សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ នាយករដ្ឋមន្ត្រីនៃប្រទេសជប៉ុន លោក Shigeru Ishiba កាលពីថ្ងៃអង្គារសប្ដាហ៍នេះបានប្រកាសថា ជប៉ុន និងប្រទេសហ្វីលីពីន កំពុងរៀបចំផែនការពិភាក្សារួមគ្នាទៅលើឯកសារកតិកាសញ្ញាលើវិស័យការពារជាតិចំនួន២ក្នុងពេលឆាប់ៗនេះ។
មេដឹកនាំជប៉ុនរូបនេះបានលើកឡើងទៀតថា កតិកាសញ្ញាដ៏សំខាន់នេះនឹងជួយលើកកំពស់សម្ព័ន្ធភាពលើវិស័យសន្តិសុខជាតិរវាងប្រទេសទាំងពីរផង ជាពិសេសគឺដើម្បីបន្តភាពរឹងមាំក្នុងការប្រឈមមុខជាមួយនឹងមហាអំណាចចិននៅចំពោះបញ្ហាជម្លោះដែនទឹករួមគ្នាផង។
ជំនួបពិភាក្សាគ្នាដោយផ្ទាល់រវាងមេដឹកនាំជប៉ុនជាមួយនឹងលោកប្រធានាធិបតីហ្វីលីពីន Ferdinand Marcos Jr. នាទីក្រុងម៉ានីលកាលពីថ្ងៃអង្គារដដែលនេះក៏មានការលើកឡើងអំពីប្រធានបទនៃបញ្ហាតម្លើងពន្ធគយរបស់សហរដ្ឋអាមេរិក ហើយក៏ដូចជាបញ្ហានៃដំណើរការប្រព័ន្ធទីផ្សារសេរីរបស់សកលផងដែរ។
គួរឲ្យដឹងដែរថា ដំណើរទស្សនកិច្ចទៅដល់ប្រទេសហ្វីលីពីនលើកនេះ ត្រូវបានធ្វើឡើងបន្ទាប់ពីលោក Ishiba បានបញ្ចប់ទស្សនកិច្ចនៅក្នុងប្រទេសវៀតណាមមុននេះមួយថ្ងៃ។ វៀតណាមក៏ត្រូវបានគេស្គាល់ថាជាភាគីស្ថិតនៅក្នុងបញ្ជីចំណាប់ខ្មាំងនៃវិបត្តិបញ្ហាជម្លោះដែនទឹកជាមួយនឹងរដ្ឋាភិបាលទីក្រុងប៉េកាំងអស់រយៈពេលជាច្រើនឆ្នាំមកហើយដូចគ្នា។
យ់ាងណាក្តី មកទល់ពេលនេះក្រុងប៉េកាំងនៅមិនទាន់ធ្វើការឆ្លើយតបណាមួយចំពោះដំណើរទស្សនកិច្ចលើកនេះទេ ប៉ុន្តែចិនតែងតែបានទាមទារថា ដែនទឹកទាំងអស់ដែលមានវត្តមានកងឆ្មាំសមុទ្ររបស់ខ្លួន និងមូលដ្ឋានទ័ពនៅតាមដែនកោះសិប្បនិម្មិតទាំងអស់គឺស្ថិតនៅក្នុងដែនអធិបតេយ្យភាពរបស់ខ្លួនទាំងដែលភាគីជម្លោះផ្សេងទៀត ដូចជា ម៉ាឡេស៊ី ប្រ៊ុយណេ និងកោះតៃវ៉ាន់ មិនដែលបានទទួលស្គាល់នោះឡើយ។
នៅក្នុងសេចក្តីថ្លែងការណ៍រួម លោក Marcos បានលើកឡើងថា៖ លោកនឹងបន្តពង្រឹងដៃគូជាយុទ្ធសាស្ត្រជាមួយនឹងប្រទេសជប៉ុនដើម្បីបន្តចែករំលែកគំនិតយោបល់ក្នុងការរក្សាឲ្យបាននូវប្រជាធិបតេយ្យ និងសណ្តាប់ធ្នាប់អន្តរជាតិដោយផ្អែកលើច្បាប់។
ជារឿយៗ នៅតាមដែនសមុទ្រចិនខាងកើត ប្រទេសចិនតែងតែបញ្ជូននាវាឆ្មាំសមុទ្រ និងយន្តហោះ ទាំងដែនទឹក និងដែនអាកាស ដែលព័ទ្ធជុំវិញកោះមួយចំនួន ត្រូវបានទាមទារដោយទីក្រុងតូក្យូ និងប៉េកាំង ដើម្បីរំខានដល់នាវាជប៉ុន។
កតិកាសញ្ញាការពារជាតិដែលជប៉ុន និងហ្វីលីពីននឹងចាប់ផ្តើមចរចា ត្រូវបានគេហៅថា ជាកិច្ចព្រមព្រៀង Acquisition and Cross-servicing Agreement ដែលក្នុងនោះទី១គឺនឹងអនុញ្ញាតឱ្យមានការផ្តល់ស្បៀងអាហារ ប្រេងឥន្ធនៈ និងសម្ភារៈចាំបាច់ផ្សេងទៀតនៅពេលកងកម្លាំងជប៉ុនធ្វើទស្សនកិច្ចនៅហ្វីលីពីន ហើយមួយផ្សេងទៀតគឺផ្តោតទៅលើសុវត្ថិភាពនៃការចែករំលែកព័ត៌មានពីកិច្ចការពារដោយសម្ងាត់ និងព័ត៌មានយោធារវាងភាគីទាំងពីរ៕
Account
Security
Favourite Content