ភ្នំពេញ៖ ស៊ីម៉ងត៍អូដ្ឋរបស់ក្រុមហ៊ុនជីបម៉ុង និងស្ថានីយទូរទស្សន៍បាយ័ន បានចុះហត្ថលេខាលើអនុស្សរណៈយោគយល់គ្នា ស្តីពីការរៀបចំប្រដាល់គុនខ្មែរ «កំពូលអ្នកច្បាំងអូដ្ឋ» នាល្ងាចថ្ងៃទី២៧ ខែមីនា ឆ្នាំ២០២៥ នៅការិយាល័យកណ្តាលរបស់ក្រុមហ៊ុន ជីប ម៉ុង។ នេះជាប្រវត្តិសាស្ត្រទំព័រគុនខ្មែរថ្មី ដែលនឹងចាប់ផ្តើមនៅថ្ងៃទី២៩ ខែមីនា ឆ្នាំ២០២៥នៅសង្វៀនស្ថានីយទូរទស្សន៍បាយ័ន។កិច្ចសហការនេះនឹងជួយលើកស្ទួយប្រដាល់គុនខ្មែរ ដែលជាកីឡាតជំនាន់របស់បុព្វបុរសខ្មែរ ក៏ដូចជាផ្សព្វផ្សាយគុនខ្មែរឱ្យបានទូលំទូលាយលើឆាកជាតិ និងអន្តរជាតិ។

អ្នកឧកញ៉ា លាង ពៅ(ភីធើរ) អគ្គនាយកក្រុមហ៊ុន ជីប ម៉ុង អ៊ិនស៊ី បានថ្លែងថា ជីបម៉ុងគ្រុប ជាក្រុមហ៊ុនកូនខ្មែរ១០០ភាគរយ ចង់ឱ្យមានការចូលរួមផ្សព្វផ្សាយ និងជួយលើកស្ទួយកសាងឱ្យបានល្អនូវវិស័យកីឡាប្រដាល់គុនខ្មែរ ដែលជាកីឡាប្រដាល់របស់ជាតិបន្សល់ទុកតាំងពីដូនតារបស់យើងរាប់រយឆ្នាំតជំនាន់រៀងមក។

អ្នកឧកញ៉ា បានសង្កត់ធ្ងន់ថា ៖

«ជីប ម៉ុង ចង់ឃើញ ប្រដាល់គុនខ្មែរមួយនេះ ឱ្យកាន់តែប្រសើរឡើង និងល្បីល្បាញចូលទៅដល់ឆាកអន្តរជាតិ។ ស៊ីម៉ងត៍អូដ្ឋបានគាំទ្រគុនខ្មែរយ៉ាងខ្លាំង។ ស៊ីម៉ងត៍អូដ្ឋ ជាក្រុមហ៊ុនកូនរបស់ក្រុមហ៊ុន ជីប ម៉ុងគ្រុប ដែលជាក្រុមហ៊ុនយក្សមួយបានឈរជើង នៅក្នុងប្រទេសកម្ពុជាជិត៥ទស្សវត្សរ៍មកហើយ ។នេះជាសក្ខីភាពមួយបង្ហាញថា ក្រុមហ៊ុនជីបម៉ុង អុិនស៊ី ដែលបន្តដើរតាមគន្លងរបស់ជីបម៉ុងគ្រុបជួយលើកស្ទួយនូវវិស័យកីឡាណា ដែលលើកស្ទួយដល់ប្រទេសជាតិ»។

ស៊ីម៉ងត៍អូដ្ឋ និងម៉ាកវី ជាផលិតផលដែលមានគុណភាពខ្ពស់ ទទួលស្គាល់ពីមហាជន ក្រុមហ៊ុនសាងសង់ធំៗវិស្វករសំណង់ អគារធំៗ ខ្ពស់ៗនៅក្នុងប្រទេសកម្ពុជា ដែលរួមមានអគារ កម្ពស់ជាង៤០ជាន់ ស្ពាន ថ្នល់ និងហេដ្ឋារចនាសម្ព័ន្ធធំៗក្នុងប្រទេសកម្ពុជាសុទ្ធតែប្រើស៊ីម៉ងត៍របស់ក្រុមហ៊ុន ជីប ម៉ុង អុិនស៊ី ។ ស៊ីម៉ងត៍អូដ្ឋ និងម៉ាកវី ផលិតឡើងដោយរោងចក្រស្តង់ដារពិភពលោក ជាមួយបច្ចេកវិទ្យាទំនើបចុងក្រោយបង្អស់មកពីអឺរ៉ុបដែលមានទំហំទឹកប្រាក់វិនិយោគជិត៣00លានដុល្លារ។

