សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
រតនគិរី ៖ ប្រជាពលរដ្ឋនៅក្នុងខេត្តរតនគិរី ជាពិសេសជនជាតិដើមភាគតិច ក្រោយពីទទួលបានការផ្សព្វផ្សាយអំពីចំណេះដឹងខាងហិរញ្ញវត្ថុ ពួកគាត់បានយល់ដឹងពីលុយជាអ្វី អ្វីជាកម្ចី អ្វីជាបំណុល ការគ្រប់គ្រងចំណូលចំណាយ ការសន្សំ ហើយពួកគាត់បានដឹងទៀតថាការខ្ចីលុយត្រូវតែសងគេវិញ និងមុនខ្ចីលុយត្រូវតែគិតពិចារណាថាតើគួរខ្ចី ឬមិនគួរខ្ចី ខ្ចីយកទៅធ្វើអ្វី មានលទ្ធភាពសងគេវិញឬអត់ និងត្រូវធ្វើដូចម្តេចដើម្បីចៀសផុតពីបំណុលលើសលប់ ខណៈដែលចំណេះដឹងទាំងនេះ ពីមុនពួកគាត់មិនធ្លាប់ទទួលបានឡើយ ដោយពួកគាត់គិតថាការផ្តល់កម្ចី គឺជាអំណោយ ចង់សងក៏បាន មិនសងក៏បាន។
គួរឱ្យដឹងថា នៅក្នុងស្រុកដាច់ស្រយាលមួយចំនួននៅខេត្តរតនគិរី ប្រជាពលរដ្ឋភាគច្រើនជាជនជាតិដើមភាគតិច ដែលប្រកបរបរដាំដំណាំសម្រាប់ចិញ្ចឹមជីវិតដូចជា ស្វាយចន្ទី សណែ្ដកសៀង សណ្ដែកខៀវ ដំណាំស្រូវ និងដំឡូងឈើជាដើម។ ការដាំដំណាំទាំងនេះគឺជាប្រភពចំណូលបន្ថែមលើចំណូលដែលបានមកពីការអាស្រ័យអនុផលព្រៃឈើ កសិកម្មពនេចរ និងការចិញ្ចឹមសត្វ ដែលជាមុខរបរប្រពៃណីរបស់ពួកគាត់។
កាលពីប៉ុន្មានឆ្នាំមុន ជាធម្មតា ប្រភពចំណូលពីមុខរបរទាំងនេះ អាចផ្គត់ផ្គង់ការចំណាយប្រចាំថ្ងៃរបស់គ្រួសារពួកគាត់បានគ្រប់គ្រាន់ ប៉ុន្ដែមកទល់បច្ចុប្បន្ន គ្រប់យ៉ាងបានផ្លាស់ប្ដូរនៅពេលដែលក្រុមគ្រួសារភាគច្រើនប្រាថ្នាចង់បានការរស់នៅបែបសម្ភារនិយមដូចអ្នករស់នៅទីប្រជុំជនដែរ។ ពួកគាត់ចាប់ផ្ដើមចំណាយប្រាក់កាសលើសម្ភារៈមួយចំនួនដូចជា ម៉ូតូ ឡាន និងសម្លៀកបំពាក់ម៉ូដថ្មីៗ ហើយតែងមានការជួបជុំជប់លៀងជាញឹកញាប់។ ដូច្នេះនៅពេលពួកគាត់ខ្វះខាតលុយកាក់ ដើម្បីផ្គត់ផ្គង់ការរស់នៅបែបថ្មីនេះ ពួកគាត់បានចាប់ផ្ដើមខ្ចីបុលពីអ្នកចងការប្រាក់ និងគ្រឹះស្ថានហិរញ្ញវត្ថុនៅស្រុកភូមិ។
