សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ នាព្រឹកថ្ងៃសុក្រនេះ ទីផ្សារលក់ប្រេងឆៅរបស់អន្តរជាតិត្រូវបានគេសង្កេតឃើញថា តម្លៃប្រេងបានចាប់ផ្តើមហក់ឡើងបន្តិចវិញក្រោយពេលដែលមហាអំណាចសេដ្ឋកិច្ចទាំង២ ចិន និងអាមេរិក បានបង្ហាញពីឥរិយាបថ និងនិន្នាការចូលរួមតុចរចាពិភាក្សាគ្នា ដើម្បីឈានទៅដល់ការដោះស្រាយបញ្ហាជម្លោះពាណិជ្ជកម្ម។
នៅវេលាម៉ោងប្រមាណជា ១ និង ២៦នាទី (ម៉ោងសកល) តម្លៃប្រេងរបស់ Brent បានងើបឡើងប្រមាណជា ៣៨សេន ឬប្រមាណជា ០,៦ភាគរយ ទៅដល់ ៦២,៥១ដុល្លារក្នុងមួយបារ៉ែល ខណៈដែលតម្លៃប្រេងរបស់ West Texas Intermediate បានកើនឡើង ៣៨សេន ឬទៅដល់ ៥៩,៦២ដុល្លារក្នុងមួយបារ៉ែល។
នៅថ្ងៃសុក្រដដែលនេះ ក្រសួងពាណិជ្ជកម្មចិនបានអះអាងថា ភាគីខាងរដ្ឋាភិបាលក្រុងវ៉ាស៊ិនតោន បានបង្ហាញអំពីជំហ៊ានរបស់ខ្លួនដែលអាចអនុញ្ញាតឲ្យមានការពិភាក្សាជាមួយរដ្ឋាភិបាលទីក្រុងប៉េកាំងឡើងវិញ ពោលគឺតាមរយៈសកម្មភាពទំនាក់ទំនង និងផ្តល់ព័ត៌មានរវាងគ្នា។
កន្លងមក បណ្តាប្រទេសផលិតផលប្រេង OPEC+ បានបង្ហាញក្តីព្រួយបារម្ភចំពោះការកើនឡើងកំដៅនៃភាពតានតឹងរវាងមហាយក្សសេដ្ឋកិច្ចទាំងពីរ ដែលអាចនាំឲ្យពិភពលោកធ្លាក់ចូលវិបត្តិសេដ្ឋកិច្ចផងនិងធ្វើឲ្យមានការប៉ះពាល់ដល់តំរូវការប្រេងរបស់ពិភពលោកផង។ បច្ចុប្បន្ន OPEC+ កំពុងរៀបចំផែនការក្នុងការបង្កើនការទាញយកប្រេងបន្ថែមទៀតដែលវាបានធ្វើឲ្យជះឥទ្ធិពលយ៉ាងខ្លាំងក្លាទៅលើតម្លៃប្រេងក្នុងរយៈពេលប៉ុន្មានសប្តាហ៍ចុងក្រោយនេះ។
តម្លៃប្រេងដែលអាចងើបឡើងវិញលើកនេះ គឺនៅក្រោយសញ្ញានៃភាពតានតឹងដាក់គ្នាចាប់ផ្តើមមានភាពធូរស្រាល ដោយសារតែការបន្ទន់ឥរិយាបថរបស់សហរដ្ឋអាមេរិក និងប្រទេសចិន ដែលសុទ្ធតែជាអ្នកបញ្ជាទិញប្រេងឆៅធំជាងគេបំផុតរបស់ពិភពលោក។ បន្ថែមពីនេះ តម្លៃប្រេងឆៅក៏អាចថែរក្សាតម្លៃ ឬអាចបន្តនឹងថ្កល់ក៏អាចថាបាន ដោយសារតែការគំរាមកំហែងរបស់ប្រធានាធិបតីអាមេរិកទៅលើបណ្តាប្រទេសទាំងឡាយណាដែលមានជាប់ពាក់ព័ន្ធទៅនឹងការបញ្ជាទិញប្រេងពីប្រទេសអ៊ីរ៉ង់អាចប្រឈមមុខទៅនឹងការរងទណ្ឌកម្មនោះក៏មានភាពធូស្រាល៕
Account
Security
Favourite Content