ប្រទេសចិនកំពុងអភិវឌ្ឍយ៉ាងឆាប់រហ័សជាមួយនឹងបច្ចេកវិទ្យាហិរញ្ញវត្ថ FinTech ដែលកំពុងគ្របដណ្តប់លើគ្រប់ប្រព័ន្ធទូទាត់ឌីជីថលទាំងអស់ មានតួនាទីប្រតិបត្តិការច្រើនយ៉ាងស្ទើររាប់មិនអស់រាប់ចាប់ទាំងពីការផ្ទេរប្រាក់, កម្ចីប្រាក់, ការផ្ទេរប្រាក់រវាងមិត្តភ័ក្តិ រវាងក្រុមនឹងក្រុម ការចេញប័ណ្ណឥណទាន រហូតទៅដល់ប្រតិបត្តិការនៅ blockchain និងរូបិយប័ណ្ណនិម្មិតផងដែរ។

កន្លងមករដ្ឋាភិបាលចិនបានដាក់ចេញនូវទីតាំងអនុវត្តគម្រោងទីក្រុងឆ្លាតវ៉ៃបែប FinTech នេះនៅតាមទីតាំងជាច្រើនរួចមកហើយ ដែលជាលទ្ធផលគួរឲ្យភ្ញាក់ផ្អើលទីក្រុងដ៏សំខាន់មួយបានសម្រេចក្លាយខ្លួនទៅជាទីក្រុងគំរូ និងកំពុងបន្តការអនុវត្តផែនការនេះរហូតមកក្នុងនាមជាទីក្រុងុដែលមិនមានប្រតិបត្តិការក្រដាសប្រាក់ទៀតឡើយ ឬ ហៅថា Cashless city។

បច្ចុប្បន្ននេះ នៅក្នុងទីក្រុង Shenzhen ក្រដាសប្រាក់បានក្លាយទៅជារឿងអតីតកាលរបស់ពលរដ្ឋក្នុងទីក្រុង។ មនុស្សស្ទើរគ្រប់គ្នា លើកលែងតែមនុស្សចាស់ និងមនុស្សដែលមិនចេះបច្ចេកវិទ្យាមួយចំនួនតូចប៉ុណ្ណោះដែលមិនមានការប្រើប្រាស់បច្ចេកវិទ្យាកម្មវិធីទូរស័ព្ទមួយដែលគ្រប់គ្រងដោយរដ្ឋាភិបាលមានឈ្មោះថា WeChat ហើយនៅតែបន្តចាយក្រដាសប្រាក់។

វាគឺជាកម្មវិធីដែលមានមុខងារគ្រប់យ់ាង ឬហៅថា Super App និងទទួលបាននូវការពេញនិយមប្រើប្រាស់នៅទូទាំងប្រទេសចិន ប៉ុន្តែនៅក្នុងទីក្រុង Shenzhen កម្មវិធីនេះបានក្លាយទៅជាវិធីសាស្ត្រតែមួយគត់របស់ពលរដ្ឋក្នុងការប្រកបរបររកស៊ី និងធ្វើការប្រចាំថ្ងៃ ហើយនៅទីនេះមិនមានណាម្នាក់ដែលមានប្រើប្រាស់ក្រដាសប្រាក់នៅតាមខ្លួនទៀតឡើយ។

ពលរដ្ឋក្នុងទីក្រុងនិយាយថា វាគឺជារឿងធម្មតាសម្រាប់ពួកគេដែលមិនមានក្រដាសប្រាក់តាមខ្លួន ហើយអ្វីដែលចាំបាច់ត្រូវដាក់តាមខ្លួននោះគឺត្រឹមតែទូរស័ព្ទ និងមុខងារស្កេន QR Code ប៉ុណ្ណោះ។ នៅរាល់ពេលដែលពួកគេឃើញមនុស្សណាម្នាក់ដែលមានប្រើប្រាស់ក្រដាសប្រាក់មានន័យថាពួកគេទាំងនោះអាចជាមនុស្សចាស់ ឬមនុស្សដែលមិនចេះប្រើប្រាស់ស្មាតហ្វូនប៉ុណ្ណោះដែលវាមានចំនួនតិចតួចបំផុត។

ចាប់រាប់ពីការទូទាត់ជាសេវាជិះរថយន្តក្រុង ជួលកង់ ទិញផ្លែឈើ ទិញម្ហូបអាហារ និងគ្រប់សកម្មភាពពាណិជ្ជកម្មទាំងអស់ ហើយកាន់តែមិននឹកស្មាននោះ សូម្បីតែក្រុមអ្នកសុំទានតាមផ្លូវក៏មាន QR Code scanner ដែរ។

បច្ចេកវិទ្យាមានភាពងាយស្រួលប្រើប្រាស់ ងាយស្រួលក្នុងស្វែងរកកន្លែងប្រើប្រាស់ ហើយអ្នកណាក៏មានកម្មវិធីនេះក្នុងដៃគឺជាមូលហេតុដ៏សំខាន់ដែលពលរដ្ឋក្នុងទីក្រុងមិនមានការខ្វាយខ្វល់ជាមួយនឹងក្រដាសប្រាក់ទៀតឡើយ។ WeChat មានមុខងារអាចបង្វិលទឹកប្រាក់ដែលបានទូទាត់ខុសមកវិញដោយចំណាយពេលត្រឹមតែប៉ុន្មានវិនាទី ​ខុសពីបច្ចេកវិទ្យានៅតាមតំបន់ផ្សេងៗត្រូវរង់ចាំរហូតដល់មានការត្រួតពិនិត្យពីធនាគារចំណាយពី៣ទៅ១០ថ្ងៃ។

ទោះបីជាយ៉ាងណាក្តី ពលរដ្ឋនៅក្នុងទីក្រុងបានទទួលស្គាល់នូវចំណុចមួយដែលមិនអាចប្រកែកបានថាទិន្នន័យទាំងអស់ ទាំងប្រវត្តិនៃការចាយប្រាក់ និងប្រវត្តិនៃការប្រតិបត្តិការហិរញ្ញវត្ថុ ឬសូម្បីតែទិន្នន័យផ្ទាល់ខ្លួនគឺត្រូវបានគ្រប់គ្រងដោយរដ្ឋាភិបាលចិន ប៉ុន្តែភាគច្រើននៃពលរដ្ឋមិនបានបង្ហាញនូវអារម្មណ៍ព្រួយបារម្ភចំពោះរឿងនេះដូចទៅនឹងពលរដ្ឋនៅក្នុងតំបន់អឺរ៉ុបនោះឡើយ។

គួរឲ្យដឹងដែរថា ទីក្រុង Shenzhen មានទីតាំងស្ថិតនៅភាគអាគ្នេយ៍នៃប្រទេសចិន គឺជាទីក្រុងទំនើបដែលតភ្ជាប់ទៅដល់ទីក្រុងហុងកុងប្រទេសចិន។ វាជាទីក្រុងគោលដៅទាក់ទាញទេសចរ ពាណិជ្ជកម្ម អចលនទ្រព្យ ជាពិសេសគឺការអនុវត្តបច្ចេកវិទ្យាទីក្រុងឆ្លាតវ៉ៃដែលយើងហៅថា Smart City នោះផងដែរ៕