សេដ្ឋកិច្ចរបស់ប្រជាពលរដ្ឋនៅតំបន់ដាច់ស្រយាលទាំងនេះមានលក្ខណៈបែបគ្រួសារសាមញ្ញ ដែលមិនសូវចាយវាយប្រាក់កាសច្រើនប៉ុន្មានទេ ដូច្នេះពួកគាត់មានបទពិសោធន៍ និងការយល់ដឹងតិចតួចអំពីការគ្រប់គ្រងហិរញ្ញវត្ថុ។ ជាលទ្ធផល ពួកគាត់មានបំណុលច្រើនលើសលប់ ដែលមិនអាចរ៉ាប់រងការទូទាត់ការប្រាក់ប្រចាំខែបានឡើយ។ បងប្អូនប្រជាពលរដ្ឋខ្លះ ខ្វះទាំងចំណេះដឹងផ្នែកហិរញ្ញវត្ថុ ទាំងជំនាញក្នុងការរៀបចំផែនការរយៈពេលវែង និងទាំងជំនាញរៀបចំកញ្ចប់ថវិកាសម្រាប់ចំណាយប្រចាំថ្ងៃ ដែលនាំឲ្យពួកគាត់ជំពាក់បំណុលច្រើន ហើយត្រូវបង្ខំចិត្តលក់ដីធ្លី និងទ្រព្យសម្បត្តិផ្សេងៗ ដើម្បីទូទាត់សងបំណុលទាំងនោះ។
ដើម្បីដោះស្រាយបញ្ហាដ៏ស្មុគស្មាញនេះ ធនាគារ ABA និងក្រុមហ៊ុនរបស់កាណាដា Angkor Resources Corp. ដែលជាដៃគូអនុវត្តកិច្ចការទំនួលខុសត្រូវសង្គម (CSR) របស់ ABA បានរៀបចំ និងបង្កើត “កម្មវិធីពង្រឹងសមត្ថភាពប្រជាសហគមន៍នៅតំបន់ដាច់ស្រយាល តាមរយៈថ្នាក់ចំណេះដឹងហិរញ្ញវត្ថុ” ក្នុងគោលបំណងអភិវឌ្ឍចំណេះដឹង និងជំនាញរបស់ប្រជាពលរដ្ឋក្នុងសហគមន៍ទាំងនោះ ហើយអាចឲ្យពួកគាត់ពង្រឹងសេដ្ឋកិច្ច និងហិរញ្ញវត្ថុគ្រួសារ ប្រកបដោយភាពឈ្លាសវៃ និងក្នុងឥរិយាបថល្អប្រសើរ។
តាមរយៈកម្មវិធីនេះ ABA បានបង្ហាញអំពីបេសកកម្ម និងការប្ដេជ្ញាចិត្តរបស់ខ្លួន ក្នុងដំណើរការធុរកិច្ច ដែលយកចិត្តទុកដាក់លើអនាគតរបស់ប្រជាពលរដ្ឋកម្ពុជា និងសង្គមជាតិ។ ABA មានប្រវត្តិដ៏ល្អក្នុងការអនុវត្តវិធីសាស្ដ្រផ្ដល់ជូនតែកម្ចីណាដែលមានផលិតភាពល្អ ហើយគាំទ្រដល់វិស័យសេដ្ឋកិច្ចពិតប្រាកដ និងយកចិត្តទុកដាក់ចំពោះស្ថានភាពហិរញ្ញវត្ថុរបស់អតិថិជនកម្ចី។ ការជំពាក់បំណុលច្រើន គឺជាបញ្ហាមួយក្នុងចំណោមបញ្ហាជាច្រើន ដែលត្រូវការដំណោះស្រាយ ស្របទៅនឹងគុណតម្លៃរបស់ ABA ហើយក៏ជាមូលហេតុដែលធ្វើឲ្យធនាគារចូលរួមបង្កើតកម្មវិធីបណ្តុះបណ្តាលនេះផងដែរ។
