Ecopark គឺជាគម្រោងនៃការអភិវឌ្ឍន៍ទីប្រជុំជន និងទីក្រុងដ៏ធំមួយនៅជាយក្រុងហាណូយ ក្នុងខេត្ត Hung Yen ប្រទេសវៀតណាម មានចម្ងាយប្រមាណជា ១៣គីឡូម៉ែត្រពីកណ្តាលទីក្រុងហាណូយ។

នៅក្នុងដំណាក់កាលទាំង៩នៃគម្រោងទាំងអស់ គេសង្កេតឃើញមានគម្រោងសាងសង់មជ្ឈមណ្ឌលពាណិជ្ជកម្មបណ្តែតទឹកដំបូងបំផុតរបស់ប្រទេសវៀតណាមដែលបានចាប់ផ្តើមការដ្ឋានសំណង់តាំងតែពីខែមេសា ឆ្នាំ២០២១ ។

មជ្ឈមណ្ឌលពាណិជ្ជកម្មដែលប្រមូលផ្តុំទៅដោយអគារពាណិជ្ជកម្មស្ទើរគ្រប់ប្រភេទ ហើយនៅពេលដែលបញ្ចប់ទៅនៃការសាងសង់វានឹងក្លាយទៅជាមជ្ឈមណ្ឌលពាណិជ្ជកម្មខ្នាតយក្សបែបបណ្តែតទឹកមិនធ្លាប់មានឡើយក្នុងប្រទេស ហើយអាចនឹងទាក់ទាញភ្ញៀវមកទស្សនាជារៀងរាល់ឆ្នាំយ៉ាងហោចណាស់ ៥លាននាក់។ គម្រោងនេះនឹងបង្ហាញខ្លួនជាមួយនឹងអគារពាណិជ្ជកម្មខ្ពស់ៗចំនួន៣ជាប់ទៅនឹងមាត់ទឹកដែលមានដូចជា អគារ Waterfront Entertainment, អគារ Waterfront Dinning និងអគារ Waterfront Fashion ហើយក្រៅពីនោះក៏មានការសាងសង់អគារផ្សារទំនើប Island Mall តភ្ជាប់គ្នាដោយស្ពានដែលឌីសាញឡើងតាមបែប Venetian style ផងដែរ ។

ផ្សារទំនើបនេះស្ថិតនៅក្រោមការរចនាឡើងដោយក្រុមហ៊ុន Callison Group ដែលជាក្រុមហ៊ុនមានបទពិសោធន៍ក្នុងការរចនាអគារធំបំផុត និងល្បីបំផុតទី៣ របស់ពិភពលោក។ Callison បានអះអាងថា មជ្ឈមណ្ឌលពាណិជ្ជកម្មនេះនឹងក្លាយទៅជាឋានសួគ៍នៅក្នុងប្រទេសវៀតណាមមួយទៀតដែលភ្ញៀវទេសចរមិនអាចរំលងបានឡើយនៅពេលដែលធ្វើដំណើរមកដល់រដ្ឋធានីហាណូយ។

តាមផែនការ ផ្ទៃក្រឡាសរុបរបស់មជ្ឈមណ្ឌលបណ្តែតទឹកនេះនឹងមានទំហំរហូតទៅដល់ច្រើនហិកតា ព្រមជាមួយនឹងអាជីវកម្មម៉ាកយីហោម៉ូតសម្លៀកបំពាក់ល្បីៗជាង១០០កន្លែង ក៏ដូចជាយីហោម្ហូបអាហារល្បីៗ និងមជ្ឈមណ្ឌលកំសាន្តជាច្រើនផ្សេងទៀតផងដែរ។

គួរឲ្យដឹងដែរថា គម្រោងមជ្ឈមណ្ឌលបណ្តែតនេះគឺជាគម្រោងវិនិយោគដោយក្រុមហ៊ុន Ecopark Group ដែលជាក្រុមហ៊ុនអ្នកជំនាញអភិវឌ្ឍលំនៅដ្ឋានដ៏ធំមួយរបស់វៀតណាម ហើយតាមការប៉ាន់ស្មានវិនិយោគសរុបសម្រាប់គម្រោងមជ្ឈមណ្ឌលនេះមានតម្លៃប្រហែលជា៣ទ្រីលានដុង ឬត្រូវជា ១៣២ លានដុល្លារ។

បច្ចុប្បន្នគម្រោងអភិវឌ្ឍរបស់ Ecopark ទាំងមូលនឹងលាតសន្ធឹងលើផ្ទៃដី ៥០០ហិកតា ជាមួយនឹងទុនវិនិយោគប៉ាន់ស្មានជាង ៨,២ ពាន់លានដុល្លារអាមេរិក។ ការអភិវឌ្ឍទាំងមូលដែលបានបែងចែក ជា ៩ ដំណាក់កាល ដោយត្រូវបានគេរំពឹងថានឹងបញ្ចប់ក្នុងរយៈពេល ១៨ឆ្នាំ៕