សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សហគមន៍កសិកម្មទឹកហូតមានជ័យក្តីសង្ឃឹម ជាសហគមន៍មួយដែលមានជំនាញក្នុងការដាំដុះបន្លែសុវត្ថិភាពជាច្រើនមុខ ប៉ុន្តែបានចាប់យកយុទ្ធសាស្ត្រដាំដំណាំខ្ទឹមស្លឹករហូតដល់បានទទួលស្គាល់ស្ទើរគ្រប់ខេត្តក្រុង ដែលបច្ចុប្បន្នសហគមន៍កសិកម្មមួយនេះកំពុងមានគម្រោងពង្រីកការដាំដុះខ្ទឹមស្លឹករបស់ខ្លួនបន្ថែមទៀត ព្រោះបាននាំចេញជាប្រចាំទៅកាន់ទីផ្សារក្នុងស្រុក និងប្រទេសជិតខាង ព្រមទាំងបានពង្រីកការដាំបន្លែបន្ទាប់បន្សំផ្សេងទៀត ដើម្បីផ្គត់ផ្គង់ទៅដល់ខេត្ត និងរាជធានីភ្នំពេញនៅទូទាំងប្រទេស។
ប្រធានក្រុមប្រឹក្សាភិបាលសហគមន៍កសិកម្មទឹកហូតមានជ័យក្តីសង្ឃឹម អ្នកស្រី រិទ្ធ ចន្ថា បានឱ្យដឹងថា សហគមន៍មានគោលបំណងធំមួយ គឺចង់រួបរួមកម្លាំងគ្នាផលិតឱ្យបានកាន់តែច្រើន ពោលគឺធំជាងលក្ខណៈគ្រួសារ ដោយសហគមន៍នៅពេលនេះចាប់ផ្តើមធ្វើការជាខ្សែចង្វាក់ផលិតកម្មដែលមានសមាជិកពី៨៥គ្រួសារ រហូតដល់ ១១៥គ្រួសារ ដែលប្រកបរបរដាំខ្ទឹមស្លឹក ហើយបើគិតដល់សមាជិកដាំបន្លែផ្សេងទៀត កើនដល់២៤០គ្រួសារ ។
អ្នកស្រី រិទ្ធ ចន្ថា បានមានប្រសាសន៍ថា ៖
“សហគមន៍កសិកម្មយើងមានផ្ទៃដីដាំស្លកខ្ទឹមបច្ចុប្បន្នសរុបប្រមាណ៨៦ហិកតា ដោយគ្រោងពង្រីក៣២,៨ហិកតាបន្ថែមទៀត ដើម្បីឱ្យត្រូវនឹងតម្រូវការទីផ្សារ។”
អ្នកស្រីប្រធានក្រុមប្រឹក្សាភិបាលសហគមន៍រូបនេះបានបញ្ជាក់ថា ៖
“បច្ចុប្បន្នយើងមានដំណាំយុទ្ធសាស្ត្រ ខ្ទឹមស្លឹក ដំណាំជីរគ្រប់មុខ ការផ្តល់ឥណទានកសិកម្ម ដោយគ្របដណ្តប់វិសាលភាពទូទាំងឃុំទឹកហូត ផ្គត់ផ្គង់ធាតុចូលកសិកម្ម និងពូជបន្លែដល់សមាជិក ការចិញ្ចឹមមាន់ និងដាំបន្លែសុវត្ថិភាព ដូចជា ខ្ទឹមស្លឹក ស្ពៃខៀវ ស្ពែតឿ សាឡាដ និងភ្លៅកង្កែប និងដំណាំ បន្លែក្នុងផ្ទះសំណាញ់ជាដើម។”
អ្នកស្រី រិទ្ធ ចន្ថា បានឱ្យដឹងថា សហគមន៍បានដើរតាមគោលនយោបាយដែលជួយជំរុញការដាំដុះបន្លែសុវត្ថិភាពច្បាស់លាស់សម្រាប់ទីផ្សារធំៗ ទើបសហគមន៍ចាប់ផ្ដើមអនុវត្តតាមបច្ចេកទេសរាប់តាំងពីការជ្រើសរើសពូជរហូតដល់ប្រមូលផលដែលត្រូវទៅតាមមាត្រដ្ឋានស្តង់ដារ។
