សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ សភាពាណិជ្ជកម្មកម្ពុជា (CCC) និងក្រុមប្រឹក្សាពិគ្រោះយោបល់ធុរកិច្ចអាស៊ាន-កម្ពុជា សហការជាមួយសភាពាណិជ្ជកម្មអន្តរជាតិ (IBC) សមាគមពាណិជ្ជកម្មនៅកម្ពុជា និងអាស៊ាន នឹងរៀបចំកិច្ចប្រជុំកំពូលធុរកិច្ចកម្ពុជា-អាស៊ាន ឆ្នាំ២០២៦ (ASEAN – Cambodia Business Summit 2026) ក្រោមមូលបទ «ការផ្លាស់ប្តូរអាស៊ាន៖ នវានុវត្តន៍ ការធ្វើសមាហរណកម្ម និងការវិវត្តនៃឧស្សាហកម្ម» ដែលនឹងប្រព្រឹត្តទៅនៅថ្ងៃទី០៣-០៤ ខែមីនា ឆ្នាំ២០២៦ នៅរាជធានីភ្នំពេញ។
យោងតាមសេចក្តីប្រកាសព័ត៌មានរបស់សភាពាណិជ្ជកម្មកម្ពុជា (CCC) បានបញ្ជាក់ថា ព្រឹត្តិការណ៍នេះនឹងត្រូវបានរៀបចំឡើងស្របពេលដែលអាស៊ានកំពុងពង្រឹងជំហររបស់ខ្លួនជាមជ្ឈមណ្ឌលកំណើនសកល។ ពិធីបើកកិច្ចប្រជុំកំពូលធុរកិច្ច នឹងប្រព្រឹត្តទៅនៅថ្ងៃទី ០៤ ខែមីនា ឆ្នាំ២០២៦ វេលាម៉ោង ៨និង៣០នាទីព្រឹក នៅសណ្ឋាគារសូហ្វីតែល ភ្នំពេញ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ព្រមទាំងមានការអញ្ជើញចូលរួមពីឥស្សរជនជាន់ខ្ពស់ ឯកអគ្គរដ្ឋទូត តំណាងស្ថាប័នពាក់ព័ន្ធ ក្រុមប្រឹក្សាពិគ្រោះយោបល់ធុរកិច្ចអាស៊ាន ក្រុមហ៊ុនអន្តរជាតិ ធំៗនៅកម្ពុជានិងអាស៊ាន និងអ្នកជំនាញពីគ្រប់វិស័យ។
សភាពាណិជ្ជកម្មកម្ពុជាបានឱ្យដឹងទៀតថា៖ កិច្ចពិភាក្សានៃកិច្ចប្រជុំកំពូលធុរកិច្ច នឹងផ្តោតលើសក្តានុពលអាស៊ាន និងយុទ្ធសាស្ត្រកម្ពុជា ដោយយកប្រធានបទសំខាន់ៗមកជជែកពិភាក្សារួមមាន៖
•ឧស្សាហកម្មបៃតង និងការធ្វើពិពិធកម្ម៖ ការបង្កើនសក្តានុពលសម្រាប់របត់ថ្មី ៖ ថាមពលស្អាត
ការគ្រប់គ្រងដីធ្លី និងការផលិតដែលមានតម្លៃខ្ពស់
•នវានុវត្តន៍ និងប្រព័ន្ធអេកូឡូស៊ីរួមបញ្ចូលគ្នា៖ ការធ្វើសុខដុមនីយកម្ម គយ ពន្ធដារ ឡូជីស្ទីក និងប្រព័ន្ធ
អេកូឡូស៊ីហិរញ្ញវត្ថុ ដើម្បីកំណើនអាជីវកម្ម
•សមាហរណកម្មតំបន់ ៖ កំណើនហួសពីព្រំដែន ៖ ការពង្រឹងខ្សែច្រវាក់ផ្គត់ផ្គង់តំបន់ និងទេសចរណ៍
•ការវិវត្តនៃកម្លាំងពលកម្ម ៖ ជំនាញសម្រាប់ថ្ងៃស្អែក ៖ ការវិវត្តនៃវិស័យបណ្តុះបណ្តាលបច្ចេកទេស និងវិជ្ជាជីវៈ ក្នុងពិភពលោកទំនើប
គួររំលឹកថា៖ កិច្ចប្រជុំកំពូលធុរកិច្ចអាស៊ាន-កម្ពុជាឆ្នាំ២០២៥ បានប្រព្រឹត្តទៅក្រោមប្រធានបទ «ការពន្លឿនការតភ្ជាប់អាស៊ាន៖ មនុស្ស ហេដ្ឋារចនាសម្ព័ន្ធ និងពាណិជ្ជកម្ម» ហើយនៅឆ្នាំ២០២៤ ក្រោមមូលបទ «បញ្ចេញសក្តានុពលអាស៊ាន ៖ ការតភ្ជាប់បច្ចេកវិទ្យា និងកំណើនប្រកបដោយបរិយាប័ន្ន (Unleashing ASEAN’s Potential: Connectivity,Technology and Inclusive Growth)»។
អគ្គនាយករងសភាពាណិជ្ជកម្មកម្ពុជា លោក ម៉េង និមល បានឱ្យដឹងថា៖ វេទិកានេះនឹងផ្តល់ផលវិជ្ជមានច្រើនសម្រាប់កម្ពុជា តាមរយៈការផ្តល់វេទិកាឱ្យមានជំនួបពិភាក្សារវាងធុរជនក្នុ្ងងស្រុក និងអន្តរជាតិ។ កម្ពុជាបានអញ្ជើញប្រទេសជាសមាជិកអាស៊ានទាំងអស់ចូលរួម ហើយក្រៅពីនេះក៏បានអញ្ជើញបណ្តាប្រទេសដែលសភាពាណិជ្ជកម្មកម្ពុជាមានការិយាល័យតំណាង ព្រមទាំងសហគមន៍អ៊ឺរ៉ុបចូលរួមផងដែរ៕
Account
Security
Favourite Content