កិច្ចការងារ​អប់រំបណ្តុះបណ្តាលបច្ចេកទេស និងវិជ្ជាជីវៈ ឬយើងហៅថា TVET ត្រូវបានពិភពលោកទទួលស្គាល់ថាបានដើរតួ​នាទី​យ៉ាង​សំខាន់ក្នុងការជួយរៀបចំ​រចនាសម្ព័ន្ធ​សេដ្ឋកិច្ច​របស់​ប្រទេសនានាស្របទៅតាមបរិបទ និងតំបន់របស់ពួកគេ។

ពិភពលោកក្នុងជំនាន់​សេដ្ឋកិច្ច​ឧស្សាហកម្ម​ និង​សេវាកម្ម​ គ្រឹះស្ថាន​អប់រំ​បណ្តុះបណ្តាល​បច្ចេកទេស​ និង​វិជ្ជាជីវៈ​ ដែលយើងហៅកាត់ថា TVET បាន​រួមចំណែក​ដល់​ការ​ធ្វើ​ឱ្យ​ប្រសើរ​ឡើង​នូវ​ការ​ប្រកួតប្រជែង​សេដ្ឋកិច្ច​ ការ​ធ្វើ​ពិពិធ​កម្ម​ និង​ការបង្កើន​ជំនាញ​កម្លាំង​ពលកម្ម​ដែល​មាន​ស្រាប់ ព្រមទាំងជួយកាត់បន្ថយភាពក្រីក្រដល់ប្រជាពលរដ្ឋរបស់ប្រទេសទាំងនោះទៀតផង​។

ការអនុវត្ត TVET មិនត្រូវបានចាត់ទុកថាមានសារៈសំខាន់សម្រាប់តែប្រទេសក្រីក្រ និងប្រទេសកំពុងអភិវឌ្ឍនោះទេ ប៉ុន្តែសូម្បីតែប្រទេសអភិវឌ្ឍខ្លាំងក៏ដោយ ពីព្រោះថាវាគឺជាស្ពានតភ្ជាប់រវាងរបៀបនៃការអប់រំបែបប្រពៃណីទៅជាការរៀនសូត្របែបជំនាញដែលអាចជួយបង្កើនការផ្គត់ផ្គង់ធនធានមនុស្សបានគ្រប់គ្រាន់ និងប្រសិទ្ធភាពបំផុតទាន់ទៅនឹងតម្រូវការទីផ្សារបច្ចុប្បន្ន ក៏ដូចជាការរីកចម្រើននៃវិស័យឧស្សាហកម្មផងដែរ។

ជាក់ស្តែងប្រទេសដែលអនុវត្តការបណ្តុះបណ្តាលវិជ្ជាជីវៈបានល្អបំផុតនោះគឺសុទ្ធតែជាប្រទេសមានសេដ្ឋកិច្ចអភិវឌ្ឍទាំងអស់ដែលមានដូចប្រទេសអាល្លឺម៉ង់, ស្វីស, បារាំង, ជប៉ុន និងកូរ៉េខាងត្បូង ព្រមទាំងចិនផងដែរ។

គិតត្រឹមតែប្រទេសចិនប៉ុណ្ណោះដែលជាអ្នកមានប្រព័ន្ធបណ្តុះបណ្តាលវិជ្ជាជីវៈ ឬ TVET ធំជាងគេបំផុតលើពិភពលោក ខណៈដែលវិទ្យាស្ថានបណ្តុះបណ្តាលមានរហូតទៅដល់ជាង ១១ ០០០កន្លែង និងអាចផ្តល់កន្លែងសិក្សាជូនសិស្ស-និស្សិតដល់ទៅជាង៣០លាននាក់ ហើយវាត្រូវបានចាត់ទុកថាជាចំណែកដ៏សំខាន់ក្នុងការអភិវឌ្ឍសង្គម និងសេដ្ឋកិច្ចរបស់ប្រទេស។

គួរឲ្យដឹងដែរថា បើជានិយមន័យដែលត្រូវបានផ្តល់ឲ្យដោយអង្គការ UNESCO និង ILO ការបណ្តុះបណ្តាលវិជ្ជាជិវៈ ឬ TVET គឺសំដៅទៅលើទិដ្ឋភាពនៃដំណើរការរបៀបអប់រំដែលពាក់ព័ន្ធបន្ថែមពីលើការអប់រំទូទៅ ការសិក្សាអំពីបច្ចេកវិទ្យា និងវិទ្យាសាស្ត្រដែលពាក់ព័ន្ធ និងការទទួលបានជំនាញជាក់ស្តែង អាកប្បកិរិយា ការយល់ដឹង និងចំណេះដឹងទាក់ទងនឹងអ្នកកាន់កាប់ក្នុងវិស័យផ្សេងៗដែលជាផ្នែកមួយនៃជីវិតសេដ្ឋកិច្ច និងសង្គម។

បន្ថែមពីលើចំណេះដឹង និងជំនាញបច្ចេកទេសហើយនោះ TVET ក៏សំដៅទៅលើការអភិវឌ្ឍជំនាញទន់ដែលមានដូចជា ការទំនាក់ទំនង ការចរចា និងការងារជាក្រុមផងដែរ។ TVET ត្រូវបានចែកចាយជាសាធារណៈ និងគ្រឹះស្ថានអប់រំឯកជន ឬទម្រង់ផ្សេងទៀតនៃការណែនាំក្នុងប្រព័ន្ធឬក្រៅប្រព័ន្ធគោលបំណងផ្តល់ឲ្យផ្នែកទាំងអស់នៃសង្គមទទួលបានធនធានសិក្សាពេញមួយជីវិត។

គួរបញ្ជាក់ដែរថា សម្រាប់តែប្រទេសកម្ពុជា រាជរដ្ឋាភិបាលក្នុងអាណត្តិទី៧នៃរដ្ឋសភា បានកំណត់ពីផែនការយុទ្ធសាស្ត្រក្នុងការបណ្តុះបណ្តាលជំនាញ និងវិជ្ជាជីវៈដល់យុវជនទូទៅរហូតដល់ ១លាន ៥សែននាក់ ដើម្បីក្លាយជាកម្លាំងចលករស្នូលក្នុងការជួយដល់កំណើនសេដ្ឋកិច្ចជាតិ ក៏ដូចជាជួយកាត់បន្ថយភាពក្រីក្រផងដែរ៕