យោងតាមធនាគារ ABA បានឱ្យដឹងថា កម្មវិធីចំណេះដឹងហិរញ្ញវត្ថុបានចាប់ផ្ដើមដោយការបណ្ដុះបណ្ដាលគ្រូបង្គោល (ToT) ចំនួន១៤ រូប ក្រោមការគាំទ្រពីក្រុមការងារឥណទានរបស់ ABA។ ការបណ្ដុះបណ្ដាលដំណាក់កាលទីមួយ ត្រូវបានធ្វើឡើងកាលពីខែកញ្ញា ឆ្នាំ២០២២ ដោយមាន ៩ វគ្គ ចូលរួមដោយក្រុមជនជាតិភាគតិចចំនួន ៤ ក្រុម (គ្រឹង, ព្រៅ, ទំពួន និងចារ៉ាយ)។ វគ្គបណ្ដុះបណ្ដាលនេះ បានធានាឲ្យមានការចូលរួម និងការយល់ដឹងជាអតិបរមា ពិសេសពីស្ដ្រី និងប្រជាពលរដ្ឋក្នុងសហគមន៍ ដែលពុំសូវមានឱកាសទទួលបានការរៀនសូត្រ។ អ្នកចូលរួមក្នុងវគ្គបណ្ដុះបណ្ដាលនេះសរុបមានចំនួន ២០៤រូប ដែលក្នុងនោះជាង ៥០% គឺជាស្ដ្រី។
ការបណ្ដុះបណ្ដាលកន្លងទៅ បានផ្ដល់ផលវិជ្ជមានដល់ប្រជាពលរដ្ឋដែលបានចូលរួម។ ជំនួសឲ្យការពឹងផ្អែកទាំងស្រុងលើកម្ចីដើម្បីបានប្រាក់យ៉ាងឆាប់រហ័សនោះ ពួកគាត់បានរកឃើញមធ្យោបាយសម្រាប់បង្កើនចំណូលជាច្រើនផ្សេងទៀត និងចេះអំពីរបៀបគ្រប់គ្រងការចំណាយប្រចាំថ្ងៃរបស់គាត់។ ឥឡូវនេះ អ្នកភូមិចាប់ផ្តើមស្វះស្វែងរកវិធីសាស្ដ្រដើម្បីបង្កើនចំណូលជាជាងអង្គុយរង់ចាំប្រមូលផលតែពីដំឡូងឈើ និងស្វាយចន្ទីតែមួយមុខ។ គ្រួសារខ្លះបានផ្លាស់ទីលំនៅបណ្ដោះអាសន្ន ដើម្បីធ្វើស្រែប្រវាស់ និងស្វែងរកឱកាសការងារបន្ថែម ហើយអ្នកភូមិខ្លះទៀតចាប់ផ្តើមបង្កបង្កើនផលបន្ថែម ដូចជាដំណាំកាកាវ និងទុរេនជាដើម។
ការតាំងចិត្តរបស់អ្នកភូមិដែលបានចូលរួមកម្មវិធីនេះពិតជាមានខ្ពស់ ហើយដើម្បីឲ្យឆន្ទៈនេះនៅតែបន្ដ ធនាគារ ABA និងក្រុមហ៊ុន Angkor Resources Corp. បានបើកថ្នាក់ចំណេះដឹងហិរញ្ញវត្ថុដំណាក់កាលទី៣ នៅតំបន់ដាច់ស្រយាលក្នុងខេត្តរតនគិរី។ គោលបំណងចម្បងនៃការបើកថ្នាក់នេះ គឺដើម្បីផ្តល់ចំណេះដឹងចាំបាច់មួយចំនួនដល់អ្នកចូលរួម ក្នុងការធ្វើសេចក្ដីសម្រេចចិត្តផ្នែកហិរញ្ញវត្ថុឲ្យបានត្រឹមត្រូវ, លើកកម្ពស់សេដ្ឋកិច្ចគ្រួសារ,និងរួមចំណែកដល់ការអភិវឌ្ឍសហគមន៍ទាំងមូល។ កម្មវិធីនេះនឹងជួយដល់អ្នកចូលរួមឲ្យមានឱកាសក្នុងការធ្វើឲ្យស្ថានភាពហិរញ្ញវត្ថុនាពេលបច្ចុប្បន្ន និងអនាគតរបស់ពួកគាត់កាន់តែប្រសើរឡើងតាមរយៈការបង្កើនស្ថិរភាព និងភាពម្ចាស់ការក្នុងការគ្រប់គ្រងលុយកាក់ ។