ទាក់ទងនឹងស៊ីម៉ងត៍អូដ្ឋ អ្នកឧកញ៉ា បានបញ្ជាក់ថា៖ លោក និងបងប្រុស អ្នកឧកញ៉ា លាង ម៉េង ជាអ្នកបង្កើតនិងឌីហ្សាញ ឡូហ្គោ រូបអូដ្ឋនិងពណ៌នេះឡើងនាឆ្នាំ២០០៤។កាសម្រេចយករូបអូដ្ឋនេះពីព្រោះអូដ្ឋជាសត្វ តស៊ូអត់ធ្មត់ ធន់នឹងកំដៅ ព្យុះខ្សាច់ ភ្លៀង ខ្យល់ ។ពណ៌ស៊ីម៉ងត៍អូដ្ឋ ជាពណ៌អូដ្ឋពិតប្រាកដ ដែលនេះជាការសម្រេចចិត្តមួយដែលត្រឹមត្រូវ និងទទួលបានការគាំទ្រយ៉ាងខ្លាំង។ ក្រោយចេញស៊ីម៉ងត៍អូដ្ឋបាន២ឆ្នាំ ដើម្បីធ្វើឱ្យកាន់តែសម្បូរបែប ក្រុមហ៊ុនក៏បានបង្កើតស៊ីម៉ងត៍ម៉ាកវី មួយទៀតដែលរហូតមកដល់ពេលនេះមានអាយុកាលជិត២ទស្សវត្សរ៍មកហើយ។

អ្នកឧកញ៉ា បានបញ្ជាក់ថា៖

« ជីបម៉ុងគ្រុប នៅពេលវិនិយោគអ្វីមួយគឺវិនិយោគច្បាស់លាស់ ហ្មត់ចត់ មិនថាពាណិជ្ជកម្មតូច ឬធំនោះទេ និយាយរួម ធ្វើឱ្យល្អឥតខ្ចោះ មានស្តង់ដារអន្តរជាតិ និងស្តង់ដារពិភាពលោក ។ រោងចក្រស៊ីម៉ងត៍អូដ្ឋ និងវី ផលិតឡើងដោយរោងចក្រស្តង់ដារពិភពលោក ជាមួយបច្ចេកវិទ្យាទំនើបចុងក្រោយបង្អស់មកពីអឺរ៉ុបដែលមានទំហំទឹកប្រាក់វិនិយោគជិត៣០០លានដុល្លារ និងគិតគូរយ៉ាងម៉តចត់ដល់ផលប៉ះពាល់ចំពោះបរិស្ថាន ដែលក្នុងនោះរួមមាន ជីប ម៉ុង អេកូសាយខល ដែលបំប្លែងកាកសំណល់ធំជាងគេ និងដំបូងគេនៅកម្ពុជា ដោយបានចូលរួមជួយគាំពារបរិស្ថានឲ្យកាន់តែល្អប្រសើរ»។

កួរបញ្ជាក់ដែរថា ក្រុមហ៊ុន ជីប ម៉ុង គ្រុប និងជីបម៉ុងអុិនស៊ី តែងតែចូលរួមទទួលខុសត្រូវជួយសង្គមជាច្រើនរាប់មិនអស់ ជាពិសេសក្នុងយុទ្ធនាការកូវីដ ជីប ម៉ុងបានបរិច្ចាគរាប់លានដុល្លារ ជួយរដ្ឋាភិបាលដូចជាទិញវ៉ាក់សាំងជាដើមដែលកាលនោះកម្ពុជាជាប្រទេសដំបូងគេនៅអាស៊ីអាគ្នេយ៍ដែលបានចាក់វ៉ាកសាំងជូនប្រជាពលរដ្ឋមុនគេ៕