ភ្នំពេញ ៖ រាប់ចាប់តាំងពីការផ្ទុះឡើងនូវជំងឺរាតត្បាតកូវីដ១៩មក បច្ចេកវិទ្យាបានចូលមកបម្រើឱ្យការរស់នៅប្រចាំថ្ងៃកាន់តែខ្លាំង ជាពិសេសគឺបច្ចេកវិទ្យាហិរញ្ញវត្ថុតែម្ដង។ ការទូទាត់ដែលធ្លាប់តែធ្វើឡើងដោយផ្ទាល់ជាសាច់ប្រាក់ ក៏បានប្រែក្លាយទៅជាការទូទាត់ពីចម្ងាយតាមប្រព័ន្ធឌីជីថលត្រឹមតែរយៈពេលខ្លី។ ជាការឆ្លើយតបនឹងទំនោរថ្មីរបស់ប្រជាជនបែបនេះ គ្រឹះស្ថានហិរញ្ញវត្ថុនៅកម្ពុជាចាប់ផ្ដើមវិវត្តខ្លួន ទៅជាឌីជីថល ដោយបានបង្កើតកម្មវិធីធនាគារតាមទូរសព្ទដៃ (Bank Application) ជាបន្តបន្ទាប់។

រហូតមកដល់បច្ចុប្បន្ន ការទូទាត់តាមប្រព័ន្ធឌីជីថលនេះកាន់តែមានភាពទូលំទូលាយ និងត្រូវបាន​ប្រើប្រាស់​ស្ទើរតែគ្រាប់ទីកន្លែង ប៉ុន្តែជាមួយគ្នានេះ វាក៏ជាឱកាសដែលបើកផ្លូវដល់ជនខឹលខូចក្នុង ការលួចប្រាក់ចេញពីគណនីធនាគារតាមប្រព័ន្ធឌីជីថលផងដែរ។

បើតាម លោក រ៉ូន្នី ឧត្តម ប្រធាននាយកដ្ឋានត្រួតពិនិត្យហានិភ័យបច្ចេកវិទ្យា និងនវានុវត្តន៍ នៃអគ្គនាយកដ្ឋានត្រួតពិនិត្យរបស់ធនាគារជាតិនៃកម្ពុជាបានឱ្យដឹងថា សព្វថ្ងៃនេះ ករណីឆបោកគឺមាននៅគ្រប់ប្រទេសទាំងអស់ គ្រាន់តែការឆបោកនឹងមានអាត្រាខ្ពស់ ប្រសិនបើចំណេះដឹងរបស់ប្រជាជននៅមានកម្រិត។

យោងតាមរបាយការណ៍ពី UNESCO កាលពីឆ្នាំ២០២០ បានឱ្យដឹងថា ប្រជាជនកម្ពុជាត្រឹមតែចំនួន ៣២ភាគរយប៉ុណ្ណោះ ដែលមានមូលដ្ឋានចំណេះដឹងផ្នែកឌីជីថល ហើយមានត្រឹមតែ ៥%ប៉ុណ្ណោះ ដែលមានចំណេះដឹងមធ្យម និងត្រឹមតែ១%ប៉ុណ្ណោះ ដែលមានជំនាញឌីជីថលកម្រិតខ្ពស់។ ការណ៍នេះហើយ ដែលនាំឱ្យរូបភាពនៃការឆបោកនៅកម្ពុជានៅតែបន្តកើតមានជាញឹកញយ ហើយមានច្រើនជាងបើធៀបទៅនឹងករណីឆបោករបស់ប្រទេសជិតខាង។

ដោយឡែក បើតាមការបញ្ជាក់របស់លោក រ៉ូន្នី ឧត្តម បច្ចុប្បន្ន កម្ពុជាមានធនាគារពាណិជ្ជប្រមាណ ៥៩ ធនាគារ​ឯកទេស ៩ គ្រឹះស្ថាន​មីក្រូ​ហិរញ្ញវត្ថុ​មិនទទួលប្រាក់បញ្ញើ ៨៤ គ្រឹះស្ថានភតិសន្យា​ហិរញ្ញវត្ថុ ១៣ គ្រឹះស្ថានឥណទានជនបទ ១១៣ គ្រឹះស្ថានផ្ដល់សេវាទូទាត់សង ប្រាក់ ៣០ ក្រុមហ៊ុនចែករំលែក​ព័ត៌មានឥណទាន១ ការរិយា​ល័យតំណាងធនាគារបរទេស ៥ និងអាជីវកម្ម​ប្ដូរប្រាក់ ៣៣០០​ជាងកន្លែង។  

តាមរយៈទិន្នន័យនេះ លោក រ៉ូន្នី ឧត្តម បានបញ្ជាក់ថា៖

«ស្ថាប័នហិរញ្ញវត្ថុនៅទូទាំងប្រទេសមានច្រើន​មែនទែន រីឯទំហំនៃប្រតិបត្តិការហិរញ្ញវត្ថុ គឺមានទំហំច្រើន… ហើយបើយើងមើលពីប្រតិបត្តិការ ដែលគ្រឹះស្ថាននីមួយៗដំណើរការ គឺសឹងតែគ្រប់ស្ថាប័នហើយដែលមានកម្មវិធីទូរស័ព្ទខ្លួនឯង ដើម្បីដាក់បម្រើសេវាកម្មឱ្យទៅ​អតិថិជន»។

 លោកបន្តគូសបញ្ជាក់ដែរថា ការប្រើប្រាស់នោះទៀតសោត ដោយសារតែភាពងាយស្រួល អ្នកប្រើប្រាស់ភ្លេចគិតថាហានិភ័យមកជាមួយនឹងកម្មវិធី និងសេវាកម្មទាំងអស់នោះដែរ។ ដូច្នេះ សម្រាប់ធនាគារជាតិ គឺតែងតែយកចិត្តទុកដាក់ ពាក់ព័ន្ធនឹងការបង្កើតនូវបទបញ្ញត្តិថ្មីៗ សេចក្ដីណែនាំថ្មីៗ​ ហើយនឹងចុះ​ជួបផ្ទាល់ជាមួយនឹងគ្រឹះស្ថាន​ ក៏ដូចជាប្រជាជននៅ​ក្នុងមូលដ្ឋានផងដែរ។

ជាមួយគ្នានេះ លោកក៏បានលើកទឹកចិត្តឱ្យប្រជាពលរដ្ឋដែលជាអ្នកប្រើប្រាស់សេវាកម្មហិរញ្ញវត្ថុ រៀនស្វែងយល់បន្ថែមអំពីបច្ចេកវិទ្យាថ្មីៗ ជាពិសេសត្រូវរៀនគិតឱ្យស៊ីជម្រៅ (Critical Thinking) ចៀសវាងការជឿស្លុងទៅលើពាក្យបញ្ចុះបញ្ចូលរបស់ជនខឹលខូចដែលអាចនាំឱ្យខាតបង់ផលប្រយោជន៍ ឬទ្រព្យសម្បត្តិ៕