សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ខុសប្លែកពីនំបញ្ចុកដែលបរិភោគជាមួយល្បោយស្រស់ៗធម្មតា កូនខ្មែរមួយរូបដែលបានធ្វើចំណាកស្រុកទៅធ្វើការនៅប្រទេសកូរ៉េ បានកែច្នៃ និងផលិតជានំបញ្ចុកកំប៉ុង រួមជាមួយនឹងល្បោយជាប្រភេទបន្លែក្រៀម ដែលមានរសជាតិឆ្ងាញ់ ងាយស្រួលចម្អិន អាចរក្សាទុកបានយូរ ជាពិសេសមានតម្រូវការទីផ្សារទាំងនៅក្នុងប្រទេសកូរ៉េ និងនៅក្នុងប្រទេសកម្ពុជា។
នំបញ្ចុកខ្មែរ ជាយីហោនំបញ្ចុកកំប៉ុងម្យ៉ាងដែលត្រូវបានផលិតដោយពលករខ្មែរមួយរូបនៅប្រទេសកូរ៉េខាងត្បូងដែលបានចេញលក់កាលពីដើមឆ្នាំ២០២៤ ហើយបច្ចុប្បន្នក៏មានការនាំចូលមកលក់ចែកចាយនៅក្នុងប្រទេសកម្ពុជា ក៏ដូចជាប្រទេសជិតខាងផងដែរ។
អ្នកស្រី សឿន ភីគុណ ជាឈ្មួញកណ្តាលទទួលយកនំបញ្ចុកកំប៉ុងខាងលើមកលក់នៅប្រទេសកម្ពុជា ដោយដាក់ទីស្នាក់ការកណ្តាលរបស់ខ្លួននៅក្នុងខេត្តបាត់ដំបង បានប្រាប់ឱ្យដឹងថា៖ ចំពោះផលិតផលនំបញ្ចុកកំប៉ុងនេះមានទីផ្សារល្អ ដែលអតិថិជនខ្លះទិញយកទៅទទួលទានជាលក្ខណៈឯកជន ជាលក្ខណៈគ្រួសារ ហើយខ្លះទៀតទិញយកទៅប្រគេនព្រះសង្ឃ ព្រោះអាចរក្សាទុកបានយូរ ដោយជាមធ្យមក្នុងមួយថ្ងៃអាចលក់បានប្រមាណ ៥០ប្រអប់ (១ប្រអប់មាន ៦កំប៉ុងតូច) ។
ចំពោះផលិតផលនំបញ្ចុកកំប៉ុងដែលត្រូវបានបង្កើតឡើងដោយកូនខ្មែរ និងផលិតចេញពីរោងចក្រនៅន្រទេសកូរ៉េនេះ មាន៣រសជាតិ គឺសម្លរប្រហើរ សម្លរការី និងសម្លរណាំយ៉ា ដែលមានរសជាតិឆ្ងាញ់ដូចនំបញ្ចុកស្រស់ដែរ ដោយអ្នកទទួលទានអាចធ្វើការឆុងជាមួយទឹកក្ដៅ និងលាយគ្រឿងដូចអាហារកញ្ចប់ដទៃទៀតដែរ ។ លើសពីនេះ អ្វីដែលជាលក្ខណៈពិសេសគឺនៅលើសំបកកំប៉ុងវេចខ្ចប់ក៏មានសរសេរជាអក្សរខ្មែរដោយដាក់ថា នំបញ្ចុកខ្មែរ មានរូបទង់ជាតិ និងរូបប្រាសាទអង្គរវត្ត ដែលជាសញ្ញាណជាតិខ្មែរ។
គួរបញ្ជាក់ដែរថា នំបញ្ចុកកំប៉ុង (នំបញ្ចុកខ្មែរទាន់ចិត្ត) ជាផលិតផលអាហារកែច្នៃ ដែលបង្កើតឡើងដោយ លោក ព្រីង ឆេង មានទីកន្លែងកំណើតនៅខេត្តតាកែវ ក្រោយចាកចេញពីប្រទេសកំណើតដើម្បីបម្រើការនៅក្រុមហ៊ុនអាហារមួយកន្លែងក្នុងប្រទេសកូរ៉េខាងត្បូងកាលពីឆ្នាំ២០០៨។ លោកបានប្រើប្រាស់បទពិសោធពីកន្លែងការងារផង និងសិក្សាស្រាវជ្រាវបន្ថែមផង ក៏បានសាកល្បងផលិតជាសម្លរនំបញ្ចុកខ្មែរនៅឆ្នាំ២០២៣ និងបានទាក់ទងរោងចក្រដើម្បីផលិតជានំបញ្ចុកកំប៉ុងនេះឡើង ដោយមានការឆ្លងកាត់មន្ទីរពិសោធបញ្ជាក់ពីគុណភាព មានការទទួលស្គាល់ស្តង់ដារនៅប្រទេសកូរ៉េត្រឹមត្រូវ និងបានដាក់លក់ជាផ្លូវការនៅដើមឆ្នាំ២០២៤ ៕
Account
Security
Favourite Content