ភ្នំពេញ ៖ ចាប់តាំងពីឆ្នាំ២០២២ មក ក្រុមហ៊ុន RMA បានផលិតរថយន្ត Ford ប្រមាណ ១៦ ០០០ គ្រឿង ហើយបច្ចុប្បន្នកំពុងពង្រីកខ្សែច្រវាក់ផលិតកម្មរបស់ខ្លួនពីផ្ទៃដី ៥ ហិកតា ទៅ១២​ហិក​តា។ នេះបើតាមការឱ្យដឹងរបស់លោក ងន សាំង អគ្គនាយកក្រុមហ៊ុន RMA Cambodia ។

 លោកបានបន្ថែមថា ៖ ក្រុមហ៊ុនកំពុងផលិតគ្រឿងបង្គុំរថយន្តក្នុងស្រុក ដោយចាប់ផ្តើមពីការផលិតកៅអីសម្រាប់រថយន្ត Ford ។ ក្រុមហ៊ុន RMA Cambodia គឺជាបុត្រសម្ព័ន្ធនៃ RMA Group ដែលជាក្រុមហ៊ុនពហុជាតិសាសន៍ មានប្រតិបត្តិការនៅទ្វីបអាស៊ី អាហ្វ្រិក សហរដ្ឋអាម៉េរិក និងអឺរ៉ុប។ ក្រុមហ៊ុនមានវត្តមាននៅកម្ពុជាតាំងពីឆ្នាំ១៩៩២ ហើយធ្វើអាជីវកម្មលើវិស័យចម្រុះ រួមមានយានយន្ត គ្រឿងចក្រធុនធ្ងន់ ឧបករណ៍ឧស្សាហកម្ម និងសេវាកម្មហិរញ្ញវត្ថុជាដើម។

ក្នុងជំនួបថ្មីៗកន្លងទៅនេះ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានពិភាក្សាជាមួយអគ្គនាយកក្រុមហ៊ុន RMA Cambodia អំពីកិច្ចសហការគាំទ្រការពង្រីករោងចក្រដំឡើងរថយន្ត Ford និងបង្កើនការផលិតគ្រឿងបង្គុំរថយន្តនៅក្នុងស្រុក។

ឯកឧត្តមរដ្ឋមន្ត្រីបានកោតសរសើរចំពោះវឌ្ឍនភាពរបស់ក្រុមហ៊ុន និងការវិនិយោគរយៈពេលវែង ព្រមទាំងលើកទឹកចិត្តឱ្យក្រុមហ៊ុនសិក្សាលទ្ធភាពភ្ជាប់ខ្សែច្រវាក់ផលិតកម្មរបស់ខ្លួន ជាមួយសហគ្រាសធុនតូច និងមធ្យមកម្ពុជា។

ឯកឧត្តមបានលើកឡើងថា

«យើងត្រូវការក្រុមហ៊ុនអន្តរជាតិដូចជា RMA ដើម្បីរួមចំណែកដល់កាអភិវឌ្ឍឧស្សាហកម្មរបស់កម្ពុជា។ ក្រសួង និងស្ថាប័នពាក់ព័ន្ធក្រោមឱវាទ រួមទាំងវិទ្យាស្ថានស្តង់ដារកម្ពុជា ត្រៀមខ្លួនគាំទ្រដល់ការពង្រីក និងការផលិតគ្រឿងបង្គុំរបស់ក្រុមហ៊ុន RMA» ។

ឯកឧត្តមរដ្ឋមន្ត្រីបានលើកទឹកចិត្តឱ្យក្រុមហ៊ុនរក្សាកំណត់ត្រាវឌ្ឍនភាពនៃការផលិត និងការរួមចំណែកដល់ឧស្សាហកម្មប្រតិគមន៍ (Backward Linkage) សម្រាប់ការបំពេញលក្ខខណ្ឌតម្រូវទីផ្សារនាពេលអនាគត និងជាយុទ្ធសាស្ត្រសម្រាប់ទាក់ទាញអតិថិជន។

