បរទេស ៖ បច្ចេកវិទ្យាយឆ្លាតវ៉ៃ AI នៅក្នុងវិស័យយោធាបានក្លាយជាប្រធានបទដ៏ចម្រូងចម្រាសរវាងមហាអំណាច និងអ្នកជំនាញជាច្រើនលើពិភពលោក ប៉ុន្តែថ្មីៗនេះ កិច្ចប្រជុំកំពូលរបស់ពិភពលោកសម្រាប់សម្រេចគោលការណ៍រួមថា តើ AI អាចដាក់បញ្ចូលក្នុងវិស័យយោធាបានឬយ៉ាងណា​នោះត្រូវបានបង្កើតឡើង។

កិច្ចប្រជុំដែលហៅកាត់ថា REAIM (Responsible AI in the Military Domain) បានប្រព្រឹត្តឡើងជាលើកដំបូងនៅក្នុងទីក្រុង Hague កាលពីឆ្នាំកន្លងទៅ និង​កំពុងធ្វើឡើងជាលើកទី២កាលពីដើមសប្តាហ៍នេះនៅទីក្រុង Seoul ដោយមានក្រុមមន្ត្រីជាន់ខ្ពស់ផ្នែកការពារជាតិមកពីបណ្តាប្រទេសជាង៦០ រួមមានទាំងចិន និងអាមេរិកផងដែរ។

លទ្ធផលប្រជុំនៅក្នុងឆ្នាំនេះត្រូវបានប្រកាសជាផ្លូវការ ហើយក្នុងនោះមានការភ្ញាក់ផ្អើលយ៉ាងខ្លាំងមែនទែនដោយសារតែប្រទេសដល់ទៅ៦០បានបង្ហាញអំពីការគាំទ្រទៅលើគោលការណ៍ក្នុងការប្រើប្រាស់បច្ចេកវិទ្យា AI នៅក្នុងវិស័យយោធា ខណៈដែលប្រទេសចិនតែម្នាក់ឯងបានធ្វើពហិកាមិនគាំទ្រទៅលើគោលការណ៍អនុញ្ញាតនេះទៅវិញ។

នៅក្នុងឯកសារគោលការណ៍ដែលមិនទាន់ត្រូវចុះហត្ថលេខាជាធរមាននោះ ប្រទេសទាំង៦០ក៏បានបញ្ចូលទាំងការអនុញ្ញាតឲ្យដ្រូនដែលមានបំពាក់បច្ចេកវិទ្យា AI អាចត្រូវបានប្រើប្រាស់បានដោយកងកម្លាំងយោធារបស់អ៊ុយក្រែនទៀតផង។

រដ្ឋមន្ត្រីក្រសួងការពារជាតិរបស់ហូឡង់ លោក Ruben Brekelmans ថ្លែងប្រាប់ក្រុមអ្នកយកព័ត៌មានរបស់រ៉យទ័រថា ៖

«ពួកយើងអាចឈានបានមួយជំហ៊ានដ៏ជោគជ័យនៅក្នុងឆ្នាំនេះ។ កាលពីឆ្នាំទៅ ពួកយើងពិភាក្សាគ្នាតែទៅលើព័ត៌មានដែលយើងមាននៅក្នុងដៃដើម្បីធ្វើយ៉ាងណាអាចបង្កើតបានជាគោលការណ៍រួមមួយប៉ុណ្ណោះ។ គោលការណ៍រួមនេះមានបញ្ចូលទាំងការដាក់ចេញនូវប្រភេទនៃការវាយតម្លៃហានិភ័យដែលគួរតែត្រូវបានធ្វើឡើង លក្ខខណ្ឌសំខាន់ៗដូចជាការប្រើប្រាស់ក្រោមការគ្រប់គ្រងរបស់មនុស្ស និងរបៀបដែលវិធានការក្នុងការកសាងទំនុកចិត្តអាចត្រូវបានធ្វើឡើងដើម្បីគ្រប់គ្រងហានិភ័យទាំងឡាយដែលអាចកើតមាន»។

ក្នុងចំណោមព័ត៌មានលម្អិតដែលបានបន្ថែមនៅក្នុងឯកសារនោះក៏មានសរសេរអំពីតម្រូវការដើម្បីការពារ AI ពីការប្រើប្រាស់ដើម្បីគោលបំណងរីកសាយអាវុធប្រល័យលោក (WMD) ការប្រើប្រាស់ដោយតួអង្គមិនល្អមួយចំនួនរួមទាំងក្រុមភេរវករ ជាពិសេសកិច្ចការងារទាំងឡាយដែលមានការពាក់ព័ន្ធទៅនឹងអាវុធនុយក្លេអ៊ែរ។

គួរឲ្យដឹងដែរថា កិច្ចប្រជុំកំពូលនៅទីក្រុង Seoul ក្នុងឆ្នាំនេះត្រូវបានរៀបចំឡើង និងដឹកនាំដោយប្រទេសហូឡង់ សិង្ហបុរី កេនយ៉ា និងចក្រភពអង់គ្លេស ដោយមានគោលបំណងធានាឱ្យមានការពិភាក្សាពីគ្រប់ភាគីពាក់ព័ន្ធជាច្រើន និងចាំបាច់ជាកិច្ចប្រជុំដែលមិនមានរងឥទ្ធិពលដោយប្រជាជាតិណាមួយ ឬស្ថាប័នណាតែមួយនោះទេ៕