ភ្នំពេញ ៖ កម្មវិធីបណ្ដុះបណ្ដាលជំនាញចំនួន ១លាន ៥សែននាក់ (TVET 1.5M) របស់​រាជរដ្ឋាភិបាលកម្ពុជាដែលបានដាក់ឱ្យដំណើរការកាលពីខែវិច្ឆិកា ឆ្នាំ២០២៣កន្លងទៅ ពេលនេះបាន និងកំពុងបញ្ចេញលទ្ធផលជាផ្លែផ្កាដល់ប្រជាពលរដ្ឋហើយ។

រាប់ចាប់តាំងពីបើកបវេនសនកាលបណ្ដុះបណ្ដាលវគ្គមកទល់ពេលនេះ គឺមានរយៈពេល៦ខែហើយ រីឯសិក្ខាកាមដែលបានចូលរួមក្នុងវគ្គបណ្ដុះបណ្ដាលនេះក៏មានអ្នកបញ្ចប់ការសិក្សាជាបណ្ដើរៗ​ផងដែរ។

លោក មាស កុសល ជាអតីតសិក្ខាកាមលើជំនាញអគ្គិសនី ហើយបច្ចុប្បន្នកំពុងបម្រើការងារ​នៅ​ក្រុមហ៊ុន​ឯកជនមួយ។ យុវជនរូបនេះ បានឆ្លងកាត់ការបណ្ដុះបណ្ដាលជំនាញអគ្គិសនីនៅវិទ្យាស្ថាន NPIC ក្រោមកម្មវិធីបណ្ដុះបណ្ដាលជំនាញ ១លាន៥សែននាក់ ដោយមិនគិតថ្លៃ។

អតីតសិក្ខាកាមរូបនេះបានឱ្យដឹងថា ខ្លួនមកពីខេត្តកំពត និងមកពីគ្រួសារដែលមានជីវភាពមិនសូវធូរធាប៉ុន្មានទេ ដោយមានតែឪពុកជាបង្គោលគ្រួសារ។ យុវជនរូបនេះបានឱ្យដឹងទៀតថា ជំនាញអគ្គិសនីជាជំនាញដែលលោកស្រឡាញ់តាំងពីក្មេងមក ប៉ុន្តែមិននឹកស្មានថានឹងអាចមានឱកាសរៀនសូត្រដោយមិនអស់ប្រាក់។

នៅក្នុងអំឡុងពេលបណ្ដុះបណ្ដាលទៀតសោត យុវជនរូបនេះក៏ទទួលបានឱកាសទៅសិក្សា និងធ្វើការដកបទពិសោធន៍នៅក្រៅប្រទេសផងដែរ ដែលកន្លងមកលោកមិនធ្លាប់នឹកស្មានដល់។

បើតាមការបញ្ជាក់ពីយុវជនរូបនេះ ក្រោយបញ្ចប់ការសិក្សា រូបលោក រួមជាមួយនឹងសិក្ខាកាមដទៃទៀត ក៏ត្រូវបានក្រុមហ៊ុនឯកជនជ្រើសរើសយកទៅបម្រើការងារទាំងអស់ ដោយហេតុថាទីផ្សារការងារ​លើជំនាញនេះមានតម្រូវការច្រើន។ ជាមួយនឹងការទទួលបានឱកាសការងារស្របតាមជំនាញផ្នែកអគ្គិសនីមួយនេះ បានកែប្រែជីវភាពគ្រួសារបានធូរស្រាលមួយកម្រិត។

មិនខុសគ្នាប៉ុន្មានពីលោក មាស​ កុសល នោះទេ, សម្រាប់ កញ្ញា សៀ សុវណ្ណនរ័ត្ន គឺជាសិក្ខាកាមដែលកំពុងចូលរួមវគ្គបណ្ដុះបណ្ដាលផ្នែកផលិតនំនៅវិទ្យាស្ថានជាតិ សហគ្រិនភាព និងនវានុវត្តន៍ និងដែលបច្ចុប្បន្ន​កំពុង​ហាត់ការនៅសណ្ឋាគារ Hyat Regency ។

បើតាមការរៀបរាប់ពីយុវតីរូបនេះបានឱ្យដឹងថា ជំនាញដែលខ្លួនកំពុងរៀនជាជំនាញល្អ ដែលមានតម្រូវការច្រើន ជាពិសេសនៅតាមបណ្ដាសណ្ឋាគារតែម្ដង។ ម្យ៉ាងទៀត ការបណ្ដុះបណ្ដាលគឺធ្វើឡើងដោយប្រើប្រាស់ការអនុវត្តជាគោល ដូច្នេះសិក្ខាកាមទាំងអស់សុទ្ធតែមានជំនាញផលិតនំច្បាស់លាស់រៀងៗខ្លួនតែម្ដង។

កញ្ញាបានបន្តឱ្យដឹងទៀតថា ក្រោយបញ្ចប់ការសិក្សា សិក្ខាកាមអាចជ្រើសរើសទៅបម្រើការងារឱ្យក្រុមហ៊ុនឯកជន ឬអាចបើកអាជីវកម្មដោយខ្លួនឯងក៏បាន។

គួររំលឹកផងដែរថា បច្ចុប្បន្នក្រសួងការងារកំពុងធ្វើការ​បណ្តុះបណ្តាល​ជំនាញវិជ្ជាជីវៈ និង​បច្ចេកទេស​ចំនួន ៥៤៥ថ្នាក់នៅទូទាំង​ប្រទេស ដោយ​ចំណោម​ទាំងជាង ៥០០ថ្នាក់នេះ រួមមាន​វិស័យសំណង់ ១២៥ថ្នាក់ អគ្គិសនី និងថាមពល ៨ថ្នាក់, អេឡិចត្រូនិកចំនួន ១៩ថ្នាក់, កម្មន្តសាលចំនួន ២១ថ្នាក់, មេកានិកទូទៅ/មេកានិករថយន្តចំនួន ៨៥ថ្នាក់, ធុរកិច្ច និងព័ត៌មានវិទ្យា ១២០ថ្នាក់, សេវាកម្មចំនួន ៣៥ថ្នាក់, បរិក្ខារត្រជាក់ និងកម្តៅចំនួន ៦៦ថ្នាក់ ទេសចរណ៍ចំនួន ៤១ថ្នាក់, កសិកម្ម និងកសិ-ឧស្សាហកម្មចំនួន ២៥ថ្នាក់ មានសិស្សចូលរៀនសរុប ១២ ១១២នាក់។ នេះបើតាមការឱ្យដឹងពីអ្នកនាំពាក្យក្រសួងការងារកាលពីខែកុម្ភៈកន្លងទៅ៕