(កំពង់ធំ) ៖ ពិធីបុណ្យទន្លេលើកទី៧ ឆ្នាំ២០២៣នេះ បានប្រព្រឹត្តទៅចាប់ពីថ្ងៃទី៨-១០ ខែមីនា  ក្រោមប្រធានបទ «ទន្លេរបស់យើង ដើម្បីបច្ចុប្បន្ន និងអនាគត-Our River for Now and Next»។ ការប្រារព្វពិធីបុណ្យទន្លេ មិនត្រឹមតែជាពិធីបុណ្យធម្មតា​ តែជាព្រឹត្តិការណ៍មួយដែលនឹងផ្ដល់អាទិភាពដល់ការអភិវឌ្ឍតំបន់តាមដងទន្លេ និងជំរុញសេដ្ឋកិច្ចរបស់ប្រជាជនមូលដ្ឋាន។

ពិធីបុណ្យទន្លេក៏ជាចំណែកមួយដែលបង្ហាញអំពីភាពជោគជ័យរបស់កម្ពុជាក្នុងការរលាស់ខ្លួនចេញពីវិបត្តិសេដ្ឋកិច្ចដែលបង្កឡើងដោយជំងឺកូវីដ ១៩ ផងដែរ។ ដោយភាពជោគជ័យនេះបានធ្វើឱ្យប្រទេស​កម្ពុជា​មានការលូតលាស់ក្នុងអត្រានៃកំណើនសេដ្ឋកិច្ចប្រចាំឆ្នាំជាមធ្យមប្រមាណ ៧% ក្នុងរយៈពេល​ជាងមួយទសវត្សរ៍ចុងក្រោយនេះ។

នៅក្នុងសារលិខិតរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជានាឱកាសបុណ្យទន្លេបានលើកឡើងថា ប្រធាន​បទបុណ្យទន្លេលើកទី៧ ឆ្នាំ២០២៣នេះ គឺពិតជា​សមស្របសម្រាប់បរិបទ​បច្ចុប្បន្នដែលរាជរដ្ឋា​ភិបាលកម្ពុជាបន្តផ្តល់អាទិភាពដល់ការអភិវឌ្ឍ តំបន់តាមដងទន្លេ ជាពិសេសការជំរុញការ​អភិវឌ្ឍសេដ្ឋកិច្ចមូលដ្ឋាន ការការពារ និងអភិរក្សធនធាន​ធម្មជាតិ ដោយឈរលើការប្ដេជ្ញាចិត្ត​រួមមួយច្បាស់លាស់ ក្នុងការរក្សាតុល្យភាព រវាងផលប្រយោជន៍​សេដ្ឋកិច្ច សង្គម បរិស្ថាន និងវប្បធម៌ ប្រជាពលរដ្ឋមូលដ្ឋាន ធានាបាននូវការអភិវឌ្ឍ​ទាំងសម្រាប់​បច្ចុប្បន្ន និងទៅអនាគត។

បន្ថែមពីនេះផងដែរ រាជរដ្ឋាភិបាលបានកំណត់ប្រារព្ធពិធីបុណ្យទន្លេ ឱ្យក្លាយទៅជាព្រឹត្តិការណ៍ ទេសចរណ៍ដ៏សំខាន់មួយសម្រាប់កម្ពុជា ដែលមិនត្រឹមតែចូលរួមចំណែកក្នុងការផ្សព្វផ្សាយ ពីសក្តានុពលទេសចរណ៍ នៃខេត្តជាប់ដងទន្លេរបស់កម្ពុជាប៉ុណ្ណោះទេ ប៉ុន្តែថែមទាំងចូលរួមគាំទ្រ នយោបាយរបស់រាជរដ្ឋាភិបាលកម្ពុជាក្នុង ការយកចិត្តទុកដាក់អភិវឌ្ឍតំបន់តាមដងទន្លេប្រកប ដោយនិរន្តរភាព និងការទទួលខុសត្រូវ។ ទន្ទឹមនឹងនេះ ព្រឹត្តិការណ៍នេះក៏ជាឱកាសមួយដើម្បីពង្រឹង គុណភាពសេវាកម្ម និងការបង្កើត និងអភិវឌ្ឍផលិតផលទេសចរណ៍ ថ្មីៗប្រកបដោយការច្នៃប្រឌិត ខ្ពស់ ជាពិសេសទេសចរណ៍តាមនាវា (River-Cruise) និងសហគមន៍ទេសចរណ៍ តាមដងទន្លេផងដែរ។