ដោយទទួលបានជោគជ័យក្នុងការអនុវត្តកម្មវិធីនេះកន្លងមក កម្មវិធីដំណាក់កាលទី៣នេះនឹងបន្តផ្តល់នូវវគ្គបណ្តុះបណ្តាលពេញលេញលើប្រធានបទហិរញ្ញវត្ថុជាច្រើនទៀត។ អ្នកចូលរួមនឹងយល់ដឹងកាន់តែច្បាស់អំពីគោលគំនិតមេរៀនជាមូលដ្ឋាន ដូចជា ការរៀបចំផែនការហិរញ្ញវត្ថុ,ការចាត់ចែងលុយកាក់, ការកំណត់គោលដៅហិរញ្ញវត្ថុ និងសន្សំ,និងការប្រើប្រាស់ប្រាក់កម្ចីឲ្យបានត្រឹមត្រូវ ដើម្បីចៀសវាងបំណុលច្រើនលើសលប់ជាដើម។
ក្នុងដំណាក់កាលថ្មីនេះ ABA បានពង្រឹងប្រសិទ្ធភាព និងកម្មវិធីសិក្សាធ្វើយ៉ាងណាឲ្យថ្នាក់រៀននេះផ្ដល់ប្រយោជន៍ និងជះឥទ្ធិពលកាន់តែប្រសើរឡើងមួយកម្រិតទៀតដល់អ្នកចូលរួម។ វគ្គបណ្តុះបណ្តាលគ្រូបង្គោល (TOT) ត្រូវបានរៀបចំឡើងសម្រាប់គ្រូបង្គោលប្រចាំសហគមន៍ចំនួន ២២ នាក់ ដោយពង្រឹងសមត្ថភាពពួកគាត់ក្នុងការបង្រៀនមេរៀន និងខ្លឹមសារជាភាសាកំណើត ឬគ្រាមភាសា (ភាសាតំបន់) ប្រកបដោយប្រសិទ្ធភាពទៅកាន់សហគមន៍។ វិធីសាស្ត្រនេះបានបង្ហាញឲ្យឃើញនូវអត្ថប្រយោជន៍យ៉ាងច្រើនដែលធ្វើឲ្យមានការយល់ដឹង និងការចូលរួមកាន់តែប្រសើរឡើងនៅក្នុងសហគមន៍។
កម្មវិធីចំណេះដឹងហិរញ្ញវត្ថុនេះ នឹងមានថ្នាក់សរុបចំនួន ២២ ដែលមានអ្នកចូលរួមចំនួន ៥០០នាក់នៅតាមភូមិស្រុកដាច់ស្រយាលមួយចំនួន។ តាមរយៈការពង្រីកវិសាលភាពទៅកាន់ភូមិស្រុកថ្មី ABA ធានាបានថា ប្រជាពលរដ្ឋកាន់តែច្រើនក្នុងខេត្តរតនគិរី នឹងទទួលបានអត្ថប្រយោជន៍ពីចំណេះដឹងដ៏មានសារៈសំខាន់ និងចាំបាច់នេះ។ កាលនៅឆ្នាំ ២០២២ ABA បានបើកថ្នាក់ចំណេះដឹងហិរញ្ញវត្ថុជាលើកដំបូងដោយជោគជ័យ ដោយពេលនោះមានអ្នកភូមិចូលរួមប្រមាណ ២០០ នាក់ មកពីតំបន់ដាច់ស្រយាលក្នុងខេត្តរតនគិរី ដើម្បីអភិវឌ្ឍចំណេះដឹង និងជំនាញរបស់សហគមន៍ ព្រមទាំងលើកកម្ពស់ជីវភាព និងហិរញ្ញវត្ថុរបស់ពួកគេប្រកបដោយភាពឆ្លាតវៃ និងមានស្ថិរភាព។
លោក Gordon Paterson ប្រធានអភិវឌ្ឍន៍គម្រោងឯករាជ្យក្នុងខេត្តរតនគិរីមានប្រសាសន៍ថា កាលពីដំបូងឡើយ ប្រជាពលរដ្ឋជាច្រើនមិនបានដឹងអំពីសារៈសំខាន់នៃវគ្គបណ្ដុះបណ្ដាលនេះទេ។ ប៉ុន្ដែក្រោយមក ពួកគាត់បានប្រាប់គ្រូបណ្តុះបណ្តាលថា អ្នកភូមិទាំងឡាយបានយល់ជ្រួតជ្រាបពីខ្លឹមសារមេរៀន ហើយពួកគាត់ពិតជាសប្បាយចិត្តណាស់។
