សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បញ្ហាសំណឹក និងទឹកជំនន់ជាញឹកញាប់បានក្លាយទៅជាបញ្ហាដ៏ចម្បងដែលបានធ្វើឲ្យដែនកោះទឹកសាបដ៏ធំបំផុតរបស់ពិភពលោក មួយនៅឥណ្ឌា មានឈ្មោះថា Majuli Island ក្នុងដំណើរវិវត្តបន្តិចម្តងៗលិចលង់ចូលទៅក្នុងទឹកទន្លេ ខណៈដែលមនុស្សរស់នៅកាន់តែតិចហើយការកាប់បំផ្លាញព្រៃឈើក៏មានចំនួនកើនឡើង។ ទោះបីជាយ៉ាងណាក្តីបុរសជនជាតិឥណ្ឌាម្នាក់ដែលជាអ្នករស់នៅលើកោះមួយនេះបានធ្វើឲ្យមានការស្ញប់ស្ញែងយ៉ាងខ្លាំងដោយសារតែគាត់បានចំណាយពេលវេលាស្ទើរពាក់កណ្តាលជីវិតរបស់គាត់ក្នុងការដាំដុះព្រៃឈើឡើងវិញនិងបានផ្តល់ជាជម្រកថ្មីដល់សត្វព្រៃជាច្រើនប្រភេទ។
បុរសជនជាតិឥណ្ឌាដែលត្រូវបានគេស្គាល់ឈ្មោះថា Jadav Payeng កើតនៅថ្ងៃទី៣១ ខែតុលា ឆ្នាំ១៩៥៩ គឺជាសកម្មជនព្រៃឈើដ៏ឆ្នើម និងល្បីល្បាញបំផុតនៅឥណ្ឌា និងក៏ត្រូវបានគេដាក់រហ័សនាមឲ្យផងដែរថា ជា Forest Man of India ។ លោកបានចាប់ផ្តើមដាំដើមឈើលើតំបន់ដែលគ្មានព្រៃឈើចាប់តាំងតែពីឆ្នាំ១៩៧៩មកម្ល៉េះ ហើយបានបន្តធ្វើវារហូតមកដល់បច្ចុប្បន្ន។ ជាលទ្ធផលព្រៃឈើដែលបានកកើតឡើងវិញដោយស្នាដៃរបស់គាត់មានទំហំរហូតទៅដល់ ៥៥០ហិកតា ឬប្រហាក់ប្រហែលទៅនឹងសួនឧទ្យានដ៏ល្បីនៅទីក្រុងញូវយ៉កសហរដ្ឋអាមេរិកដែលមានឈ្មោះថា Central Park។
លោក Jadav បានថ្លែងប្រាប់ទៅកាន់ក្រុមអ្នកកាសែតនាពេលកន្លងមកថា ពីដំបូងឡើយនៃការចាប់ផ្តើមការងារពិតជាមានផលលំបាកខ្លាំងណាស់ ព្រោះការដាំដុះត្រូវការពេលវេលា និងការមើលថែខ្លាំង ប៉ុន្តែមកដល់ពេលនេះការលូតលាស់ និងដាំដុះថ្មីមានភាពងាយស្រួលដោយសារភាគច្រើនដំណាំដើមឈើគ្រប់ប្រភេទវាបានដុះឡើងដោយខ្លួនឯង និងកាន់តែច្រើនឡើង។
ចាប់តាំងតែពីព្រៃឈើចាប់ផ្តើមកកើតឡើងវិញក្លាយជាព្រៃក្រាស់ហើយនោះ លោកបានអះអាងថាមានប្រភេទសត្វកម្រជាច្រើនចាប់ផ្តើមវិលត្រឡប់មករស់នៅទីនេះវិញដែលក្នុងនោះមានដំរីយ៉ាងហោចណាស់ជាង១០០ក្បាលបានមករស់នៅជារៀងរាល់៣ខែម្តងក្នុងមួយឆ្នាំព្រមទាំងសត្វផ្សេងទៀតដូចជាសត្វខ្លាសត្វរមាស និងក្តាន់ជាដើមផង។ លោកបានបន្តដែរថា ក្តីសុបិនរបស់លោកគឺលោកចង់ធ្វើឲ្យកោះ Majuli Island និងទីក្រុង Jorhat នឹងពោរពេញទៅដោយព្រៃឈើគ្រប់ទីកន្លែង ហើយលោកនឹងបន្តធ្វើការងារទាំងនេះរហូតដល់ដង្ហើមចុងក្រោយ ហើយបើមានអ្នកណាម្នាក់មកកាប់បំផ្លាញព្រៃឈើដែលគាត់បានដាំនោះពួកគេត្រូវតែសម្លាប់លោកជាមុនសិនទៅ៕
Account
Security
Favourite Content