ភ្នំពេញ៖ អនុស្សរណៈយោគយល់ត្រីភាគី (MoUs) សំខាន់ៗចំនួនពីរ ត្រូវបានចុះហត្ថលេខា រវាងក្រុមហ៊ុនរបស់កម្ពុជា និងក្រុមហ៊ុនឯកទេសកសិកម្មធំៗពីររបស់ចិន ដើម្បីបង្កើតវិថីថ្មីសម្រាប់នវានុវត្តន៍ និងកិច្ចសហប្រតិបត្តិការក្នុងវិស័យកសិកម្មរវាងកម្ពុជា-ចិន ជាពិសេសលើកកម្ពស់ការផលិត និងកែច្នៃដំណាំដំឡូងមី។ ការចុះ​ហត្ថលេខាលើអនុស្សរណៈនេះ ធ្វើឡើងក្រោមវត្តមានលោកជំទាវ ស្វាយ ណាគ្រី អនុរដ្ឋលេខាធិការក្រសួងពាណិជ្ជកម្មតំណាលោកជំទាវ ចម និមល រដ្ឋមន្ត្រី​ក្រសួងពាណិជ្ជកម្ម ។

កិច្ចព្រមព្រៀងត្រីភាគីនេះដែរ កើតឡើងពីកិច្ចប្រឹងប្រែង និងការសម្របសម្រួលក្រោមកម្មវិធីផ្គូរផ្គង និងលើកកម្ពស់បណ្តាញធុរកិច្ចកម្ពុជា-ចិន របស់មូលនិធិអភិវឌ្ឍន៍សហគ្រិនភាព នៃក្រសួងសេដ្ឋកិច្ច និងហិរញ្ញវត្ថុ។

យ៉ាងណាមិញ អនុស្សរណៈយោគយល់គ្នាដែលបានចុះហត្ថាលេខាដោយត្រីភាគីទី១ គឺផ្តោតលើសហប្រតិបត្តិការ ដើម្បីបង្កើតភាពប្រសើរឡើងនៃវិស័យកសិកម្ម ដែលបានចុះហត្ថលេខាដោយ ក្រុមហ៊ុន ID Capital ក្រុមហ៊ុន Chongqing Hongjiu Fruit, និង ADWT ។ 

ដោយក្រុមហ៊ុន ID Capital ជាក្រុមហ៊ុនវិនិយោគ និងគ្រប់គ្រងមូលនិធិឈានមុខនៅកម្ពុជា រីឯក្រុមហ៊ុន Chongqing Hongjiu Fruit ជាក្រុមហ៊ុននាំមុខគេក្នុងការផ្គត់ផ្គង់ និងចែកចាយផ្លែឈើស្រស់នៅប្រទេសចិន និងក្រុមហ៊ុន Advance Digital World Trade(ADWT) ជាដៃគូផ្លូវការរបស់ក្រុមហ៊ុន Alibaba នៅកម្ពុជា។ តាមរយៈដៃគូថ្មីនេះ ភាគីទាំង ៣ នឹងរួមគ្នាដើម្បីផ្លាស់ប្តូរការអនុវត្ត និងអភិវឌ្ឍនៅក្នុងវិស័យកសិកម្ម ដើម្បីបង្កើននិរន្តរភាព នវានុវត្តន៍ និងជំរុញកំណើនសេដ្ឋកិច្ច​របស់ប្រទេសទាំង ២ ។

ចំណែកអនុស្សរណៈយោគយល់ទី២ គឺផ្តោតលើការផ្លាស់ប្តូរ និងអភិវឌ្ឍន៍ នៃវិស័យដំឡូងមី។ ក្រុមហ៊ុន ID Capital, ADWT ជាមួយ ATL ដែលជាក្រុមហ៊ុនបុត្រសម្ព័ន្ធ​របស់ក្រុមហ៊ុន Asia Cassava Resources Holding Limited និងជាអ្នកជំនាញឈានមុខក្នុងការដាំដុះ និងកែច្នៃដំឡូងមី ។ កិច្ចព្រមព្រៀងនេ​បង្ហាញពីការបង្កើត​ភាពជាដៃគូដ៏សំខាន់ ក្នុងគោលបំណងជំរុញផលិតកម្មដំឡូងមីកម្ពុជា ការកែច្នៃ និងពាណិជ្ជកម្មឱ្យឈានដល់កម្រិតថ្មីមួយ។