ដោយឡែក ការរៀបចំពិធីបុណ្យទន្លេលើកទី៧ ឆ្នាំ២០២៣ នៅខេត្តកំពង់ធំនេះ មានលក្ខណៈកាន់ តែវិសេស វិសាល ដោយសារខេត្តកំពង់ធំ ស្ថិតនៅចំកណ្តាលប្រទេសកម្ពុជា មានព្រំប្រទល់ដ៏វែង ជាប់បឹង ទន្លេសាប មានប្រាសាទ សំបូរព្រៃគុក ដែលត្រូវបានចុះបញ្ជីជាបេតិកភណ្ឌរូបីនៃមនុស្សជាតិ របស់អង្គការយូណេស្កូ កាលពីឆ្នាំ២០១៧ ជា ខេត្តជម្រុកស្រូវដ៏សំខាន់របស់កម្ពុជា ជាអតីតរាជធានី និងមានរឿងរាវប្រវត្តិសាស្ត្របង្កប់ទុកជាច្រើន រួមជាមួយ តំបន់ទេសចរណ៍ និងប្រវត្តិសាស្ត្រជា ច្រើនទៀត។

សម្ដេចបានគូសបញ្ជាក់ផងដែរថា៖

“រាជរដ្ឋាភិបាល នឹងបន្តប្រារព្ធពិធីបុណ្យទន្លេនេះជា​រៀងរាល់​ឆ្នាំនៅតាមបណ្តាខេត្តជាប់ដងទន្លេ នៃព្រះរាជា ណាចក្រកម្ពុជា ដែលទាំងអស់នេះ​សបញ្ជាក់​ឱ្យឃើញថា រាជរដ្ឋាភិបាលបាននិងកំពុងជំរុញការអភិវឌ្ឍវិស័យ ទេសចរណ៍កម្ពុជា ពិសេសការ​អភិវឌ្ឍផលិតផល ទេសចរណ៍តាមដងទន្លេ រួមចំណែកធ្វើឱ្យកម្ពុជាក្លាយជាគោលដៅ ទេសចរណ៍​ប្រកបដោយ គុណភាពទាំងក្នុងតំបន់ និងឆាកអន្តរជាតិ”

គួរឱ្យដឹងថា ទឹកទន្លេជាប្រភពនៃការចិញ្ចឹមបីបាច់ជីវិត ជាទីកន្លែងដែលបណ្តុះបណ្តាល និងពូនជ្រុំនូវ វប្បធម៌ និងអរិយធម៌។ ទន្លេបានផ្សារភ្ជាប់ប្រទេសនានា ដែលហូបទឹកនៃទន្លេតែមួយឱ្យក្លាយ ជាសហគមន៍រួមវាសនាតែមួយ ដែលប្រកបដោយសមភាព ជួយយកអាសាគ្ន ដោយស្មោះត្រង់ និងស្និទ្ធស្នាលដូចជាមនុស្ស​ក្នុងគ្រួសារ​​តែមួយ។ ទន្លេ ក៏បានរួមចំណែកជំរុញការតភ្ជាប់រឹតចំណង មិត្តភាព សាមគ្គីភាពរវាងបណ្តា​ប្រទេស​​ក្នុងតំបន់អាស៊ាន និងបានពង្រឹងភាពជាដៃគូក្នុងក្របខ័ណ្ឌ តំបន់នានា ដូចជាក្របខ័ណ្ឌ CLMV ក្របខ័ណ្ឌមហាអនុតំបន់មេគង្គ (GMS) មេគង្គ-ជប៉ុន មេគង្គ-ឡានឆាង មេគង្គ-កូរ៉េ និងមេគង្គ-គង្គាជាដើម៕