សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ជារៀងរាល់ឆ្នាំកាកសំណល់ដែលមានប្រភពចេញពីវាយនភ័ណ្ឌដែលជាសម្លៀកបំពាក់គិតត្រឹមប្រទេសបារាំងប៉ុណ្ណោះមានរហូតទៅដល់៧០ម៉ឺនតោន ខណៈដែលប្រមាណ ២ ភាគ ៣ បានបញ្ជូនទៅដល់ទីកន្លែងចាក់សំរាម។
បញ្ហាកាកសំណល់ដែលមានប្រភពមកពីឧស្សាហកម្មវាយនភ័ណ្ឌត្រូវបានក្រុមអ្នកជំនាញបរិស្ថានមើលឃើញថាគឺជាប្រភពដ៏ធំបំផុត ទាំងការបញ្ចេញការបំពុលខ្យល់ និងការបញ្ចេញឧស្ម័នកាបូនឌីអុកស៊ីត ឬមានចំណែកដល់ទៅ ១០ភាគរយនៃការសាយភាយឧស្ម័នកាបូនឌីអុកស៊ីតទាំងអស់របស់ពិភពលោក ដែលក្នុងនោះគេអាចព្យាករណ៍ថា វានឹងអាចកើនឡើងទៅដល់ ២៥ភាគរយនៅត្រឹមឆ្នាំ២០៥០បើមិនមានការទប់ស្កាត់ត្រឹមត្រូវទេនោះ។ ក្រៅពីនោះកាកសំណល់ពីវាយនភ័ណ្ឌនេះក៏ជាចំណែកដល់ទៅ២០ភាគរយនៃការបំពុលទឹកនៅលើពិភពលោកផងដែរហើយមានប្រមាណជា១២ភាគរយប៉ុណ្ណោះនៃកាកសំណល់ទាំងអស់ត្រូវបានយកមកកែច្នៃឡើងវិញ។
ដោយសារមើលឃើញបញ្ហាបែបនេះ រដ្ឋាភិបាលបារាំងបានដាក់ចេញនូវយុទ្ធសាស្ត្រជាកម្មវិធីរដ្ឋដ៏គួរឲ្យចាប់អារម្មណ៍មួយដែលនៅរាល់ពេលដែលពលរដ្ឋទាំងអស់ចាំបាច់ត្រូវការដេរសម្លៀកបំពាក់ដែលរហែក ឬត្រូវជួសជុលនឹងត្រូវបានលើកទឹកចិត្តតាមរយៈការរ៉ាប់រងលើចំណាយសេវាទាំងអស់ ពោលគឺក្នុងចន្លោះពី ៦ផោនទៅ ២៥ផោនក្នុងមួយដង។ កម្មវិធីដ៏ប្លែកនេះត្រូវបានរដ្ឋាភិបាលបារាំងអះអាងថា នឹងអាចក្លាយជាវិធីសាស្ត្រក្នុងការដោះស្រាយបញ្ហាបញ្ចេញកាកសំណល់ដោយវាយនភ័ណ្ឌ និងជួយឲ្យវិស័យសេដ្ឋកិច្ចពឹងផ្អែកលើឧស្សាហកម្មវាយនភ័ណ្ឌមាននិរន្តរភាពកាន់តែខ្លាំងឡើង។
ទោះបីជាយ៉ាងណាក្តី កម្មវិធីជួយចេញថ្លៃដេរ និងជួសជុលសម្លៀកបំពាក់នេះនឹងអាចមានប្រសិទ្ធភាពតែជាមួយនឹងពលរដ្ឋដែលមានទំនួលខុសត្រូវខ្ពស់ចំពោះការប្រើប្រាស់ផលិតផលជាសម្លៀកបំពាក់ប្រចាំថ្ងៃរបស់ពួកគេប៉ុណ្ណោះ ប៉ុន្តែកិច្ចការងារចំាបាច់ធំបំផុតក្នុងវិស័យវាយនភ័ណ្ឌ នោះគឺការជំរុញទឹកចិត្តក្រុមហ៊ុនរោងចក្រវាយនភ័ណ្ឌឲ្យងាកទៅសម្របខ្លួនកាន់តែខ្លាំងឡើងជាមួយនឹងដំណើរការផលិតដែលប្រកបដោយនិរន្តរភាពចំពោះបរិស្ថានវិញ។
គួរកត់សម្គាល់ថា ជាលទ្ធផល បណ្តាក្រុមហ៊ុនយីហោល្បីៗ និងធំៗរបស់ពិភពលោកកំពុងចាប់ផ្តើមដំណើរការផលិត និងឌីសាញសម្លៀកបំពាក់ និងប្រើប្រាស់វត្ថុធាតុដើមដែលងាយនឹងកែច្នៃឡើងវិញព្រមទាំងបន្តជំរុញទឹកចិត្តទៅកាន់អតិថិជនដើម្បីចូលរួមកិច្ចការការងារនេះ។ ជាមួយគ្នានេះ តាមរយៈការកែច្នៃសម្លៀកបំពាក់ចាស់ៗឡើងវិញ ឬបន្តប្រើប្រាស់សម្លៀកបំពាក់ជជុសជាដើម៕
Account
Security
Favourite Content