សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងព្រែកជីកហ្វូណនតេជោ ដែលគ្រោងចំណាយទុនប្រមាណ១៧០០លានដុល្លារអាមេរិក រំពឹងថានឹងបើកការដ្ឋានសាងសង់នៅឆ្នាំ២០២៤ខាងមុខនេះ ។ នេះបើតាមប្រសាសន៍របស់ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនកាលពីពេលកន្លងទៅថ្មីៗនេះ។
ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ឱ្យដឹងថា ដោយសារតែការដឹកជញ្ជូនតាមផ្លូវទឹករបស់កម្ពុជានាពេលបច្ចុប្បន្ននេះមានតម្លៃថ្លៃ ទើបរាជរដ្ឋាភិបាលកម្ពុជានៅក្នុងសម័យប្រជុំកាលពីពេលថ្មីៗនេះ បានអនុម័តឱ្យសិក្សាគម្រោងព្រែកជីក គឺព្រែកជីកហ្វូណនតេជោ ដើម្បីដឹកទំនិញចេញពីទន្លេ ទៅកាន់សមុទ្រតែម្ដង ដោយមិនចាំបាច់ឆ្លងកាត់ប្រទេសវៀតណាម ខណៈកំពង់ផែកំពតក៏កំពុងកសាងផងដែរ ។
ឯកឧត្តមបន្តថា ៖
“នៅពេលយើងសាងសង់ព្រែកជីកនេះរួច យើងនឹងចំណេញវេលាដោយសារតែ រយៈចំងាយខ្លីជាងមុន ជាក់ស្ដែងបើយើងដឹកតាមប្រទេសវៀតណាមមានចំណាយប្រមាណ៣៧២គីឡូម៉ែត្រ ហើយបើតាមផ្លូវទឹកថ្មីរបស់យើងគឺមានចំណាយតែ ២៣៧គីឡូម៉ែត្រប៉ុណ្ណោះ ដែលអាចចំណេញដល់ទៅ១៣៥គីឡូម៉ែត្រ។”
ឯកឧត្តមបានបន្តថា ៖
“ព្រែកជីកនេះគឺចំណេញច្រើនណាស់ ដឹកលឿនរហ័ស ហើយសំខាន់មួយទៀតគឺទប់មិនឱ្យទឹកលិចនៅតំបន់ទំនាបនៃខេត្តតាកែវដែលរាល់ឆ្នាំតំបន់ខ្លះលិច និងតំបន់ខ្លះទៀតខ្វះទឹក នៅរដូវវស្សា ព្រោះការសាងសង់ព្រីកនេះមានទ្វារទឹករហូតដល់ទៅ៣ គឺទ្វារទឹកនៅតាកែវមួយ នៅកែបមួយ និងនៅទន្លេមេគង្គមួយទៀត ។”
តាមពិតទៅ ព្រែកជីកថ្មីដែលមានប្រវែង១៨៧គីឡូម៉ែត្រមិនមែនជីកទាំងអស់ទេ គឺជីកតែ៧គីឡូម៉ែត្រប៉ុណ្ណោះ ពីព្រោះមានព្រែកចាស់ៗរួចទៅហើយដែលដូនតាខ្មែរបានជីកតាំងពីរាប់ពាន់ឆ្នាំមុន ដូច្នេះគម្រោងព្រែកជីកនេះគឺស្ដារព្រែកដែលមានស្រាប់ឱ្យធំ និងជ្រៅជាងមុនដើម្បីអាចឱ្យនាវាបើកឆ្លងកាត់បាន តែសម្រាប់តំបន់ណាមិនទាន់មានផ្លូវទឹកគឺត្រូវជីកបន្ថែម ។
ឯកឧត្តមបញ្ជាក់ថា ៖
“តាមការសិក្សាព្រែកជីកហ្វូណន គឺជាផ្លូវទឹកដ៏សំខាន់ក្នុងសម័យហ្វូណនដែលសម័យកាលនោះ កម្ពុជាបានដឹកទំនិញរបស់ខ្លួនទៅលក់នៅតំបន់អឺរ៉ុប ពីព្រោះថាកម្ពុជាសម័យហ្វូណនគឺរីកចម្រើនសម្បើមណាស់។”
រាជរដ្ឋាភិបាលកម្ពុជា បានសម្រុកអភិវឌ្ឍន៍ហេដ្ឋារចនាសម្ព័ន្ធកាន់តែច្រើនក្នុងរយៈពេលប៉ុន្មានឆ្នាំចុងក្រោយនេះ ដូចជាផ្លូវល្បឿនលឿន ស្ពានឆ្លងកាត់ទន្លេ លើកកម្ពស់កម្រិតគុណភាពផ្លូវជាតិសំខាន់ៗតភ្ជាប់ពីភ្នំពេញ និងផ្លូវជាតិតាមបណ្ដាខេត្តនានា ផ្លូវទឹកនិងកំពង់ផែអន្តរជាតិនៅខេត្តព្រះសីហនុ និងខេត្តកំពតជាដើម ។ គម្រោងអភិវឌ្ឍន៍ទាំងអស់នេះ បាន និងកំពុងទាក់ទាញការវិនិយោគនានាពីក្នុង និងក្រៅប្រទេស ចូលមកក្នុងប្រទេសកម្ពុជា ៕
Account
Security
Favourite Content