នៅថ្ងៃចុងសប្ដាហ៍កន្លងទៅនេះ គឺជាថ្ងៃធ្វើបទបង្ហាញកម្មវិធីនវានុវត្តន៍បញ្ច្រាសរដូវកាលទី ៣ ដោយក្នុងនោះភាគីពាក់ព័ន្ធបានចូលរួមចែករំលែក និងលើកឡើងនូវបញ្ហាមួយចំនួន ទាក់ទងនឹងបច្ចេកវិទ្យាហិរញ្ញវត្ថុ។

ដោយឡែក កម្មវិធីនវានុវត្តន៍បញ្ច្រាសរដូវកាលទី ៣ នេះ​នៅតែផ្ដោតសំខាន់លើវិស័យបច្ចេក​វិទ្យា​ហិរញ្ញវត្ថុនៅកម្ពុជា ដែលមានគោលបំណងបើកឱ្យបណ្តាសាជីវកម្ម និងក្រុមហ៊ុនធំៗក្នុងវិស័យ​បច្ចេក​វិទ្យាហិរញ្ញវត្ថុមានឱកាសចូលរួមផ្តល់ជាទស្សនទាន តាមរយៈការធ្វើបទបង្ហាញពីចំណោទបញ្ហាដែល​ខ្លួន​កំពុងជួបប្រទះក្នុងន័យដើម្បីស្វែងរកដំណោះស្រាយបែបនវានុវត្តន៍ពីសំណាក់នវានុវត្តជន និងធុរកិច្ចថ្មីក្នុងប្រទេសកម្ពុជា។

កម្មវិធីនេះរៀបចំឡើងក្នុងរយៈ ពេល ២០សប្តាហ៍ ដោយបែងចែកជា ៥ ដំណាក់កាលធំៗរួមមាន៖ ១. ការដាក់បង្ហាញចំណោទបញ្ហា (Challenge Roadshow), ២) ថ្ងៃបទបង្ហាញបញ្ច្រាស (Reverse Pitch Day) ពីសំណាក់ស្ថាប័នធំៗ និងតួអង្គ ក្នុងវិស័យបច្ចេកវិទ្យាហិរញ្ញវត្ថុ, ៣) វគ្គជំរុំចាប់ផ្តើម (Pre-RI Bootcamp), ៤) វគ្គនវានុវត្តន៍បញ្ច្រាស, និង ៥) ថ្ងៃ បទបង្ហាញឆ្ពោះទៅមុខ (Forward Pitch Day)។

បើតាមលោក ជា ស៊ុនសត្យា ប្រធានផ្នែកអភិវឌ្ឍន៍សហគ្រិនភាពនៃសហគ្រិនខ្មែរបានឱ្យដឹងថា កម្ម​វិធីនេះផ្សារភ្ជាប់កិច្ចសហប្រតិបត្តិការ និងបង្កើននូវអន្តរកម្មរវាងភាគីពាក់ព័ន្ធ ជាពិសេសស្ថាប័នធំៗ ហើយកន្លងមកសហគ្រិនខ្មែរបានសហការជាមួយ Techo Start up បាន២រដូវកាលហើយតាំងពីឆ្នាំ២០២១មកម៉្លេះ។

លោកបន្តឱ្យដឹងថា ឆ្នាំ២០២៣នេះ វិស័យបច្ចេកវិទ្យាហិរញ្ញវត្ថុនៅតែមានកាលានុវត្តភាព និងអាច​ជំរុញវិស័យបច្ចេកវិទ្យា នវានុវត្តន៍ និងសេដ្ឋកិច្ចឌីជីថលដើម្បីប្រែក្លាយប្រទេសកម្ពុជាទៅជាប្រទេស​មួយដែល​មានចំណូលមធ្យមកម្រិតខ្ពស់នៅឆ្នាំ២០៣០ តាមគោលន​យោបាយ​ជាតិស្តី​ពីវិទ្យាសាស្ត្រ បច្ចេកទេស និងនវានុវត្ត ២០២០ ដល់២០៣០ និងគោលនយោបាយអភិវឌ្ឍន៍ឧស្សាហកម្មកម្ពុជាឆ្នាំ ២០១៥ ដល់២០២៥។

ការអនុវត្តកម្ម​វិធីនេះជាយុទ្ធសាស្ត្រដ៏មានប្រសិទ្ធភាពមួយក្នុងការគាំទ្រធុរកិច្ចថ្មី សហគ្រាសធនតូច និងមធ្យមក្នុងវិស័យ FIN Techs ប្រកបដោយ​សក្កានុពល ក៏ចូលរួមចំណែកក្នុង​បំពេញចន្លោះប្រហោងដែលមាននៅក្នុងប្រព័ន្ធអេកូឡូស៊ីរបស់សហគ្រិនភាព ផ្ដល់ការគាំទ្រដល់ធុរកិច្ចក្នុងការគៀរគរថវិកា គំនិតថ្មីៗ ចំណេះដឹងបច្ចេកវិទ្យាថ្មីៗ។ នេះបើតាមការបញ្ជាក់បន្ថែមរបស់ លោក ជា ស៊ុនសត្យា។

គួរបញ្ជាក់ថា កម្មវិធីនវានុវត្តន៍បញ្រ្ចាស ជាកម្មវិធីដែលមានលំនាំថ្មីប្លែកនៅក្នុងប្រទេសកម្ពុជា ដោយថ្នាក់ដឹកនាំរបស់ក្រុមហ៊ុនដៃគូប្រកាសបញ្ហាប្រឈមនៅក្នុងក្រុមហ៊ុនរបស់ពួកគេដើម្បីស្វែង​រកដំណោះ​ស្រាយពីសិស្សនិស្សិត នវានុវត្តជន ធុរកិច្ចថ្មី និងក្រុមហ៊ុន។

កម្មវិធីនវានុវត្តន៍បញ្រ្ចាសហៅកាត់ថា RI នេះ ត្រូវបានរៀបចំឡើងដោយក្រសួងសេដ្ឋកិច្ច និង ហិរញ្ញវត្ថុ និងមជ្ឈមណ្ឌលបណ្តុះធុរកិច្ចថ្មី “តេជោ” និងមានការសហការរៀបចំដោយសមាគម​ធនាគារនៅកម្ពុជា និងសហគ្រិនខ្មែរ។ លើសពីនេះទៀត កម្មវិធីនេះបានទទួលការឧបត្ថម្ភពីការិយា​ល័យឥណទានកម្ពុជា ធនាគារអេស៊ីលីដា ភីអិលស៊ី និងធនាគារឯកទេស វីង(ខេមបូឌា) ដើម្បីតម្រង់ទិស និងការប្រើប្រាស់ការទូទាត់ប្រាក់តាមឌីជីថល៕