លោកបណ្ឌិត ហោ សេរីវឌ្ឍន៍ ប្រធានក្រុមហ៊ុន ID Capital បានបញ្ជាក់ថា ៖

«កិច្ចសហការរបស់យើងជាមួយក្រុមហ៊ុន Chongqing Hongjiu Fruit , ATL, និង ADWT ដែលស្ថិតនៅក្រោមការផ្តួចផ្តើមរបស់មូលនិធិអភិវឌ្ឍន៍សហគ្រិនភាព បានឆ្លុះបញ្ចាំងពីការយកចិត្តទុកដាក់របស់រាជរដ្ឋាភិបាលកម្ពុជា និងភាគីពាក់ព័ន្ធក្នុងការជួយជំរុញ​វិស័យកសិកម្មប្រកបដោយនិរន្តរភាព និងការលើកកម្ពស់ពាណិជ្ជកម្មឆ្លងដែន (cross-border trade)។ ពួកយើងខ្ញុំនឹងបន្តអនុវត្តកិច្ចសហការនេះដើម្បីបង្កើតវិបុលភាព​សេដ្ឋកិច្ច ជាពិសេសចូលរួមពង្រឹងមិត្តភាពរវាងកម្ពុជា និងចិន»។

លោក Den Hongjiu ប្រធានក្រុមហ៊ុន Chongqing Hongjiu Fruit បានកត់សម្គាល់ថា៖

«កិច្ចសហការជាមួយ ID Capital និង ADWTនឹងមិនត្រឹមតែពង្រឹង​ការយកចិត្តទុកដាក់របស់យើងចំពោះវិស័យកសិកម្ម ប្រកបដោយនិរន្តរភាពប៉ុណ្ណោះទេប៉ុន្តែថែមទាំងបង្ហាញពីការប្តេជ្ញាចិត្តរបស់យើ​ក្នុងការលើកកម្ពស់ឧស្សាហកម្ម​កសិកម្មនៅកម្ពុជា និងប្រទេសចិនផងដែរ»។

ជាមួយគ្នានេះ លោក Ming Chuan Chu ប្រធានក្រុមហ៊ុន Artwell Tapioca Limited បានបញ្ជាក់យ៉ាងច្បាស់ថា៖

«កិច្ចសហការរបស់យើងជាមួយ ID Capital ជាមួយនឹង ADWT ក្រោមការគាំទ្រ និងសម្របសម្រួលយ៉ាងយកចិត្តទុកដាក់របស់មូលនិធិអភិវឌ្ឍន៍សហគ្រិនភាពបានសបញ្ជាក់ពីការប្តេជ្ញាចិត្តក្នុងការអភិវឌ្ឍកសិកម្មដំឡូងមីប្រកបដោយនិរន្តរភាព។ ជាមួយគ្នានេះយើងកំពុងត្រៀមខ្លួន ដើម្បីនាំមកនូវបដិវត្តកម្ម និងនវានុវត្តន៍នៃផលិតកម្មដំឡូងមី ដើម្បីជាប្រយោជន៍ដល់សេដ្ឋកិច្ចកម្ពុជា និងចិន»។

តាមរយៈកិច្ចព្រមព្រៀងនេះដែរ លោកឧកញ៉ាបណ្ឌិត ឈិន កេន នាយកគ្រប់គ្រង ADWT បានមានប្រសាសន៍ថា កម្មវិធីផ្គូរផ្គងធុរកិច្ចកម្ពុជា-ចិនរបស់មូលនិធិអភិវឌ្ឍន៍សហគ្រិនភាពបា​បង្ហាញពី​សក្តានុពលសម្រាប់កំណើនសេដ្ឋកិច្ច និងកិច្ចសហប្រតិបត្តិការតាមរយៈការបង្កើនពាណិជ្ជកម្មក្នុងប្រទេសទាំងពីរ៕