ការទិញសិទ្ធិអាជីវកម្ម ឬ franchise គឺជាប្រភេទអាជីវកម្មដែលមានគុណតម្លៃល្អសម្រាប់បុគ្គលដែលមានធនធានច្រើន និងមិនចង់ចំណាយពេលវេលាច្រើនក្នុងការគិតគូរ និងដោះស្រាយបញ្ហាក្នុងប្រតិបត្តិការ។ ប៉ុន្តែយ៉ាងណាក្តី វាក៏អាចផ្តល់មកវិញនូវបញ្ហាលំបាកមួយចំនួនផងដែរ ដែលគ្រប់គ្នាគួរតែពិចារណាឲ្យបានច្បាស់លាស់ ពីព្រោះថាសម្រាប់ពេលបច្ចុប្បន្ននេះ អាជីវកម្មបែប franchise នេះមានតម្លៃមិនតិចជាងរាប់សិបម៉ឺនដុល្លារនោះទេ ដូចជាអាជីវកម្មកាហ្វេ បោកអ៊ុត ឬភោជនីយដ្ឋានជាដើម។

អាជីវកម្មបែប franchise ផ្តល់ឱ្យម្ចាស់អាជីវកម្មដែលប្រាថ្នាចង់ក្លាយជាម្ចាស់ក្រុមហ៊ុនមួយ ឬក្លាយជាម្ចាស់ទីតាំងអាជីវកម្មមួយ ឬច្រើននៃម៉ាកអាជីវកម្មណាមួយ។ អ្នកលក់សិទ្ធិអាជីវកម្មអាចជាបុគ្គលម្នាក់ ឬក្រុមមនុស្សទិញសិទ្ធិផ្តាច់មុខជាមួយគ្នា។

ដោយឡែកអ្នកទិញ ឬទទួលសិទ្ធិផ្តាច់មុខយល់ព្រមតាមលក្ខខណ្ឌជាមួយក្រុមហ៊ុនធំជាងអំពីរបៀបដែលអាជីវកម្មនឹងដំណើរការ ហើយពួកគេទទួលបានសិទ្ធិធ្វើប្រតិបត្តិការក្រោមឈ្មោះ ស្លាកសញ្ញា កេរ្តិ៍ឈ្មោះរបស់ក្រុមហ៊ុននោះ ហើយមិនត្រឹមតែប៉ុណ្ណោះ ពួកគេក៏នឹងទទួលបានសម្ភារទីផ្សារ ទីតាំង ការផ្គត់ផ្គង់ និងអ្វីៗជាច្រើនទៀតផងដែរ។

ប្រសិនបើអ្នកកំពុងពិចារណាទិញសិទ្ធិអាជីវកម្មណាមួយនៅពេលនេះ តើអ្នកបានគិតដល់ចំណុចលំបាកមួយចំនួនដូចខាងក្រោមនេះហើយឬនៅ ពីព្រោះថា ក្រៅតែពីត្រូវចំណាយទុនដ៏ច្រើនសន្ធឹកសន្ទាប់ហើយនោះ ក្នុងនាមជាម្ចាស់អាជីវកម្ម អ្នកពិតជានឹងត្រូវប្រឈមនឹងបញ្ហាមួយចំនួនធំផ្សេងទៀតដែរ។

ម្ចាស់អាជីវកម្ម franchise នឹងមិនមានសិទ្ធិក្នុងការសម្រេចចិត្តឡើយចំពោះការផ្លាស់ប្តូរ ឬបត់បែនទៅលើប្រតិបត្តិការអាជីវកម្មប្រចាំថ្ងៃបូករួមទាំងឯកសណ្ឋាន ទំនិញ ឬផលិតផល ដែលត្រូវចូលស្តុកទៅដល់ដៃគូផ្គត់ផ្គង់សំភារៈដែលអ្នកគិតថាជាខ្ទង់ចំណាយធំរបស់ក្រុមហ៊ុន។

franchise មិនអនុញ្ញាតឲ្យអ្នកធ្វើការកែប្រែឡូហ្គោ ឬទំរង់អាជីវកម្មឡើយ។ ជារៀងរាល់ឆ្នាំ អ្នកអាចនឹងត្រូវចំណាយទៅលើសេវាកម្មយីហោអាជីវកម្ម ឬ franchise fee ក្នុងទំហំកើនឡើងដោយមិនអាចប្រកែកបានឡើយទោះបីជាអ្នកអាចមើលឃើញខ្ទង់ចំណាយផ្សេងៗក៏មានការកើនឡើងដូចគ្នាក្តី។ ដូច្នេះ អ្នកត្រូវទទួលស្គាល់ថា ក្នុងនាមជាម្ចាស់អាជីវកម្មក្តី ប៉ុន្តែអ្នកពុំមានសិទ្ធិក្នុងការគ្រប់គ្រងប្រតិបត្តិការឡើយ។

យ៉ាងណាក្តី បើយើងក្រឡេកទៅមើលអត្ថប្រយោជន៍វិញ អាជីវកម្មបែប franchise ក៏នឹងអាចធ្វើឲ្យម្ចាស់អាជីវកម្មទទួលបានផលជាច្រើនផងដែរ។ franchise ជាអាជីវកម្មដែលបានរៀបចំផែនការអាជីវកម្មរួចជាស្រេចមិនចំណាយពេលច្រើនដើម្បីចាប់ផ្តើម ហើយមិនត្រឹមតែប៉ុណ្ណោះ វាអាចធានាបាននូវសុវត្ថិភាពផ្នែកហិរញ្ញវត្ថុផងដែរតាមរយៈខ្ទង់ចំណូលដែលមានស្រាប់។ អ្វីដែលកាន់តែគួរឲ្យទាក់ទាញនោះគឺថា វាជាអាជីវកម្មដែលមានភាពប្រថុយប្រថានទាប ពីព្រោះថាវាបានជ្រាបចូលទីផ្សាររួចរាល់ទៅហើយ៕