ គឺផ្ដោតទៅលើការបង្កើតទំនៀមទម្លាប់ និងផ្នត់គំនិតការងារថ្មីមួយ ដែលមានភាពច្បាស់លាស់ និងមិនធ្វើការតាមអារម្មណ៍ដែលនាំឱ្យមានកំហុសឆ្គងច្រើន
ការស្ទង់មតិពី ៣៦ ប្រទេសបង្ហាញថា ចិន ទទួលបានប្រជាប្រិយភាពជាងអាមេរិកនៅលើឆាកអន្តរជាតិ
ព្រឹត្តិការណ៍, អាជីវកម្មថ្មី និងនវានុវត្ត
• 14/08/2026
ការស្ទង់មតិជាលក្ខណៈអន្តរជាតិដ៏ធំមួយនៅលើបណ្តាប្រទេសចំនួន ៣៦ បានបង្ហាញពីទស្សនៈជាសកល ដែលភាគច្រើនមានទំនោរទៅលើប្រទេសចិនក្នុងផ្លូវវិជ្ជមាន ច្រើនជាងសហរដ្ឋអាមេរិក
កម្មវិធីពិសេសរបស់ AMS ECONOMY
ព័ត៌មានសង្ខេប
Account
Security
Favourite Content