លោកពន្យល់បន្ថែមថា ឥឡូវនេះ ពួកគាត់ស្គាល់ច្បាស់អំពីអនាគតសហគមន៍របស់ពួកគាត់ ហើយបានលើកទឹកចិត្តដល់គ្រូបង្គោលឲ្យបន្ដវគ្គបណ្ដុះបណ្ដាល និងចែករំលែកមេរៀន ក៏ដូចជាសារគន្លឹះសំខាន់ៗទៅកាន់សហគមន៍ផ្សេងទៀត ដើម្បីឲ្យពួកគាត់កាន់តែមានភាពជឿជាក់ និងទំនុកចិត្ត ក្នុងការធ្វើឲ្យជីវភាពរបស់ប្រជាពលរដ្ឋក្នុងសហគមន៍របស់គាត់កាន់តែប្រសើរឡើង។
លោកបានលើកឡើងថា ៖
«ការជំពាក់បំណុលកំពុងតែមានហានិភ័យដល់សុវត្ថិភាពក្នុងការកាន់កាប់ដីធ្លីរបស់ប្រជាពលរដ្ឋក្រីក្រដែលភាគច្រើនជាជនជាតិដើមភាគតិច។ ការសិក្សាអប់រំរបស់ពួកគេទាបជាងជនជាតិដទៃទៀត។ ចំណេះដឹងពីការគ្រប់គ្រងលុយកម្ចីអត់ទាន់មានបទពិសោធន៍។ កាលពីមុន ជនជាតិមិនប្រើលុយទេ ពឹងផ្អែកទៅលើដីព្រៃ អនុផលព្រៃឈើ និងដំណាំចម្ការដាំផ្ទាល់ខ្លួន។ ប៉ុន្តែក្រោយមក ក្នុងរយៈពេលតែជាងម្ភៃឆ្នាំ ជីវិតរបស់ពួកគាត់ផ្លាស់ប្តូរទាំងស្រុងគឺពឹងលើលុយ ។ បន្ទាប់ពឹងលើធម្មជាតិ ការដាំដំឡូង ដំឡូងមី ស្វាយចន្ទី សណ្តែកសៀង សណ្ដែកខៀវ សណ្ដែកដី ឥឡូវពួកគាត់ពឹងផ្អែកលើទីផ្សារ តែពួកគាត់អត់មានមូលដ្ឋានគ្រប់គ្រងលុយ ដូច្នេះវាជាហានិភ័យយ៉ាងខ្លាំងពាក់ព័ន្ធទៅនឹងកម្ចីដែលពីមុនទំនៀមទម្លាប់របស់ពួកគាត់គឺខ្ចីលុយ ខ្ចីរបស់អ្វីផ្សេងៗគឺមិនចាំបាច់សងនោះទេ ហើយការប្រាក់ក៏មិនមានដែរ»។
លោកបានបញ្ជាក់ឱ្យដឹងទៀតថា មេរៀនហិរញ្ញវត្ថុដែលបង្រៀនដល់ជនជាតិភាគតិច មាន ៥ ចំណុច៖ ១-តើលុយជាអ្វី? ២- ការគ្រប់គ្រងថវិកាក្នុងគ្រួសារ ចំណាយចំណូល ៣- កម្ចីពេលណាគួរខ្ចី ពេលណាមិនគួរ ៤-មានកម្ចីហើយត្រូវគ្រប់គ្រងបែបណាចៀសវាងពីបំណុលច្រើនលើសលប់ និងទី៥- ការសន្សំ និងផែនការសន្សំសម្រាប់គ្រួសារ ។ ក្រោយពីបានរៀនអំពីចំណេះដឹងផ្នែកហិរញ្ញវត្ថុពួកគាត់បានដឹងពីការគ្រប់គ្រងលុយ។ អ្នកណាចង់ខ្ចីលុយទៀត ពួកគាត់ត្រូវគិតឡើងវិញ ឬឈប់ខ្ចីតែម្តង ។ ពួកគាត់ចេះគ្រប់គ្រងចំណូលចំណាយ ពោលគឺមិនចំណាយច្រើនជាងចំណូលទេ ព្រមទាំងចេះពិចារណាអ្វីសំខាន់ ឬមិនសំខាន់ ។ មួយទៀតបានយល់ពីអ្វីជាការធានា អ្វីជាបំណុល អ្វីជាការប្រាក់ ។
