ភ្នំពេញ ៖ ការប្រើប្រាស់កម្ចីពីគ្រឹះស្ថានហិរញ្ញវត្ថុផ្លូវការ បានជួយជំរុញឱ្យជីវភាពរបស់ប្រជាជនមានភាពប្រសើរឡើង ល្គឹកណាប្រជាជនមានការរៀបចំផែនការច្បាស់លាស់ និងប្រើប្រាស់កម្ចីប្រកបដោយទំនួលខុសត្រូវ។

ជាក់ស្តែង អ្នកស្រី គីម ចាន់សុខា រស់នៅក្នុងខណ្ឌដង្កោ រាជធានីភ្នំពេញ បច្ចុប្បន្ន មានមុខរបរលក់ចាប់ហួយ បានប្រើប្រាស់កម្ចីពីគ្រឹះស្ថានមីក្រូហិរញ្ញវត្ថុ ហើយមានជីវភាពគ្រួសារល្អប្រសើរបន្ទាប់ពីបានប្រើប្រាស់កម្ចីពីគ្រឹះស្ថានមីក្រូហិរញ្ញវត្ថុ។

អ្នកស្រីបានរៀបរាប់ថា ដំបូងឡើយ អ្នកស្រី និងប្តីមានមុខរបរតូចតាចមួយ ដោយអ្នកស្រីលក់ផ្លែឈើនៅមុខរោងចក្រ។ ដោយសារអ្នកស្រីមិនសូវមានដើមទុនច្រើន អ្នកស្រីក៏បានសម្រេចចិត្តប្រើប្រាស់កម្ចីពីគ្រឹះស្ថានមីក្រូហិរញ្ញវត្ថុ ដើម្បីជាដើមទុនទិញរម៉កទុកដឹកបាញ់ស៊ុង និងបង្អែមយកទៅលក់នៅមុខរោងចក្រ។

បន្ទាប់មក អ្នកស្រីក៏បានសម្រេចចិត្តប្រើបាស់កម្ចីជាលើកទី២​ យកទៅទិញអីវ៉ាន់ ដើម្បីដាក់លក់ទៅផ្ទះ។ ចំណូលដែលទទួលបានពីមុខរបរនេះ អ្នកស្រីបានប្រើប្រាស់វា ដើម្បីសាងសង់ដំបូល និងឡៅតឿ ហើយក៏ប្តូរម៉ូតូថ្មីឱ្យប្តីរបស់អ្នកស្រីដើម្បីជាមធ្យោបាយសម្រាប់ការរកស៊ីជួយដល់គ្រួសារ។

បន្ទាប់ពីការប្រើប្រាស់កម្ចីលើកទី២​ ការរកស៊ីរបស់អ្នកស្រីមានដំណើរការល្អប្រសើរឡើង។ អ្នកស្រីបានចាប់ផ្តើមបង្កើនអីវ៉ាន់ ហើយអ្នកស្រីបានបង់រំលស់ទូទឹកកក​​ ដើម្បីជួយពង្រីកមុខរបរអ្នកស្រីឱ្យកាន់តែធំជាងមុន។

អ្នកស្រី គីម ចាន់សុខា បានឱ្យដឹងថា៖

“ដោយសារមានកម្ចីនេះខ្ញុំអាចមានដើមទុនទិញឥវ៉ាន់ចូលផ្ទះលក់បានច្រើនជាងមុន ហើយក៏អាចទិញម៉ូតូថ្មីឱ្យគ្រួសារខ្ញុំរកស៊ីបន្ថែម។ ពីមុនគ្រួសារខ្ញុំរកចំណូលបានបន្តិចបន្តួចប៉ុណ្ណោះពីការលក់ផ្លែឈើនៅមុខរោងចក្រ ប៉ុន្តែពេលនេះខ្ញុំអាចរកចំណូលផ្គត់ផ្គង់គ្រួសារបានគ្រប់គ្រាន់ ហើយថែមទាំងអាចពង្រីកការរកស៊ីរបស់ខ្ញុំថែមទៀតផង។”

អ្នកស្រីបានឱ្យដឹងថា អ្នកស្រីមានផែនការច្បាស់លាស់ មុនពេលសម្រេចចិត្តប្រើប្រាស់កម្ចី ប៉ុន្តែបើយកលុយគេមកហើយ មិនមានទំនួលខុសត្រូវទេ នោះអ្នកស្រីមិនសម្រេចចិត្តប្រើប្រាស់កម្ចីទេ។ អ្នកស្រីបានបញ្ជាក់ដូច្នេះថា ៖​​

“ខ្ញុំមានគម្រោងការច្បាស់ថា ខ្ញុំយកលុយ (កម្ចី) ហ្នឹងមក គឺដើម្បីរកស៊ី។ បើយើងមិនខ្ចីគេ យើងមិនមានទុនដើម្បីរកស៊ី។”

លោកជំទាវបណ្ឌិត ជា សិរី​ អគ្គទេសាភិបាល ធនាគារជាតិនៃកម្ពុជា មានប្រសាសន៍ថា ៖

“ការដែលយើងខ្ចីលុយគេមិនមែនសុទ្ធតែអាក្រក់ទេ សំខាន់ពេលយើងទៅខ្ចីលុយគេ យើងត្រូវដឹងថា យើងយកទៅប្រើអីពិតប្រាកដ បើយើងខ្ចីលុយគេទៅរកស៊ីជួញដូរ ដើម្បីបានចំណូលបន្ថែម យើងសងគេវិញ​នោះជាការណ៍ល្អ តែបើយើងខ្ចីលុយគេយកទៅប្រើខុសគោលដៅ ដូចជា ដូរស៊េរីម៉ូតូ ដូរទូរសព្ទថ្មី អាហ្នឹងខុសហើយ។ ហើយយើងមិនគួរចាយខ្ជះខ្ជាយនោះទេ គឺត្រូវចេះសន្សំលុយ មានទម្លាប់សន្សំ ខ្ញុំសូមលើកទឹកចិត្តឱ្យសន្សំជាមួយគ្រឹះស្ថានផ្លូវការ ពីព្រោះមានទាំងសុវត្ថិភាព និងមានការប្រាក់ដែលជាប្រភពចំណូលបន្ថែមផងដែរ៕”