ក្រុមហ៊ុន RMA Cambodia គឺជាបុត្រសម្ព័ន្ធនៃ RMA Group  ដែលជាក្រុមហ៊ុនពហុជាតិសាសន៍ មាន ប្រតិបត្តិការនៅទ្វីបអាស៊ី អាហ្វ្រិក សហរដ្ឋអាមេរិក និងអឺរ៉ុប។ ក្រុមហ៊ុនមានវត្តមាននៅកម្ពុជាតាំងពីឆ្នាំ១៩៩២ ហើយធ្វើអាជីវកម្មលើវិស័យចម្រុះ រួមមានយានយន្ត គ្រឿងចក្រធុនធ្ងន់ ឧបករណ៍ឧស្សាហកម្ម និងសេវាកម្មហិរញ្ញវត្ថុជាដើម។

គួររំលឹកថា៖ ក្រុមហ៊ុន​ដំឡើង​រថយន្ត​ Ford នៅកម្ពុជា បានបង្កើតរោងចក្រដំឡើងគ្រឿងបង្គុំថ្មីបន្ថែម​មួយ​ទៀត (Sub-Assembly Plant) ដែលអាចផ្ដល់ឱកាសការ​ងារ​បាន​ជា​ច្រើន​កន្លែង ខណៈ ក្រុមហ៊ុន​បានពង្រីកការវិ​និយោ​គនូវទំហំទឹកប្រាក់​​ពី ២១​លានដុល្លារអាមេរិក ទៅ ២៦,៨លាន​ដុល្លារ និង​បាន​ពង្រីកផ្ទៃដីសាងសង់រោងចក្រពី ៥ហិកតា ដល់ ១២ហិកតា។រោងចក្រដំឡើងគ្រឿងបង្គុំថ្មីនេះ ត្រូវបានដាក់ឱ្យដំណើរការជាផ្លូវការនៅថ្ងៃទី ២២ ខែមេសា ឆ្នាំ ២០២៥ ក្រោមអធិបតីភាព សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

លោក Kevin Whitcraft ប្រធានក្រុមហ៊ុន RMA Group បានលើកឡើងក្នុងឱកាសសម្ពោធធរោងចក្រថ្មីថា៖ក្រុមហ៊ុនបាន​ផ្លាស់​ប្តូរចង្វាក់​ផលិត​កម្ម​​ពីកម្រិតដំឡើង CKD មកកម្រិត IKD-1 ដែល​អាចបង្កើនសមត្ថភាព ផលិត​រថ​យន្តលើសពី ១០,០០០​​គ្រឿង​ក្នុងមួយឆ្នាំ។

ក្រុមហ៊ុន RMA CAMBODIA ជាក្រុមហ៊ុនឈានមុខគេក្នុងវិស័យយាន​យន្តនៅ​កម្ពុជា ក្នុងនោះ រថយន្ត Ford បានទទួលការគាំទ្រពីសំណាក់​ប្រជា​ពលរដ្ឋកម្ពុជារហូតដល់ដណ្ដើមបានចំណាត់ថ្នាក់លេខ១ ក្នុង​ចំណោមទីផ្សាររថយន្តថ្មីអស់រយៈពេល៦ឆ្នាំជាប់ៗគ្នាដោយគិត​ចាប់​ពីឆ្នាំ២០១៩ មកដល់ពេលបច្ចុប្បន្ន។

សូមជំរាបថា រោងចក្រ Ford ត្រូវបានទទួលស្គាល់​ជាអន្តរ​ជាតិ​លើលេខតួរថយន្តផលិតនៅកម្ពុជា Made In Cambodia ដោយសមាគមវិស្វករយានយន្ត ខណៈក្រុម​ហ៊ុន​បានដំឡើងរថយន្ត​សរុប​ចំនួន ៧ ៤៩២ គ្រឿងរួចមកហើយ៕

,