លោក ឈាន វុទ្ធី ប្រធានបណ្តុះបណ្តាលឥណទានរបស់ ABA បានបញ្ជាក់ថា ពលរដ្ឋដែលមានចំណេះដឹងហិរញ្ញវត្ថុ គឺមានលទ្ធភាពគេចផុតពីការធ្លាក់ខ្លួនចូលក្នុងស្ថានភាពបំណុលច្រើនលើសលប់ ឬប្រឈមហានិភ័យហិរញ្ញវត្ថុផ្សេងៗ ។ ការណ៍ដែលពលរដ្ឋមានចំណេះដឹងហិរញ្ញវត្ថុ នាំសេដ្ឋកិច្ចផ្ទាល់ខ្លួន គ្រួសារ និងសង្គមកាន់តែរីកចម្រើន។
លោកបានឱ្យដឹងថា ៖
«ក្រោយបានរៀនពួកគាត់បានស្គាល់អ្វីជាឥណទានដែលពីមុនពួកគាត់គិតថាជាអំណោយ ឥឡូវពួកគាត់បានដឹងថាឥណទានខ្ចីត្រូវតែសងគេ មានកាតព្វកិច្ចសងគេវិញ។ ឥឡូវនេះពួកគាត់មិនមែនចេះតែខ្ចីទេ ។ ពួកគាត់គាត់ដឹងពីផែនការចំណាយចំណូល អ្វីគួរចំណាយ អ្វីមិនគួរ និងចេះសន្សំប្រាក់ ។ មួយទៀតពួកគាត់ចេះជ្រើសរើសធនាគារ ឬមីក្រូហិរញ្ញវត្ថុណាគួរខ្ចី ត្រូវខ្ចីកម្រិតណាអាចសងរួច ការប្រាក់ថ្លៃ ឬថោក»។
ចំណែកលោក សូ វណ្ណធិន អភិបាលស្រុកតាវែង ខេត្តរតនគិរី បានមានប្រសាសន៍ថា តាមរយៈការបង្រៀនចំណេះដឹងហិរញ្ញវត្ថុនេះបានជួយជំរុញឲ្យប្រជាពលរដ្ឋជៀសផុតពីបំណុលច្រើនលើសលប់ និងយកកម្ចីទៅប្រើប្រាស់បានចំគោលដៅ។
លោកអភិបាលស្រុកបានលើកឡើងថា ៖
«មុនការបណ្តុះបណ្តាលចំណេះដឹងហិរញ្ញវត្ថុ ពួកគាត់ចាប់អារម្មណ៍តែរឿងខ្ចីលុយមិនថាជាធនាគារ ឬមីក្រូហិរញ្ញវត្ថុ តូច ឬធំនោះទេ។ ពួកគាត់យល់ថា ខ្ចីស្រួលយកមកប្រើប្រាស់ក៏ស្រួល គាត់អត់បានគិតថាបន្ទាប់ពីខ្ចី ហើយរកទុនពីខាងណាដើម្បីសងគេទេ។ នៅស្រុកតាវែងមានអំណោយផលពីធម្មជាតិអាចឲ្យពួកគាត់រកចំណូលបានពីអនុផលព្រៃឈើ តែក្រោយមកធនធានធម្មជាតិថយចុះធ្វើឲ្យពួកគាត់មិនអាចរកចំណូលដើម្បីសងបំណុលនោះទេ»។
ជាមួយគ្នានេះផងដែរ លោកអភិបាលស្រុកតាវែងក៏បានបង្ហាញពីកិច្ចគាំទ្រការបណ្តុះបណ្តាលអក្ខរកម្មហិរញ្ញវត្ថុរបស់ ABA យ៉ាងពេញទំហឹង ព្រោះវាមានសារៈសំខាន់ដែលជាផ្នែកមួយជួយទៅដល់សង្គម ជាពិសេសជនជាតិដើមភាគតិច ។