អ្នកស្រី រិទ្ធ ចន្ថា ឱ្យដឹងថា ៖
“សម្រាប់កត្តាតម្រូវ និងទីផ្សារ បច្ចុប្បន្នទីផ្សារស្លឹកខ្ទឹម បន្លែសុវត្ថិភាពមានតម្រូវការខ្ពស់លើសពីការផ្គត់ផ្គង់ ខណៈសហគមន៍ផ្គត់ផ្គង់បានទីផ្សារនៅរាជធានីភ្នំពេញ និងតាមបណ្ដាខេត្តធំៗមួយចំនួន ដូចជា បាត់ដំបង ពោធិសាត់ កំពង់ធំ សៀមរាប បន្ទាយមានជ័យ តាកែវ កំពត កំពង់ស្ពឺ និងកោះកុង ជាដើម។”
អ្នកស្រីបានបញ្ជាក់ថា ៖
“សម្រាប់ស្លឹកខ្ទឹមយើងមិនមានការខ្វះខាតទេ ព្រោះតម្រូវការទីផ្សារយើងអាចផលិត និងផ្គត់ផ្គង់ឱ្យបានត្រឹម ៣ ទៅ៤ តោន សម្រាប់ទីផ្សារក្នុងស្រុក និងធ្លាប់បានបញ្ជូនទៅទីផ្សារប្រទេសថៃប្រមាណ ២ ទៅ ៣ តោនក្នុង១ថ្ងៃទៀត(ក្នុងពេលទឹកជំនន់) ដែលកាលណោះគិតទៅយើងបានផលិតផលស្លឹកខ្ទឹមប្រមាណ៦ទៅ៧តោន។ បច្ចុប្បន្នសហគមន៍មានលទ្ធភាពផលិត និងលក់ខ្ទឹមស្លឹកដែលជាដំណាំ អាទិភាពរបស់សហគមន៍ គិតជាមធ្យពីប្រមាណ៤តោនក្នុង ១ថ្ងៃជាប្រចាំទៅកាន់ទីផ្សារនៅភ្នំពេញ និងទីផ្សារបណ្តាខេត្តនានា។”
ក្រឡេកទៅកាន់ជីវភាពប្រជាសហគមន៍ទាំង២៤០ គ្រួសារវិញឃើញថាមានភាពល្អប្រសើរ។ សម្រាប់សមាជិករបស់សហគមន៍មានទាំងអ្នកប្រមូលផលបន្លែ អ្នកដាំលក្ខណៈគ្រួសារ ដែលជាផ្នែកមួយជួយសម្របសម្រួល ដឹកនាំការផលិត និងបង្ហាញផលិតផលដល់ទីផ្សារ ហើយក្រៅពីនេះគ្រួសារនីមួយៗគឺពួកគាត់មានមុខរបរ មានដីស្រែ និងដីសម្រាប់ដាំដំណាំបន្ទាប់បន្សំផ្សេងទៀតផងដែរ។
អ្នកស្រី រិទ្ធ ចន្ថា បានបញ្ជាក់ឱ្យដឹងផងដែរថា សម្រាប់គម្រោងទៅថ្ងៃខាងមុខ អ្នកស្រីចង់ពង្រីកផលិតកម្មឱ្យកាន់តែធំ ដោយគ្រោងពង្រីកផ្ទៃដីបដាំដំណាំស្លឹកខ្ទឹមបន្ថែម ហើយក៏មានគម្រោងដាំដំណាំស្លឹកគ្រៃផងដែរ ពោលគឺដាំឱ្យត្រូវតាមសណ្ឋានដីដែលកំពុងធ្វើការសាកល្បង សិក្សាពូជឱ្យច្បាស់សិន និងរកអ្នកគាំទ្រគម្រោងនេះផងដែរ ដើម្បីបង្កើនជីវភាពរបស់សហកមន៍ ៕
Account
Security
Favourite Content