ដោយមើលឃើញពីប្រយោជន៍ និងសក្ដានុពលសំណល់ក្នុងស្រុកមួយចំនួនដែលអាចកែច្នៃធ្វើជាវត្ថុធាតុដើមនៃការផលិតជីសរីរាង្គមានជីជាតិ ជួយសម្រួល និងជំរុញឱ្យការដាំដុះដំណាំចម្រុះអាចទទួលបានទិន្នផលខ្ពស់នោះ អ្នកជំនាញផ្នែកកសិកម្មមួយរូបដែលតែងចែករំលែកចំេះដឹងតាមបណ្តាញសង្គម បាន និងកំពុងដំណើរអាជីវកម្មផលិតជីសរីរាង្គ ដែលមានឈ្មោះថា «ដីដាំ សរីរាង្គ» កំពុងទទួលបានការគាំទ្រសំណាក់ប្រជាកសិករ និងអ្នកដាំដុះជាច្រើន។

លោក នី ប៊ុនថា មានទីលំនៅ ស្រុកស្រែអំបិល ខេត្តកោះកុង និងជាស្ថាបនិកគណនីបណ្តាញសង្គម ដែលបង្រៀនពីបច្ចេកទេសកសិកម្ម «រៀនដាំ» បានរៀបរាប់ឱ្យដឹងពីដំណើរនៃអាជីវកម្មលក់ដីដាំដុះសរីរាង្គថា៖

«សម្រាប់ការបង្កើតដីដាំសរីរាង្គនេះឡើង តាមពិតទៅវាជាផ្នែកមួយដែលខ្ញុំប្រើប្រាស់ដោយខ្លួនឯង ហើយធាតុផ្សំទាំងអស់សុទ្ធតែអាចរកបាននៅក្នុងស្រុក ដូចជា ជាលាមកសត្វ ធ្យូងអង្កាម ស្រកីដូង ដីពុកផុយ កម្ទេចឈើពុកផុយ សុទ្ធតែអាចយកមកធ្វើជាដីដាំដែលមានគុណភាព។ ទាំងអស់នេះគឺគ្មានអ្វីប្លែកសម្រាប់ប្រជាកសិករនោះទេ ប៉ុន្តែសម្រាប់បងប្អូនដែលពុំមានវត្ថុធាតុដើមគ្រប់គ្រាន់ដូចជាអ្នកភ្នំពេញ និងអ្នកមិនសូវមានពេលវេលាក្នុងការផលិត ទើបត្រូវការទិញដីដាំសរីរាង្គ»។

យ៉ាងណាក៏ដោយ តាមរយៈការផលិតដីដាំសរីរាង្គរបស់អ្នកជំនាញកសិកម្មរូបនេះ ក៏បានចូលរួមចំណែកក្នុងការផ្តល់ចំណូលដល់កសិករមួយចំនួនផងដែរ តាមរយៈការប្រមូលទិញលាមកគោមកធ្វើជាវត្ថុធាតុដើមក្នុងការផលិត ការផ្តល់កម្រៃដល់ក្រុមការងារដែលជាអ្នកផលិត ជាពិសេស បានបង្កើតជាផលិតផលក្នុងវិស័យកសិកម្មក្នុងស្រុក លក់ចែកជូនប្រជាកសិករដែលជាអ្នកដាំដុះក្នុងតម្លៃសមរម្យ និងមានគុណភាពមិនចាញ់ជីដែលនាំចូលពីក្រៅប្រទេសនោះទេ។

លោក នី ប៊ុនថា បានបញ្ជាក់យ៉ាងដូច្នេះថា ៖

«ចំពោះដីដាំសរីរាង្គ យើងលក់ក្នុងតម្លៃ ៧ដុល្លារក្នុងមួយបេ ដោយក្នុងមួយបេមានបរិមាណ ២០គីឡូក្រាម សម្រាប់ការទិញ ១០បេ ថែមជូន ១បេ ផងដែរ។ ដោយឡែក ការប្រើប្រាស់ដីដាំសរីរាង្គ គឺមានភាពងាយស្រួល ដែលគេអាចយកទៅអាចប្រើបានតែម្ដង​ ដូចជាអ្នកដែលដាំដំណាំឱ្យផលមិនសូវល្អ គេអាចយកដីនេះទៅដាក់តាមគល់ ធ្វើឱ្យដីកាន់តែធូរ អាចប្រើសម្រាប់ដាំសុទ្ធៗក៏បាន ឬលាយជាមួយដីសិនក៏បាន ព្រោះវាមិនមែនជាប្រភេទជីសុទ្ធ តែវាជាប្រភេទល្បាយដីដែលផ្ទុកនូវសារធាតុល្អសម្រាប់ដាំដុះ»។

ដោយឡែកចំពោះអតិថិជនដែលគាំទ្រ «ដីដាំសរីរាង្គ » ​មានទាំងអ្នកតាមដានលើគណនីបណ្តាញសង្គម «រៀនដាំ» ផង និងអ្នកក្នុងតំបន់ផង ហើក៏មានអ្នករស់នៅតាមបណ្តាខេត្តផងដែរ ជាពិសេសអ្នកដាំដុះនៅរាជធានីភ្នំពេញ ដែលតែងបញ្ជាទិញតាមបណ្តាញសង្គម ឬអនឡាញ។

គួរបញ្ជាក់ដែរថា លោក ប៊ុនថា ទើបតែចាប់ផ្ដើមអាជីវកម្មផលិតដីដាំ សរីរាង្គ ប្រមាណ ១ឆ្នាំប៉ុណ្ណោះ ប៉ុន្តែទទួលបានការគាំទ្រពីសំណាក់អ្នកចូលចិត្តដាំដុះដំណាំ ក៏ដូចជាកសិករច្រើនគួរសមបន្ទាប់ពីបានឃើញការផ្សព្វផ្សាយរបស់លោកភ្ជាប់ជាមួយការបង្ហាញពីវិធីសាស្ត្រ ក៏ដូចជាចំណេះដឹងក្នុងការដាំដំណាំដែលអាចទទួលបានទិន្នផលល្អគួរជាទីចាប់អារម្មណ៍។ សម្រាប់ពេលអនាគត លោក ប៊ុនថា ក៏មានគម្រោងពង្រីកការផលិតដីដាំសរីរាង្គ ក៏ដូចជាជីកសិកម្មផ្សេងទៀតដើម្បីតម្រូវតាមទីផ្សារដែលអតិថិជនត្រូវការ ក៏ដូចជាលើកកម្ពស់វិស័យកសិកម្មផងដែរ៕