លោក យោល សៀម មេភូមិរៀងវិញ ឃុំតាវែងលើ ស្រុកតាវែង បានឱ្យដឹងដែរថា នៅក្នុងភូមិរៀងវិញ មានប្រជាពលរដ្ឋ១០៤គ្រួសារ។ សម្រាប់ចំណេះដឹងហិរញ្ញវត្ថុនេះ វាមានសារៈសំខាន់ណាស់សម្រាប់សហគមន៍។ ពួកគេបានយល់ដឹងពីបញ្ហាខ្ចីប្រាក់ការសន្សំប្រាក់ ហើយបានដឹងថាកាលណាខ្ចីគេត្រូវតែសង ជាពិសេសយកកម្ចីនេះមកប្រើចំគោលដៅ។
គ្រូបង្គោល ភឿក ត្រួក នៅភូមិផាវ ឃុំតាវែងលើ ស្រុកតាវែង ដែលទទួលបានការបណ្តុះបណ្តាលពីធនាគារ AB ក៏បានបង្ហាញពីភាពរីករាយក្នុងទទួលបានចំណេះដឹងថ្មី ដឹងពីរបៀបចាយលុយ និងពីរបៀបកត់ត្រាចំណូលចំណាយ។ ក្រោយពីទទួលការបណ្តុះបណ្តាលលោកបានបង្រៀនទៅដល់អ្នកភូមិទាក់ទងទៅនឹងការប្រើប្រាស់លុយ ពីប្រភពលុយចូល លុយចំណាយ កម្ចីក្រៅផ្លូវការ និងផ្លូវការ ខ្ចីយកទៅធ្វើអ្វី បើខ្ចីត្រូវមានគោលបំណងច្បាស់លាស់។
លោក ភឿក ត្រួក បានឱ្យដឹងថា ៖
«ក្រោយពីទទួលបានការបណ្តុះបណ្តាល ពួកគាត់បានដឹងពីការគ្រប់គ្រងចំណាយចំណូលចាត់ចែងបំណុល និងដឹងពីកាតព្វកិច្ចខ្ចីត្រូវតែសង ហើយត្រូវសងដោយរបៀបណា។ តាមរយៈការបណ្ដុះបណ្ដាលនេះ ខ្ញុំបានសន្សំលុយទិញបានដីមួយកន្លែងដែលមានតម្លៃជាងមួយពាន់ដុល្លារ ដែលប្រភពចំណូលបានមកតាមរយៈការដើរបេះសំរោង ផ្សិត និងអនុផលព្រៃឈើផ្សេងៗទៀតទៅតាមរដូវកាល»។
កញ្ញា ជ តាប់ អាយុ១៥ឆ្នាំជាជនជាតិដើមភាគតិចព្រៅ រស់នៅភូមិរៀងវិញ ឃុំតាវែងលើ ស្រុកតាវែង ខេត្តរតនគិរី បានទទួលការបណ្តុះបណ្តាលចំណេះដឹងហិរញ្ញវត្ថុចំនួនប្រាំវគ្គ ។ក្រោយពីការទទួលបាននូវការបណ្តុះបណ្តាល កញ្ញាបានដឹងពីអ្វីហៅថាជាប្រាក់កម្ចី អ្វីជាបំណុល ជាមួយនឹងចំណេះដឹងពីរបៀបគ្រប់គ្រង ការកត់ត្រាចំណូល-ចំណាយ វិធីសន្សំប្រាក់និងការចាយវាយតាមខ្ទង់។
កញ្ញា ជ តាប់ បានឱ្យដឹងទៀតថា ៖
«យើងមិនត្រូវចេះតែខ្ចីនោះទេ ព្រោះនាំឲ្យមានហានិភ័យ តែបើខ្ចីត្រូវយកប្រើឲ្យចំគោលដៅ ។ យើងត្រូវប្រុងប្រយ័ត្នចំពោះកម្ចី។ ការបណ្ដុះបណ្ដាលចំណេះដឹងហិរញ្ញវត្ថុនេះ មានសារៈសំខាន់ណាស់។ ខ្ញុំបានចែករំលែកអ្វីដែលខ្ញុំបានរៀនទៅដល់សហគមន៍ និងគ្រួសាររបស់នាង ដើម្បីកុំឲ្យមានបញ្ហាជំពាក់បំណុលគេមិនអាចសងបាន»។
ទាក់ទងនឹងបទពិសោធន៍ជោគជ័យលើការខ្ចី និងសង លោក សឿង ឡត ជាពលរដ្ឋរស់នៅភូមិទុន ឃុំតាវែងលើ ស្រុកតាវែង ខេត្តរតនគិរី មានអាយុ២៩ និងមានកូនក្នុងបន្ទុកចំនួន២នាក់ បានចែករំលែកថា លោកបានស្នើកម្ចីពីស្ថាប័នមីក្រូហិរញ្ញវត្ថុជាច្រើនលើក ដោយលើកទី១ ចំនួន២០ម៉ឺនរៀល ហើយបានសងគេរួច។ ជាបន្តបន្ទាប់ លោកបានខ្ចី ១លាន , ២លាន, ៣លាន , ១០លានរៀល ហើយក៏បានសងរួចទៀត។ លើកចុងក្រោយនេះ លោកបានខ្ចី ២០លានរៀល ហើយបានសងដើមបាន ៤លានរៀល នៅសល់១៦លានរៀលទៀត។ ការសងបំណុលរបស់លោក គឺពឹងទៅលើដំណាំកៅស៊ូរបស់លោក ដែលមួយឆ្នាំអាចរកចំណូលបានប្រមាណ ២០លានរៀល។
លោកបានបញ្ជាក់ថា ៖
«ខ្ញុំបានចូលរួមក្នុងវគ្គបណ្តុះបណ្តាលចំណេះដឹងហិរញ្ញវត្ថុរបស់ធនាគារ ABA ហើយបានដឹងថា បើយើងខ្ចី គឺត្រូវដឹងថាយើងយកទៅធ្វើអ្វី យើងត្រូវមានគោលដៅច្បាស់លាស់ និងដឹងពីសមត្ថភាពសងរបស់យើង និងត្រូវដឹងពីរបៀបសងយ៉ាងម៉េច។ ក្រៅពីនេះ ខ្ញុំក៏ចេះពីរបៀបចាយ របៀបសន្សំ ហើយខ្ញុំបានដឹងទៀតថា ចំណូលចំណាយ កុំចាយច្រើនជាងចំណូល និងចេះរៀបចំផែនការលុយ» ។
គួរជម្រាបថា ស្របជាមួយនឹងការអនុវត្តកម្មវិធីចំណេះដឹងហិរញ្ញវត្ថុនេះ ABA បាន និងកំពុងបន្ដគាំទ្រគំនិតផ្ដួចផ្ដើមផ្សេងៗទៀតលើផ្នែកចំណេះដឹង និងបរិយាបន្នហិរញ្ញវត្ថុ។ ក្នុងឆ្នាំ២០២២ ធនាគារ ABA បានគាំទ្រធនាគារជាតិនៃកម្ពុជា ដើម្បីអនុវត្តគម្រោងចំណេះដឹងផ្នែកហិរញ្ញវត្ថុសម្រាប់កុមារ ដោយបោះពុម្ភសៀវភៅហិរញ្ញវត្ថុបែបត្លុកចំនួន ៥០០០ក្បាល ចែកជូនសិស្សកម្រិតបឋមសិក្សា។ ABA ក៏បានឧបត្ថម្ភសហគ្រិនខ្មែរ ក្នុងកម្មវិធីត្រៀមខ្លួនដើម្បីទទួលបានការវិនិយោគ និងកម្មវិធីការប្រកួតប្រជែងសហគ្រិនស្ត្រី ដើម្បីគាំទ្រដល់ធុរកិច្ចថ្មី និងសហគ្រិនស្ដ្រីក្នុងការអភិវឌ្ឍគំនិតអាជីវកម្មរបស់ពួកគេ។ ABA ក៏បានឧបត្ថម្ភកម្មវិធីពាក់ព័ន្ធនឹងហិរញ្ញវត្ថុថ្នាក់តំបន់ដូចជា ទិវាសន្សំអាស៊ាន ២០២២ និងវេទិកាបច្ចេកវិទ្យាហិរញ្ញវត្ថុ ដែលជាផ្នែកមួយនៃកិច្ចប្រជុំកំពូលអាស៊ានលើកទី ៤០ និងលើកទី ៤១ ផងដែរ៕
Account
Security
Favourite Content